ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 5 ພຶດສະພາ ຜ່ານມາຢູ່ ຮ່າໂນ້ຍ, ທ່ານ ບຸຍແທັງເຊີນ ລັດຖະມົນຕີການຕ່າງປະເທດ ຫວຽດນາມ ແລະ ທ່ານ ວິນສຕັນ ປີເຕີສ ຮອງນາຍົກລັດຖະມົນຕີລັດຖະມົນຕີການຕ່າງປະເທດ ນິວຊີແລນ ເປັນປະທານຮ່ວມກອງປະຊຸມລັດຖະມົນຕີການຕ່າງປະເທດ ຫວຽດນາມ - ນິວຊີແລນ ຄັ້ງທີ 2.
        ຂ່າວລະບຸວ່າ: ໃນກອງປະຊຸມ, 2 ຝ່າຍຕີລາຄາສູງ ແລະ ເຫັນດີຫຼາຍມາດຕະການລະອຽດ ເພື່ອຜັນຂະຫຍາຍບັນດາໝາກຜົນທີ່ບັນລຸໄດ້ໃນການຢ້ຽມຢາມ ນິວຊີແລນ ຢ່າງເປັນທາງການຂອງທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໃນເດືອນມີນາ 2024. 2 ຝ່າຍເຫັນດີສົມທົບກັນກະກຽມບັນດາການເຄື່ອນໄຫວພົວພັນຕ່າງປະເທດໃນປີ 2025 ເມື່ອ 2 ປະເທດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ (1975 – 2025) ແລະ 5 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດ (2020 – 2025). ທ່ານ ວິນສຕັນ ປີເຕີສ ຮອງນາຍົກລັດຖະມົນຕີລັດຖະມົນຕີການຕ່າງປະເທດ ຢືນຢັນວ່າ: ນິວຊີແລນ ຖືເປັນສຳຄັນການພົວພັນກັບ ຫວຽດນາມ ແລະ ຕີລາຄາສູງບັນດາໝາກຜົນດ້ານເສດຖະກິດທີ່ ຫວຽດນາມ ບັນລຸໄດ້ໃນໄລຍະຜ່ານມາ.
        2 ຝ່າຍໄດ້ເນັ້ນໜັກເຖິງການຮ່ວມມືດ້ານເສດຖະກິດ, ການຄ້າ ທີ່ຍັງມີຄວາມສາມາດບົ່ມຊ້ອນຫຼາຍຢ່າງ, ເຫັນດີຜັນຂະຫຍາຍບັນດາມາດຕະການບຸກທະລຸເພື່ອບັນລຸໄດ້ເປົ້າໝາຍນຳວົງເງິນການຄ້າ 2 ສົ້ນໃຫ້ຂຶ້ນເປັນ 3 ຕື້ໂດລາ ໃນປີ 2026; ສືບຕໍ່ບັນດາໂຄງການພັດທະນາເປັນທາງການ (ODA); ເປີດກວ້າງການຮ່ວມມືໃນຂົງເຂດໃໝ່, ຄື: ກະສິກຳປອດສານພິດ, ເສດຖະກິດສີຂຽວ, ເສດຖະກິດດີຈີຕອນ, ການຫັນປ່ຽນພະລັງງານ.
        ເມື່ອແລກປ່ຽນກ່ຽວກັບສະພາບການຢູ່ພາກພື້ນ ແລະ ສາກົນ, 2 ຝ່າຍເຫັນດີເພີ່ມທະວີການສົມທົບກັນ, ໂດຍສະເພາະແມ່ນບັນດາກອງປະຊຸມລັດຖະມົນຕີການຕ່າງປະເທດ ອາຊຽນ ແລະ ບັນດາກອງປະຊຸມທີ່ກ່ຽວຂ້ອງທີ່ຈະຈັດຂຶ້ນຢູ່ ລາວ.