ຂ່າວສານຫວຽດນາມລາຍງານວ່າ: ເມື່ອບໍ່ດົນມານີ້, ທ່ານ ໂຈໂກ ວີໂດໂດ ປະທານາທິບໍດີ ອິນໂດເນເຊຍ ປະກາດວ່າ: ລັດຖະບານ ຈະເພີ່ມທະວີການສະໜອງເຂົ້າສານໃນຕະຫຼາດພາຍໃນປະເທດ ເພື່ອເຮັດໃຫ້ລາຄາຜູ້ບໍລິໂພກມີສະຖຽນລະພາບໃນສະພາບການທີ່ລາຄາເຂົ້າເພີ່ມຂຶ້ນສູງ.

ຂ່າວລະບຸວ່າ: ອີງຕາມຂໍ້ມູນຂອງອົງການສະຖິຕິອິນໂດເນເຊຍ ໃຫ້ຮູ້ວ່າ: ລາຄາເຂົ້າທີ່ກະກຽມເຂົ້າໂຮງສີໃນເດືອນກັນຍາແມ່ນ 7.386 ຣູເປຍຕໍ່ກິໂລ (ເທົ່າກັບ 0,47 ໂດລາຕໍ່ກິໂລ), ເພີ່ມຂຶ້ນ 9,3% ເມື່ອທຽບໃສ່ເດືອນກ່ອນໜ້ານີ້. ທ່ານ ໂຈໂກ ວີໂດໂດ ໃຫ້ຮູ້ວ່າ: ເພື່ອແກ້ໄຂລາຄາເຂົ້າທີ່ເພີ່ມຂຶ້ນ, ລັດຖະບານຈະສະໜອງເຂົ້າສານໃຫ້ຕະຫຼາດຫຼາຍຂຶ້ນກວ່າເກົ່າ. ຍຸດທະສາດນີ້ໄດ້ຮັບການພິສູດແລ້ວວ່າມີປະສິດທິຜົນໃນການຫຼຸດລາຄາເຂົ້າຢູ່ຕະຫຼາດຂາຍສົ່ງ ຊິປິນາງ ທີ່ ນະຄອນຫຼວງ ຈາກາຕາ.

ຄຽງຄູ່ກັບການຮັກສາສະຖຽນລະພາບຂອງລາຄາເຂົ້າແລ້ວ, ກະຊວງກະສິກຳ ອິນໂດເນເຊຍ ແລະ ບັນດາອົງການທີ່ກ່ຽວຂ້ອງພວມສົມທົບກັນຢ່າງຕັ້ງໜ້າເພື່ອຊຸກຍູ້ການຜະລິດເຂົ້າ, ພ້ອມທັງຮັບປະກັນສະຫວັດດີການຂອງຊາວກະສິກອນ.