ຂ່າວຕ່າງປະເທດລາຍງານ ໃນວັນທີ 6 ມິຖຸນາ ຜ່ານມາ, ທາງການຍີ່ປຸ່ນເປີດເຜີຍບົດລາຍລ່າສຸດ ພົບວ່າ: ອັດຕາການເກີດຂອງປະເທດຫຼຸດລົງທຳລາຍສະຖິຕິຕໍ່າສຸດເປັນປີີທີ 8 ຕິດຕໍ່ກັນ, ຂະນະທີ່ລັດຖະບານກຳລັງເລັ່ງອອກມາດຕະການຕ່າງໆ ເພື່ອໃຫ້ຜູ້ຄົນຢາກມີລູກ.
ຂ່າວລະບຸວ່າ: ໃນວັນທີ 5 ມິຖຸນາ ຜ່ານມາ, ກະຊວງສາທາລະນະສຸກຂອງຍີ່ປຸ່ນ ອອກມາລະບຸວ່າອັດຕາການເກີດຂອງປະເທດໃນຂະນະນີ້ເຂົ້າຂັ້ນວິກິດແລ້ວ ຫຼັງຈາກຂໍ້ມູນລ່າສຸດຊີ້ວ່າ ອັດຕາການເກີດມີສະຖິຕິຕໍ່າທີ່ສຸດເປັນເວລາ 8 ປີຕິດຕໍ່ກັນ ໃນຂະນະທີ່ລັດຖະບານກຳລັງຫາທາງເພີ່ມການສະໜັບສະໜູນໃຫ້ຄອບຄົວ ເພື່ອກະຕຸ້ນໃຫ້ຄົນຢາກມີລູກຫຼາຍຂຶ້ນ.
ຂໍ້ມູນລ່າສຸດຂອງກະຊວງສາທາລະນະສຸກຍີ່ປຸ່ນ ເປີດເຜີຍວ່າ: ອັດຕາການເກີດ ຫຼື ຄ່າສະເລ່ຍຈຳນວນລູກທີ່ຄາດວ່າຜູ້ຍິງ 1 ຄົນຈະມີຕະຫຼອດໄລຍະຊີວິດ ມີ 1,2 ໃນປີ 2023 ໂດຍຫຼຸດລົງຈາກປີ 2022 ຊຶ່ງສະຖິຕິຢູ່ທີ່ 1,26 ຊຶ່ງຫ່າງໄກຈາກໂຕເລກ 2,1 ທີ່ຈຳເປັນຕ້ອງການຮັກສາຈຳນວນປະຊາກອນຂອງປະເທດ.ນັບເປັນປີທີ 8 ຕິດຕໍ່ກັນແລ້ວ ທີ່ອັດຕາການເກີດຂອງຍີ່ປຸ່ນຫຼຸດລົງ, ໂດຍເຈົ້າໜ້າທີ່ກະຊວງສາທາລະນະສຸກກ່າວກັບສື່ມວນຊົນວ່າ: ອັດຕາການເກີດໃນປັດຈຸບັນນີ້ຢູ່ໃນຂັ້ນວິກິດແລ້ວ ໂດຍເປັນຜົນມາຈາກປັດໄຈຫຼາຍຢ່າງເຊັ່ນ: ຄວາມບໍ່ໝັ້ນຄົງທາງດ້ານເສດຖະກິດ ແລະ ຄວາມລຳບາກໃນການເຮັດວຽກໄປພ້ອມໆກັບການລ້ຽງດູເບິ່ງແຍງລູກ.
ທັງນີ້, ສະຖານະການຂອງຍີ່ປຸ່ນຍັງຖືວ່າດີກວ່າ ສ ເກົາຫຼີ ຊຶ່ງອັດຕາການເກີດຢູ່ທີ່ 0,72 ຕໍ່າທີ່ສຸດໃນໂລກ ແຕ່ພວກເຂົາກໍກຳລັງເລັ່ງຫາທາງກະຕຸ້ນການມີລູກ ເພື່ອຫຼີກລ່ຽງວິກິດຈຳນວນປະຊາກອນທີ່ກຳລັງຈະເປັນບັນຫາ.
ໃນວັນທີ 5 ມິຖຸນາ, ລັດຖະສະພາຂອງຍີ່ປຸ່ນ ເຫັນດີແກ້ໄຂກົດໝາຍເພີ່ມການສະໜັບສະໜູນທາງການເງິນໃຫ້ພໍ່ແມ່ເພີ່ມຂຶ້ນ, ພັດທະນາການເຂົ້າເຖິງການບໍລິການສຳລັບເດັກນ້ອຍ ແລະ ຂະຫຍາຍສິດທິປະໂຫຍດໃນການພັກວຽກຂອງຜູ້ເປັນພໍ່ແມ່.
ຂະນະດຽວກັນ, ອຳນາດການປົກຄອງນະຄອນຫຼວງໂຕກຽວ ກໍແນະນຳແອັບພີເຄເຊິນ ຫາຄູ່ຂອງຕົນເອງ ເພື່ອກະຕຸ້ນອັດຕາການເກີດເຊັ່ນກັນ, ໂດຍຜູ້ໃຊ້ຕ້ອງປ້ອນຂໍ້ມູນເພື່ອພິສູດວ່າໂສດແທ້ ແລະ ລົງນາມຈົດໝາຍເພື່ອຢືນຢັນຄວາມຕັ້ງໃຈທີ່ຈະແຕ່ງງານ.