ຂ່າວສານຫວຽດນາມລາຍງານວ່າ: ໃນວັນທີ 5 ມິຖຸນາ ຜ່ານມາ, ທ່ານ ໂຣດີຣໂກ ເດີ ລີມາ ບາເອນາ ຊວາເຣສ ເອກອັກຄະລັດຖະທູດ ເບຣຊິນ ປະຈຳ ມົສກູ ກ່າວວ່າ, ການຄ້າລະຫວ່າງ ຣັດເຊຍ ກັບ ເບຣຊິນ ຈະລື່ນກາຍ12 ຕື້ໂດລາ ໃນປີນີ້.
ຂ່າວລະບຸວ່າ: ກ່າວຄຳເຫັນໃນກອງປະຊຸມເສດຖະກິດສາກົນ ຄັ້ງທີ 27 (SPIEF 2024), ທ່ານ ໂຣດີຣໂກ ເດີ ລີມາ ບາເອນາ ຊວາເຣສ ຢືນຢັນວ່າ: ການພົວພັນຮ່ວມມືດ້ານເສດຖະກິດລະຫວ່າງ ຣັດເຊຍ - ເບຣຊິນ ພວມນັບມື້ນັບແໜ້ນແຟ້ນ. ປີຜ່ານມາ, ການຄ້າສອງຝ່າຍບັນລຸ 11 ຕື້ກວ່າໂດລາ. ຄວາມຫວັງຂອງການແລກປ່ຽນການຄ້າໃນປີນີ້ແມ່ນໄດ້ຮັບການຊຸກຍູ້ຫຼາຍຂຶ້ນກ່ວາເກົ່າດ້ວຍຍອດມູນຄ່າຫຼາຍກວ່າ 12 ຕື້ໂດລາ.
ທ່ານໂຣດີຣໂກ ເດີ ລີມາ ບາເອນາ ຊວາເຣສ ຍັງກ່າວວ່າ: ຣັດເຊຍ ໄດ້ກາຍເປັນຄູ່ຮ່ວມມືການຄ້າທີ່ສຳຄັນທີ່ສຸດຂອງເບຣຊິນ. ໃນປີກາຍນີ້, ເບຣຊິນ ໄດ້ສົ່ງອອກສິນຄ້າໄປ ຣັດເຊຍ ສ່ວນຫຼາຍແມ່ນ ຊິ້ນສ່ວນລົດໃຫຍ່, ອຸປະກອນການແພດ, ຢາປົວພະຍາດ, ເຄື່ອງຈັກກະສິກໍາ, ເກີບ ແລະ ເຫຼົ້າແວງ. ຕະຫຼາດ ຣັດເຊຍ ມີຂະໜາດໃຫຍ່ແລະ ເຕັມໄປດ້ວຍຄວາມສາມາດບົ່ມຊ້ອນ, ສະນັ້ນ, ປະຊາຄົມວິສາຫະກິດຢູ່ປະເທດອາເມຣິກາໃຕ້ຕ້ອງພະຍາຍາມຫຼາຍຂຶ້ນກວ່າເກົ່າເພື່ອແກ່ງແຍ້ງໂອກາດນີ້ທີ່ມີຢູ່ຕະຫຼາດຣັດເຊຍ.