ໃນວັນທີ 7 ມິຖຸນາ ນີ້ ທີ່ສໍານັກງານ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ນາງ ປາວລາ ປໍາປາໂລນີ ຮອງຫົວໜ້າກົມໃຫຍ່ ຫົວໜ້າກົມຮັບຜິດຊອບລວມຂົງເຂດອາຊີ-ປາຊີຟິກ ປະຈໍາສໍານັກງານການຕ່າງປະເທດສະຫະພາບເອີຣົບ (ອີຢູ) ໃນໂອກາດເດີນທາງຢ້ຽມຢາມ ແລະ ເຮັດວຽກຢູ່ ສປປລາວ ຢ່າງເປັນທາງການ.

ທ່ານ ນາງ ປາວລາ ປໍາປາໂລນີໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍລາວໃນໂອກາດທີ່ໄດ້ມາເຄື່ອນໄຫວຢ້ຽມຢາມ ສປປ ລາວ ຢ່າງເປັນທາງການ, ພ້ອມທັງຕີລາຄາສູງຕໍ່ກັບສາຍພົວພັນຮ່ວມມືທີ່ມີມາດົນນານ ລະຫວ່າງ ອີຢູ ກັບ ສປປ ລາວ, ສະແດງຄວາມຊົມເຊີຍບັນດາຜົນສໍາເລັດໃນດ້ານຕ່າງໆທີ່ ສປປ ລາວຍາດມາໄດ້ໃນໄລຍະຜ່ານມາ. ພ້ອມກັນນັ້ນ, ທ່ານໄດ້ສະແດງຄວາມຊົມເຊີຍຕໍ່ການເປັນປະທານໝູນວຽນອາຊຽນຂອງ ສປປ ລາວໃນປີ2024 ຊຶ່ງ ອີຢູມີຄວາມຍິນດີເຮັດວຽກຮ່ວມກັບພາກສ່ວນກ່ຽວຂ້ອງຂອງ ສປປ ລາວເພື່ອສືບຕໍ່ຊ່ວຍເຫຼືອ-ສະໜັບສະໜູນການເປັນເຈົ້າພາບດັ່ງກ່າວ ໃຫ້ໄດ້ຮັບຜົນສໍາເລັດຢ່າງຈົບງາມ.ນອກຈາກນີ້, ທ່ານຍັງໄດ້ແຈ້ງໃຫ້ຊາບກ່ຽວກັບສະພາບການພົ້ນເດັ່ນຂອງອີຢູ, ນະໂຍບາຍຕ່າງປະເທດຂອງອີຢູ, ພ້ອມທັງໄດ້ມີການແລກປ່ຽນທັດສະນະຕໍ່ກັບສະພາບການຕ່າງໆໃນປັດຈຸບັນ ທີ່ເປັນບັນຫາທ້າທາຍ ແລະ ສົ່ງຜົນກະທົບຕໍ່ສະຖຽນລະພາບຂອງພາກພື້ນ ແລະ ໃນໂລກ.

ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງຄະນະຜູ້ແທນອີຢູ ໃນຄັ້ງນີ້, ຖືເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນຮ່ວມມືອັນດີງາມ ລະຫວ່າງ ລາວ ແລະ ອີຢູ. ພ້ອມນີ້ທ່ານຫົວໜ້າຄະນະພົວພັນຕ່າງປະເທດສູນກາງພັກຍັງໄດ້ສະແດງຄວາມຊົມເຊີຍທີ່ເຫັນວ່າ ສາຍພົວພັນຮ່ວມມື ລະຫວ່າງລາວ-ອີຢູໃນຕະຫຼອດໄລຍະ 49 ປີຜ່ານມາໄດ້ຮັບການພັດທະນາແລະເສີມຂະຫຍາຍເປັນກ້າວໆ ແລະ ໄດ້ສະແດງຄວາມຂອບໃຈຕໍ່ການສະໜັບສະໜູນ ແລະ ຊ່ວຍເຫຼືອ ຂອງ ອີຢູໃຫ້ແກ່ສປປລາວຜ່ານໂຄງການຕ່າງໆ ທີ່ກວມເອົາເກືອບທຸກຂະແໜງການຂອງ ສປປ ລາວ ນັບແຕ່ສອງຝ່າຍໄດ້ມີການພົວພັນຮ່ວມມືກັນມາ ແຕ່ປີ 1975 ເຖິງປັດຈຸບັນ ຊຶ່ງໄດ້ປະກອບສ່ວນເຂົ້າໃນການພັດທະນາ ສປປ ລາວ ແລະຫວັງຢ່າງຍິ່ງວ່າ ອີຢູ ຈະສືບຕໍ່ໃຫ້ການຊ່ວຍເຫຼືອແລະສະໜັບສະໜູນແກ່ ສປປ ລາວ ຕື່ມອີກໃນຕໍ່ໜ້າ.

ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ອວຍພອນໃຫ້ ທ່ານ ນາງ ປາວລາ ປໍາປາໂລນີ ພ້ອມດ້ວຍຄະນະ ຈົ່ງປະສົບຜົນສໍາເລັດໃນການຢ້ຽມຢາມ ສປປ ລາວ ໃນຄັ້ງນີ້ ແລະ ອວຍພອນໃຫ້ສາຍພົວພັນຮ່ວມມືລະຫວ່າງ ລາວ-ອີຢູ ຈົ່ງໄດ້ຮັບໝາກຜົນຫຼາຍຂຶ້ນກວ່າເກົ່າ ເພື່ອປະກອບສ່ວນເຂົ້າໃນພາລະກິດສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

ຂ່າວ-ພາບ:ຄຕພ