ຂ່າວຕ່າງປະເທດລາຍງານ ໃນວັນທີ 6 ມິຖຸນາ ຜ່ານມາວ່າ: ເມືອງຟູຈິ ແຂວງຊິຊຶໂອກະ ເປັນແຫ່ງທີ 2 ໃນຍີ່ປຸ່ນ ທີ່ໃຊ້ມາດຕະການເດັດຂາດຕິດຕັ້ງຕາໜ່າງບົດບັງທັດສະນີຍະພາບພູເຂົາໄຟູຈິ,ຫຼັງຈາກນັກທ່ອງທ່ຽວຕ່າງປະເທດແຫ່ມາຖ່າຍຮູບພາບຄວາມງາມຂອງພູເຂົາໄຟຟູຈິເທິງຂົວຟູຈິດຣີມ ຂົວຍົກລະດັບຂ້າມແມ່ນໍ້າອຸຣຸອິ ຊຶ່ງຫັນໜ້າຊື່ກັບພູເຂົາໄຟຟູຈິທີ່ປົກຄຸມໄປດ້ວຍຫິມະ ຈົນເກີດຄວາມວຸ້ນວາຍຈາກພຶດຕິກຳບໍ່ເໝາະສົມເຊັ່ນ: ຢືນຖ່າຍພາບກາງຂົວ ຫຼື ຈອດລົດໃນບ່ອນຫ້າມຈອນ, ຖິ້ມຂີ້ເຫຍື້ອຊະຊາຍ, ສົ່ງສຽງດັງ, ບາງຄົນຍັງຖ່າຍຖິ້ມໄວ້ ຊຶ່ງເປັນສາເຫດໃຫ້ຊຸມຊົນທົນບໍ່ໄດ້ຕໍ່ພຶດຕິກຳດັ່ງກ່າວ ຈຶ່ງມີການຮ້ອງຮຽນ ຈົນກະທັ້ງເຈົ້າໜ້າທີ່ດຳເນີນການຕິດຕັ້ງຮົ້ວຊົ່ວຄາວ ມີຄວາມຍາວ 400 ແມັດ ຕາມຖະໜົນ ແລະ ກຽມຕິດຕັ້ງແຜ່ນກັ້ນຖາວອນ ສູງ 1,8 ແມັດ ໃນເດືອນກັນຍາ.

ເຈົ້າໜ້າທີ່ເມືອງຟູຈິ ເປີດເຜີຍວ່າ: ນັກທ່ອງທ່ຽວມາຢ້ຽມຢາມເມືອງນີ້ຫຼາຍຂຶ້ນ ຫຼັງຈາກຜູ້ມີຊື່ສຽງຂອງຕ່າງປະເທດໂພສພາບ ແລະ ຊີ້ຈຸດເທິງອິນສະຕາແກຣມ ໃນເດືອນທັນວາ ປີຜ່ານມາ ແລະ ໃນປີຜ່ານມາກໍໄດ້ຕິດປ້າຍເຕືອນນັກທ່ອງທ່ຽວ ໃນພາສາຕ່າງໆບໍ່ໃຫ້ກໍ່ເຫດສ່ຽງອັນຕະລາຍ ຫຼື ແລ່ນຂ້າມຫົນທາງ ແຕ່ບໍ່ໄດ້ຜົນ ຈົນຕ້ອງຕິດຕັ້ງຕາໜ່າງກັ້ນດັ່ງກ່າວ, ຢ່າງໃດກໍຕາມທາງເມືອງຢືນຢັນວ່າດີໃຈທີ່ມີຄົນມາທ່ຽວເມືອງຟູຈິ ແຕ່ກໍຕ້ອງຫາແນວທາງແກ້ໄຂບັນຫາດັ່ງກ່າວໃຫ້ຫຼຸດລົງ, ກ່ອນໜ້ານີ້ເມືອງຟູຈິຄາວາກຸຈິໂກະ ໃນແຂວງຍາມານາຊິ ເປັນເມືອງທຳອິດທີ່ທົດລອງຕິດຕັ້ງກຳແພງຕາໜ່າງຂະໜາດໃຫຍ່ບັງວີວພູເຂົາໄຟຟູຈິ ບໍລິເວນໜ້າຮ້ານສະດວກຊື້ລໍສັນ ໃນເດືອນພຶດສະພາຜ່ານມາ, ທັງນີ້ໃນປີຜ່ານມາຍີ່ປຸ່ນຕ້ອນຮັບນັກທ່ອງທ່ຽວເກີນ 25 ລ້ານຄົນ ແລະ ຄາດວ່າໃນປີນີ້ຈະລື່ນກາຍສະຖິຕິ 31,88 ລ້ານຄົນ ຂອງປີ 2019.