ຂ່າວສານຫວຽດນາມລາຍງານວ່າ: ໃນວັນທີ 6 ມິຖຸນາ ຜ່ານມາ, ທະນາຄານກາງ ເອີຣົບ (ECB) ໄດ້ຫຼຸດອັດຕາດອກເບັ້ຍລົງເປັນ 3,75%, ເປັນການຫຼຸດອັດຕາດອກເບ້ຍຄັ້ງທຳອິດນັບແຕ່ປີ 2019. ນີ້ແມ່ນການເຄື່ອນໄຫວທີ່ໜ້າສັງເກດໃນສະພາບທີ່ມີຄວາມກົດດັນດ້ານເງິນເຟີ້ທີ່ຍັງຄົງຄ້າງ ຢູ່ໃນເຂດເອີຣົບລວມ 20 ປະເທດ.

ຂ່າວລະບຸວ່າ: ອີງຕາມການຄາດຄະເນຂອງ ECB, ອັດຕາເງິນເຟີ້ຂອງພາກພື້ນນີ້ໃນປີ 2024 ແລະ 2025 ຈະສູງກວ່າທີ່ຄາດໄວ້, ເຖິງ 2,5% ແລະ 2,2% ຕາມລໍາດັບ, ເພີ່ມຂຶ້ນຈາກອັດຕາ 2,3% ແລະ 2% ທີ່ໄດ້ລາຍງານກ່ອນໜ້ານີ້.

ຢ່າງໃດກໍຕາມ, ECB ໄດ້ເນັ້ນໜັກວ່າການຕັດອັດຕາດອກເບ້ຍແມ່ນມີຄວາມຈໍາເປັນເພື່ອສະໜັບສະຫນູນການເຕີບໂຕຂອງເສດຖະກິດ ແລະ ຮັບປະກັນວ່າອັດຕາເງິນເຟີ້ໄດ້ຮັບການຮັກສາຢູ່ໃກ້ກັບເປົ້າໝາຍ 2% ຂອງທະນາຄານກາງ.

ສະພາບໍລິຫານ ECB ໃຫ້ຮູ້ວ່າ: ໂດຍອີງໃສ່ການປະເມີນສະບັບປັບປຸງຂອງການຄາດຄະເນ ແລະ ປັດໄຈທີ່ສົ່ງຜົນກະທົບຕໍ່ອັດຕາເງິນເຟີ້ເຊັ່ນດຽວກັນກັບນະໂຍບາຍການເງິນ, ສະພາຖືວ່າແມ່ນເວລາທີ່ຈະປັບລະດັບຄວາມຈຳກັດຂອງນະໂຍບາຍການເງິນພາຍຫຼັງ 9 ເດືອນຂອງການຮັກສາອັດຕາດອກເບ້ຍຄົງທີ່.