ວິທະຍຸກະຈາຍສຽງຫວຽດນາມລາຍງານວ່າ: ວັນທີ 9 ຕຸລາ ຜ່ານມານີ້, ຢູ່ນະຄອນ ຮ່າລອງ ແຂວງກວາງນິງ ໄດ້ເປີດກອງປະຊຸມປະຈຳປີ ຄັ້ງທີ 43 ຂອງຄະນະກຳມະການ ອາຊຽນ ກ່ຽວກັບການຄຸ້ມຄອງໄພພິບັດທຳມະຊາດ. ເຂົ້າຮ່ວມມີຜູ້ຕາງໜ້າບັນດາປະເທດສະມາຊິກ ອາຊຽນ ພ້ອມກັບບັນດາອົງການກ່ຽວຂ້ອງ.

ຂ່າວລະບຸວ່າ: ກອງປະຊຸມຄັ້ງນີ້ໄດ້ປະກອບຄຳເຫັນ ແລະ ຮັບຮອງເອົາບາງເນື້ອໃນຕົ້ນຕໍກ່ຽວກັບການຜັນຂະຫຍາຍຄຳຕັດສິນຂອງການນຳຂັ້ນສູງທີ່ກ່ຽວຂ້ອງ; ແລກປ່ຽນ ເພື່ອຍື່ນສະເໜີຕໍ່ກອງປະຊຸມລັດຖະມົນຕີຮັບຮອງເອົາຖະແຫຼງການ ຮ່າລອງ ກ່ຽວກັບການເພີ່ມທະວີການກະທຳໂດຍໄວໃນການຄຸ້ມຄອງໄພພິບັດທຳມະຊາດພາກພື້ນອາຊຽນ ແລະ ປຶກສາຫາລືກ່ຽວກັບລະບຽບການການເງິນຂອງກອງທຶນຄຸ້ມຄອງໄພພິບັດທຳມະຊາດ ແລະ ຮັບມືດ່ວນ ອາຊຽນ.

ທ່ານ ຫງວຽນຮວ່າງຮຽບ ຮອງລັດຖະມົນຕີ ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ກ່າວຄຳເຫັນເປີດກອງປະຊຸມ ວ່າ: ເມື່ອ ຫວຽດນາມ ເປັນເຈົ້າພາບຈັດກອງປະຊຸມ, ບັນດາປະເທດ ອາຊຽນ ແລະ ຕີມໍເລສເຕ ກໍມີຄວາມຄາດຫວັງ ມີຫຼາຍຂໍ້ລິເລີ່ມ ແລະ ການເຄື່ອນໄຫວແທດຈິງກ່ຽວກັບການຄຸ້ມຄອງໄພພິບັດທຳມະຊາດຢູ່ ອາຊຽນ. ນອກຈາກຖະແຫຼງການ ຮ່າລອງ ແລ້ວ, ກອງປະຊຸມຍັງຈະມີບົດບັນທຶກຕີລາຄາກາງອາຍຸສັນຍາຂອງບັນດາຝ່າຍທີ່ເຂົ້າຮ່ວມການຄຸ້ມຄອງໄພພິບັດທຳມະຊາດ ແລະ ຮັບມືກັບສະພາບການດ່ວນ ອາຊຽນ. ບັນດາປະເທດ ອາຊຽນ ກໍຈະພິຈາລະນາແຕ່ນີ້ຮອດປີ 2025 ເພື່ອມີການກະທຳລະອຽດ ສົມທົບໃນການຫຼຸດຜ່ອນຄວາມສ່ຽງໄພພິບັດທຳມະຊາດ