ຂ່າວສານຊີອາໄອລາຍງານເມື່ອມໍ່ໆມານີ້, ສະຫະພັນອຸດສາຫະກຳເບົາຂອງຈີນໄດ້ເຜີຍແຜ່ຂໍ້ມູນສະຖິຕິຫຼ້າສຸດ ໂດຍໃຫ້ຮູ້ວ່າ: ໃນ 4 ເດືອນທຳອິດຂອງປີນີ້, ອຸດສາຫະກຳເບົາຂອງຈີນໄດ້ສືບຕໍ່ຮັກສາທ່ວງທ່າທີ່ຟື້ນຟູດີຂຶ້ນ ຊຶ່ງໄດ້ສະໜອງສິ່ງຄ້ຳປະກັນທີ່ສຳຄັນໃຫ້ແກ່ການພັດທະນາເສດຖະກິດອຸດສາຫະກຳຢ່າງໝັ້ນທ່ຽງ.

ໃນ 4 ເດືອນທຳອິດປີ 2024 ນີ້, ອຸດສາຫະກຳເບົາຂອງຈີນໄດ້ສ້າງລາຍຮັບຈາກທຸລະກິດເຖິງເກືອບ 7.000 ຕື້ຢວນ, ເພີ່ມຂຶ້ນ 2,6% ເມື່ອທຽບໃສ່ໄລຍະດຽວກັນຂອງປີ 2023 ຜ່ານມາ. ການຜະລິດຂອງອຸດສາຫະກຳເບົາສືບຕໍ່ຟື້ນຕົວຄືນ. ໃນ 4 ເດືອນທຳອິດປີນີ້, ມູນຄ່າເພີ່ມຂອງອຸດສາຫະກຳເບົາທີ່ສາມາດສ້າງລາຍຮັບຈາກທຸລະກິດຕົ້ນຕໍ 20 ລ້ານຢວນຂຶ້ນໄປນັ້ນ ໄດ້ເພີ່ມຂຶ້ນ 5,9% ເມື່ອທຽບໃສ່ໄລຍະດຽວກັນຂອງປີ 2023 ຜ່ານມາ. ໃນນັ້ນ, ຈັງຫວະການເຕີບໂຕຂອງມູນຄ່າເພີ່ມຂອງອຸດສາຫະກຳການຜະລິດ ເຊັ່ນ: ການຜະລິດເຈ້ຍ, ຜະລິດຕະພັນພລາສຕິກ, ເຄື່ອງໃຊ້ໄຟຟ້າໃນເຮືອນ ແລະອື່ນໆສູງກວ່າ 10%.

ຕະຫຼາດເຄື່ອງບໍລິໂພກຂອງອຸດສາຫະກຳເບົາໄດ້ເຕີບໂຕຢ່າງໝັ້ນທ່ຽງ. ໃນ 4 ເດືອນທຳອິດປີນີ້, ມູນຄ່າຂາຍຍ່ອຍສິນຄ້າ 11 ປະເພດຂອງອຸດສາຫະກຳເບົາໄດ້ບັນລຸ 2.400 ກວ່າຕື້ຢວນ, ເພີ່ມຂຶ້ນ 5,0% ເມື່ອທຽບໃສ່ໄລຍະດຽວກັນຂອງປີ 2023 ຜ່ານມາ.