ຫວ່າງບໍ່ດົນມານີ້ ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ກົມການຂ່າວ ກະຊວງການຕ່າງປະເທດ ໄດ້ຈັດຝຶກອົບຮົມ ຫົວຂໍ້: “ວຽກງານບໍລິຫານສູນຂ່າວ ແລະ ຄຸ້ມຄອງສື່ມວນຊົນຕ່າງປະເທດ” ເພື່ອກຽມຄວາມພ້ອມ ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມສຸດຍອດອາຊຽນ ຄັ້ງທີ 44, 45 ແລະ ກອງປະຊຸມປິ່ມອ້ອມທີ່ກ່ຽວຂ້ອງອື່ນໆ, ໃຫ້ກຽດເປັນປະທານຮ່ວມ ແລະ ກ່າວເປີດໂດຍ ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ ແລະ ທ່ານ ນາງ ເມແກນ ໂຈນສ ເອກອັກຄະລັດຖະທູດ ອົສຕຣາລີ ປະຈໍາ ສປປ ລາວ, ມີພະນັກງານຈາກກະຊວງການຕ່າງປະເທດ ແລະ ກະຊວງປ້ອງກັນຄວາມສະຫງົບ, ບັນດາຄູ-ອາຈານ ແລະ ນັກສຶກສາອາສາສະໝັກຈາກມະຫາວິທະຍາໄລແຫ່ງຊາດ ເຂົ້າຮ່ວມປະມານ 160 ທ່ານ, ພາຍໃຕ້ການສະໜັບສະໜູນຈາກ ສະຖານເອກອັກຄະລັດຖະທູດ ອົສຕຣາລີ ປະຈໍາ ສປປ ລາວ.

ທ່ານ ໂພໄຊ ໄຂຄໍາພິທູນ ໄດ້ເນັ້ນວ່າ: ການຈັດຝຶກອົບຮົມໃນຄັ້ງນີ້ເປັນການສ້າງຊັບພະຍາກອນມະນຸດດ້ານວຽກງານການຂ່າວທີ່ພົວພັນກັບການຕ່າງປະເທດ ຊຶ່ງຜູ້ເຂົ້າຮ່ວມຈະໄດ້ຮັບຮູ້ ແລະ ເຂົ້າໃຈຄວາມໝາຍຄວາມສໍາຄັນຂອງການເປັນປະທານອາຊຽນ ຂອງ ສປປ ລາວ ແລະ ການກະກຽມຄວາມພ້ອມດ້ານວຽກງານສໍາຄັນຕ່າງໆ, ໂດຍສະເພາະວຽກງານບໍລິຫານສູນຂ່າວ ແລະ ການຄຸ້ມຄອງນັກຂ່າວຕ່າງປະເທດ, ພ້ອມທັງຈະໄດ້ຮຽນຮູ້ລະບຽບຫຼັກການໃນການຄຸ້ມຄອງນັກຂ່າວຕ່າງປະເທດ, ຮຽນຮູ້ທັກສະຕ່າງໆ ໃນການເປັນຜູ້ປະສານງານ ແລະ ຜູ້ບໍລິການທີ່ດີໃຫ້ນັກຂ່າວຕ່າງປະເທດ ແລະ ເຂົ້າໃຈຄວາມສໍາຄັນຂອງວຽກງານຈັດຕັ້ງສູນຂ່າວ ເພື່ອເປັນສະຖານທີ່ເຮັດວຽກຂອງນັກຂ່າວຕ່າງປະເທດ ໃນການຂຽນລາຍງານຂ່າວ ຜົນກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ຈັດຂຶ້ນຢູ່ ສປປ ລາວ ເພື່ອໂຄສະນາເຜີຍແຜ່ຕໍ່ພາກພື້ນ ແລະ ສາກົນ. ທ່ານຮອງລັດຖະມົນຕີກະຊວງການຕ່າງປະເທດ ໄດ້ຮຽກຮ້ອງໃຫ້ຜູ້ເຂົ້າຮ່ວມຝຶກອົບຮົມຄັ້ງນີ້ ໃຫ້ເອົາໃຈໃສ່ສຶກສາຄົ້ນຄວ້າ ແລະ ຖອດຖອນເປັນບົດຮຽນ ເພື່ອນໍາໄປໝູນໃຊ້ເຂົ້າໃນໜ້າທີ່ວຽກງານຕົວຈິງທີ່ຕົນເອງຮັບຜິດຊອບ ໃນການປະກອບສ່ວນຮັບໃຊ້ກອງປະຊຸມອາຊຽນ ທີ່ ສປປ ລາວ ເປັນເຈົ້າພາບ ໃນປີ 2024 ນີ້ ໃຫ້ບັນລຸຜົນສໍາເລັດຢ່າງຈົບງາມ. ໃນໂອກາດນີ້, ທ່ານ ໂພໄຊ ໄຂຄໍາພິທູນ ໄດ້ຕາງໜ້າໃຫ້ກະຊວງການຕ່າງປະເທດ ແລະ ລັດຖະບານລາວ ສະແດງຄວາມຂອບໃຈຕໍ່ ທ່ານ ເມແກນ ໂຈນສ ແລະ ສະຖານທູດ ອົສຕຣາລີ ປະຈໍາ ສປປ ລາວ ກໍຄື ລັດຖະບານ ອົສຕຣາລີ ທີ່ໄດ້ໃຫ້ທຶນສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2024 ເວົ້າລວມ, ເວົ້າສະເພາະ ກໍແມ່ນການຈັດຝຶກອົບຮົມຄັ້ງນີ້ ລວມທັງການໃຫ້ທຶນສະໜັບສະໜູນກົມການຂ່າວ ໃນການຈັດພິມປຶ້ມຄູ່ມືນັກຂ່າວ (Media Guidebook), ເອກະສານໂຄສະນາ ຂໍ້ມູນກ່ຽວກັບການຄ້າ-ການລົງທຶນ ແລະ ການທ່ອງທ່ຽວ ຢູ່ ສປປ ລາວ ເພື່ອແຈກຢາຍໃຫ້ນັກຂ່າວຕ່າງປະເທດ.

ທ່ານ ນາງ ເມແກນ ໂຈນສໄດ້ສະແດງຄວາມຍິນດີທີ່ຈະໃຫ້ການສະໜັບສະໜູນ ສປປ ລາວ ເພື່ອເຮັດໃຫ້ການເປັນປະທານອາຊຽນຂອງ ສປປ ລາວ ໃນປີ 2024 ປະສົບຜົນສໍາເລັດ, ພ້ອມທັງໄດ້ສະແດງຄວາມຫວັງວ່າ ການຝຶກອົບຮົມຄັ້ງນີ້ຈະຊ່ວຍໃຫ້ຜູ້ເຂົ້າຮ່ວມ ໄດ້ຮຽນຮູ້ປະສົບການໃນວຽກງານບໍລິຫານສູນຂ່າວ ແລະ ຄຸ້ມຄອງສື່ມວນຊົນຕ່າງປະເທດ ແລະ ນໍາໃຊ້ຄວາມຮູ້ເຫຼົ່ານັ້ນໄປໝູນໃຊ້ເຂົ້າໃນໜ້າທີ່ຄວາມຮັບຜິດຊອບຕາມການມອບໝາຍ ເພື່ອຮັບໃຊ້ກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 57 ແລະ ກອງປະຊຸມສຸດຍອດອາຊຽນ ຄັ້ງທີ 44, 45 ແລະ ກອງປະຊຸມປິ່ນອ້ອມທີ່ກ່ຽວຂ້ອງອື່ນໆ ຢ່າງມີປະສິດທິຜົນ.

ພາຍຫຼັງພິທີເປີດ, ການຝຶກອົບຮົມໄດ້ສືບຕໍ່ດໍາເນີນໂດຍການເປັນປະທານຂອງ ທ່ານ ບຸນທະລາ ປັນຍາວິຈິດຫົວໜ້າກົມການຂ່າວ ກະຊວງການຕ່າງປະເທດ ຊຶ່ງປະທານກອງປະຊຸມ ໄດ້ຍົກໃຫ້ເຫັນ ກ່ຽວກັບ ອາຊຽນໂດຍສັງເຂບ, ຄວາມສໍາຄັນໃນການເປັນປະທານອາຊຽນຂອງ ສປປ ລາວ, ຜົນປະໂຫຍດ, ສິ່ງທ້າທາຍ ແລະ ການກຽມຄວາມພ້ອມດ້ານວຽກງານການຂ່າວທີ່ພົວພັນກັບຕ່າງປະເທດ. ຫຼັງຈາກນັ້ນ, ຜູ້ເຂົ້າຮ່ວມໄດ້ຮັບຟັງການນໍາສະເໜີ ກ່ຽວກັບ ວຽກງານຈັດຕັ້ງ ແລະ ບໍລິຫານສູນຂ່າວຕ່າງປະເທດ, ວຽກງານລົງທະບຽນ ແລະ ຄຸ້ມຄອງສື່ມວນຊົນຕ່າງປະເທດ, ວຽກງານປະຊາສໍາພັນ ແລະ ຂໍ້ມູນຂ່າວສານ, ແລະ ວຽກງານການໃຫ້ບໍລິການພາຫະນະ ແລະ ໂຮງແຮມ. ໃນຕອນທ້າຍ, ກໍໄດ້ມີການແລກປ່ຽນບົດຮຽນ ຖາມ-ຕອບ ລະຫວ່າງຜູ້ເຂົ້າຮ່ວມ ແລະ ຜູ້ຮັບຜິດຊອບແຕ່ລະວຽກງານ ເພື່ອໃຫ້ຄວາມກະຈ່າງແຈ້ງ ແລະ ຄວາມເຂົ້າໃຈເລິກເຊິ່ງຂຶ້ນຕື່ມ.

ຂ່າວ-ພາບ:ກົມການຂ່າວ, ກະຊວງການຕ່າງປະເທດ