ຂ່າວຕ່າງປະເທດລາຍງານ ຫວ່າງບໍ່ດົນມານີ້, ຄະນະກຳມະການກຳກັບເບິ່ງແຍງກິດຈະການໂທມະນາຄົມແຫ່ງບັງກລາເທດໄດ້ເປີດເຜີຍບົດລາຍງານວ່າ: ມີຈຳນວນຜູ້ໃຊ້ອິນເຕີເນັດໃນບັງກລາເທດ ລວມທັງໝົດ 130,94 ລ້ານຄົນ ເມື່ອນັບເຖິງທ້າຍເດືອນກໍລະກົດຜ່ານມາ ຊຶ່ງແບ່ງເປັນຜູ້ໃຊ້ອິນເຕີເນັດເຄື່ອນທີ່ 118,79 ລ້ານຄົນ ແລະ ຜູ້ໃຊ້ອິນເຕີເນັດ Broadband 12,15 ລ້ານຄົນ.

ບົດລາຍງານລະບຸວ່າ: ກຸ່ມບໍລິສັດ ໂທລະສັບມືຖື ຂອງບັງກລາເທດ ມີຜູ້ໃຊ້ງານໃໝ່ຫຼາຍກວ່າ 7 ລ້ານຄົນໃນໄລຍະເດືອນມັງກອນ-ກໍລະກົດ ຜ່ານມາ ເຮັດໃຫ້ຈຳນວນຜູ້ໃຊ້ບໍລິການທັງໝົດຢູ່ທີ່ 187,48 ລ້ານຄົນ ເມື່ອນັບຮອດທ້າຍເດືອນກໍລະກົດຜ່ານມາ. ໂດຍປັດຈຸບັນ, ບັງກລາເທດມີບໍລິສັດໂທລະສັບມືຖື 4 ແຫ່ງ ຊຶ່ງ 3 ແຫ່ງເປັນຜູ້ໃຫ້ບໍລິການໂທລະສັບມືຖືທີ່ໄດ້ຮັບການສະໜັບສະໜູນຈາກຕ່າງປະເທດ. ໂດຍອີງຕາມຂໍ້ມູນຈາກຄະນະກຳມະການກຳກັບເບິ່ງແຍງກິດຈະການໂທມະນາຄົມແຫ່ງບັງກລາເທດລະບຸວ່າ: ຈຳນວນຜູ້ໃຊ້ບໍລິການຂອງກຣາມີນໂຟນ (Grameenphone), ໂຣບິ ເອເຊຍຕາ (Robi Axiata), ບັງ ກລາລິ້ງ (Banglalink) ແລະ ເທເລທອກ (Teletalk) ຢູ່ທີ່ 81,89 ລ້ານຄົນ, 56,82 ລ້ານຄົນ, 42,30 ລ້ານຄົນ ແລະ 6,47 ລ້ານຄົນຕາມລຳດັບ ເມື່ອນັບເຖິງທ້າຍເດືອນກໍລະກົດຜ່ານມາ.