ຂ່າວສານຫວຽດນາມລາຍງານວ່າ: ຕາມການປະກາດໃນວັນທີ 20 ມິຖຸນາ ຜ່ານມາ ຂອງສະມາຄົມຜູ້ຜະລິດລົດຍົນເອີຣົບ (ACEA), ຍອດຂາຍລົດໄຟຟ້າໃນສະຫະພາບເອີຣົບ (EU) ໄດ້ຫຼຸດລົງ 12% ໃນເດືອນພຶດສະພາ ເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນອັດຕາຫຼຸດລົງສູງສຸດແມ່ນຢູ່ເຢຍລະມັນ (30%).
ຂ່າວລະບຸວ່າ: ໃນປະເທດເຢຍລະມັນ, ຕະຫຼາດຍານພາຫະນະໄຟຟ້າ (EV) ທີ່ໃຫຍ່ທີ່ສຸດຂອງສະຫະພາບເອີຣົບ, ເດືອນທັນວາ 2023 ແມ່ນສິ້ນສຸດໂຄງການເງິນອຸດໜູນການຊື້ລົດໄຟຟ້າ, ດັ່ງນັ້ນຈາກຕົ້ນປີຈົນເຖິງປັດຈຸບັນ, ການຂາຍລົດໄຟຟ້າໃນຕະຫຼາດນີ້ໄດ້ຫຼຸດລົງ 16%.
ອີງຕາມ ACEA, ເດືອນພຶດສະພາຜ່ານມາ ໄດ້ບັນທຶກເປັນຄັ້ງທີສອງໃນປີນີ້ທີ່ຕະຫຼາດລົດໃຫຍ່ຂອງ EU ເວົ້າລວມແມ່ນມີອັດຕາຫຼຸດລົງ, ຍອດຂາຍລົດໃໝ່ໃນ EU ຫຼຸດລົງ 3% ເມື່ອທຽບໃສ່ກັບໄລຍະດຽວກັນຂອງປີກາຍ.
ຄວາມຕ້ອງການລົດ EV ໃນເອີຣົບ ໄດ້ຫຼຸດລົງໃນເດືອນຜ່ານມາຫຼັງຈາກເພີ່ມຂຶ້ນຢ່າງຫຼວງຫຼາຍໃນສອງສາມປີຜ່ານມາ, ໃນຂະນະທີ່ສະພາບແວດລ້ອມການແຂ່ງຂັນສໍາລັບການຜະລິດລົດໃນລາຄາຖືກແມ່ນມີຄວາມເຄັ່ງຕຶງຫຼາຍຂຶ້ນ.
ເພື່ອປ້ອງກັນບັນດາບໍລິສັດຜະລິດລົດຍົນພາຍໃນປະເທດຈາກຂະບວນການນຳເຂົ້າລົດຍົນໄຟຟ້າລາຄາຖືກ, ໃນອາທິດຜ່ານມາ, ຄະນະກຳມະການເອີຣົບ (EC) ໄດ້ປະກາດວ່າຈະເກັບພາສີຊົ່ວຄາວເຖິງ 38,1% ສຳລັບລົດໄຟຟ້າທີ່ຜະລິດໂດຍປະເທດຈີນໃນເດືອນກໍລະກົດນີ້.
ການຢຸດສະງັກໃນປັດຈຸບັນຂອງຕະຫຼາດຍານພາຫະນະໄຟຟ້າຂອງ EU ແມ່ນໄວກວ່າການຄາດຄະເນກ່ອນໜ້ານີ້. ຄາດວ່າຍອດຂາຍຈະເພີ່ມຂຶ້ນອີກໃນປີ 2025 ເມື່ອເປົ້າໝາຍການປ່ອຍອາຍພິດຂອງ EU ຕໍ່ລົດຍົນມີຜົນສັກສິດ.
