ສະມາຄົມມິດຕະພາບກັບຕ່າງປະເທດ ແຂວງຢຸນນານ, ອຳນາດການປົກຄອງກິ່ງແຂວງສິບສອງພັນນາ, ສະຖານກົງສູນໃຫຍ່ ແຫ່ງ ສປປ ລາວ ປະຈຳນະຄອນຄຸນໝິງ ໄດ້ຈັດງານແລກປ່ຽນວັດທະນະທຳ ລະຫວ່າງປະຊາຊົນຢູ່ຕາມຊາຍແດນ ລາວ-ຈີນ ຂຶ້ນໃນວັນທີ 20 ມິຖຸນານີ້ ທີ່ເມືອງຫຼ້າ ກິ່ງແຂວງສິບສອງພັນນາ ແຂວງຢຸນນານ ສປ ຈີນ. ຕາງໜ້າຝ່າຍລາວເຂົ້າຮ່ວມໂດຍ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້, ມີທ່ານ ປອງດອງ ປະຊາພັກດີ ກົງສູນໃຫຍ່ ແຫ່ງ ສປປ ລາວ ປະຈຳນະຄອນຄຸນໝິງ ພ້ອມດ້ວຍການນຳຈາກແຂວງບໍ່ແກ້ວ, ຫຼວງນໍ້າທາ, ຫຼວງພະບາງ, ອຸດົມໄຊ ແລະ ຜົ້ງສາລີ ເຂົ້າຮ່ວມ. ຝ່າຍ ສປ ຈີນ ມີ ທ່ານ ຢຽນໝິງເຕົ້າ ຮອງຫົວໜ້າສະມາຄົມມິດຕະພາບກັບຕ່າງປະເທດ ແຂວງຢຸນນານ ແລະ ທ່ານ ຊຸນລູ້ ຮອງເຈົ້າກິ່ງແຂວງສິບສອງພັນນາ ພ້ອມດ້ວຍພາກສ່ວນກ່ຽວຂ້ອງເຂ້າຮ່ວມ.

ໃນງານແລກປ່ຽນວັດທະນະທຳຄັ້ງນີ້ ໄດ້ມີພິທີເຊັນສັນຍາການຮ່ວມມືລະຫວ່າງສອງຝ່າຍຄື:

1/ ເມືອງຫລ້າ, ກິ່ງແຂວງສິບສອງພັນນາ ແຂວງຢູນນານ ແຫ່ງ ສປ ຈີນ ກັບ ເມືອງໄຊ, ແຂວງອຸດົມໄຊ ແຫ່ງ ສປປ ລາວ ເຊັ່ນ ໜັງສືສະແດງເຈດຈຳນົງ

ວ່າດ້ວຍ ການສ້າງຕັ້ງເມືອງມິດຕະພາບ

2/ ບ້ານມໍຊໍຊານ, ຕາແສງເມືອງປ້ານ ເມືອງຫຼ້າກິ່ງແຂວງສິບສອງພັນນາ ແຂວງຢູນນານ ສປ ຈີນ ກັບ ບ້ານມໍຊໍສານ ເມືອງບຸນເໜືອ ແຂວງຜົ້ງສາລີ ສປປ ລາວ ເຊັ່ນສັນຍາບ້ານມິດຕະພາບ

3/ ຫ້ອງການຊັບພະຍາກອນມະນຸດ ແລະປະກັນສັງຄົມເມືອງຫຼ້າ

ແຂວງຢູນນານແຫ່ງ ສປ ຈີນ ກັບ ຫ້ອງການແຮງງານ ແລະ ສະຫວັດດີການສັງຄົມເມືອງ

ບຸນເໜືອແຂວງຜົ້ງສາລີແຫ່ງ ສປປ ລາວເຊັ່ນ ສັນຍາວ່າດ້ວຍການຮ່ວມມືດ້ານແຮງງານ

ຂ້າມຊາຍແດນ

4/ ບໍລິສັດນິຄົມກະເສດຫຼີຫມີງເມືອງໄຮຈໍາກັດກັບບໍລິສັດ

ເຕົ້າໂຮມແລະແຈກຢາຍສິນຄ້າກະສິກໍາ ແລະ ໂລຈິສຕິກສາກົນ ລາວ ຈຳກັດ ເຊັ່ນສັນຍາຮ່າງສັນຍາຮ່ວມມືທາງດ້ານຍຸດທະສາດ.

ພ້ອມດຽວກັນນີ້, ກໍມີພິທີມອບ-ຮັບ ໂຄງການຊ່ວຍເຫຼືອໃຈປະສານໃຈ ສະມາຄົມຮ່ວມມືມິດຕະພາບ ແຂວງຢຸນນານ ມອບໃຫ້ ກົງສູນໃຫຍ່ ແຫ່ງ ສປປ ລາວ ປະຈຳນະຄອນຄຸນໝິງ; ອົງການມູນນິທິການພັດທະນາສັນຕິພາບ-ມິດຕະພາບ ສປ ຈີນ ມອບທຶນການສຶກສາໃຫ້ໂຮງຮຽນມັດທະຍົມເຕັກນິກວິຊາຊີບ ເມືອງຫຼ້າ ເປັນທຶນການສຶກສາ ຈີນ-ອາຊີອາຄະເນ ຊຶ່ງນັກສຶກສາລາວ ໄດ້ຮັບທຶນການສຶກສາ 5 ຄົນ ແລະ ກໍໄດ້ມອບແຜ່ນປ້າຍຄອບຄົວຕົວແບບຄູ່ຮ່ວມມືມິດຕະພາບ ລະຫວ່າງປະຊາຊົນເຂດຊາຍແດນ ຈີນ-ລາວ ອີກດ້ວຍ.

ຂ່າວ-ພາບ: ໄມຕຣີ