ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 25 ມິຖຸນາ ຜ່ານມາ,ຢູ່ ຕາຫຼຽນແຂວງຫຼຽວໜິງປະເທດຈີນ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ກ່າວຄຳປາໄສໃນກອງປະຊຸມປະຈຳປີບັນດາຜູ້ນຳໜ້າຄັ້ງທີ 15 ຂອງ ເວທີປາໄສ ເສດຖະກິດໂລກ ຢູ່ ຕາຫຼຽນ (WEF ຕາຫຼຽນ).

ຂ່າວລະບຸວ່າ, ທ່ານ ຟ້າມມິງຈິງ ກ່າວຄຳເຫັນໃນວາລະກອງປະຊຸມວ່າ: ເພື່ອມຸ່ງໄປເຖິງບັນດາຂົງເຂດເຕີບໂຕໃໝ່, ທ່ານສະເໜີໃຫ້ບັນດາຝ່າຍ ພ້ອມກັນສ້າງ, ປັບປຸງຄວາມໄວ້ເນື້ອເຊື່ອໃຈ, ສົ່ງເສີມການສົນທະນາ, ເສີມຂະຫຍາຍນ້ຳໃຈສາມັກຄີ, ຄວາມເປັນເອກະພາບ, ການຮ່ວມມື ແລະ ພັດທະນາ, ແກ້ໄຂບັນດາບັນຫາຢ່າງມີປະສິດທິຜົນ ໂດຍອີງໃສ່ກົດໝາຍ ແລະ ຮັບປະກັນຄວາມກົມກຽວລະຫວ່າງຜົນປະໂຫດຍຂອງບັນດາຝ່າຍກ່ຽວຂ້ອງ; ບໍ່ຫັນເປັນບັນຫາການເມືອງ ແລະ ມີການຈໍາແນກການປະພຶດສຳລັບຂົງເຂດວິທະຍາສາດເຕັກໂນໂລຊີ, ນະວັດຕະກຳທີ່ມີລັກສະນະທົ່ວໂລກ.ທ່ານປາຖະໜາວ່າWEF ແລະ ບັນດາຄູ່ຮ່ວມມືຈະຊຸກຍູ້ການຮ່ວມມືລະຫວ່າງພາກລັດ - ເອກະຊົນ, ເສີມຂະຫຍາຍບົດບາດຂອງຜູ້ນຳໜ້າໃນການຊີ້ນຳ, ນຳພາການພັດທະນາ ແລະ ວິວັດການສ້າງໂຄງປະກອບເສດຖະກິດຂອງບັນດາປະເທດ, ພາກພື້ນ, ທົ່ວໂລກ, ໂດຍສະເພາະແມ່ນ3 ຂົງເຂດສຳຄັນຄື:ສ້າງລະບຽບການເສດຖະກິດການຕະຫຼາດ;ສຸມໃສ່ການພັດທະນາລະບົບໂຄງປະກອບພື້ນຖານໂຄງລ່າງຍຸດທະສາດ;ບຳລຸງສ້າງ, ພັດທະນາແຫຼ່ງຊັບພະຍາກອນມະນຸດ.

ທ່ານ ຟ້າມມິງຈິງ ຍັງໃຫ້ຮູ້ວ່າ: ຫວຽດນາມ ພວມສືບຕໍ່ປະກອບສວນຢ່າງເປັນເຈົ້າການ ແລະ ຕັ້ງໜ້າ ເພື່ອປະຊາຄົມອາຊຽນ ໝັ້ນຄົງເຂັ້ມແຂງ, ຮອບດ້ານ, ສາມັກຄີ, ຮ່ວມມື, ເປັນເອກະພາບໃນຄວາມຫຼາຍຮູບຫຼາຍສີ; ພ້ອມກັບ ອາຊຽນ ສືບຕໍ່ສົມທົບກັນຢ່າງແໜ້ນແຟ້ນກັບ ຈີນ, ເວທີປາໄສເສດຖະກິດໂລກ ແລະ ຄູ່ຮ່ວມມືຊຸກຍູ້ບັນດາກຳລັງໜູນເຕີບໂຕໃໝ່ຢ່າງເຂັ້ມແຂງ; ພ້ອມດຽວກັນນັ້ນ, ຍັງພະຍາຍາມຮັກສາ ແລະ ປັບປຸງສະພາບແວດລ້ອມແຫ່ງສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກຢ່າງບໍ່ຢຸດຢັ້ງ.