ຂ່າວຕ່າງປະເທດລາຍງານ ໃນວັນທີ 25 ມິຖຸນາ ຜ່ານມາວ່າ: ອັງກິດຈັດການແຂ່ງຂັນຈັບຂີ້ກະເດືອນຊີງແຊັມໂລກ ໂດຍມີຜູ້ໃຫ້ຄວາມສົນໃຈເຂົ້າຮ່ວມຊີງແຊັມຈຳນວນຫຼວງຫຼາຍ.

ຜູ້ເຂົ້າຮ່ວມແຂ່ງຂັນຫຼາຍຮ້ອຍຄົນ ພ້ອມດ້ວຍອຸປະກອນ ແລະ ເຄື່ອງມືຫຼາກຫຼາຍຊະນິດ ເຂົ້າຮ່ວມການແຂ່ງຂັນ World Worm Charming Championship ການແຂ່ງຂັນຈັບຂີ້ກະເດືອນປະຈຳປີ ທີ່ຈັດຂຶ້ນໃນເມືອງເຊສເຊຍ ຂອງອັງກິດ ໃນວັນທີ 22 ມິຖຸນາ ຜ່ານມາ.

ຜູ້ເຂົ້າຮ່ວມແຂ່ງຂັນຈະໄດ້ຮັບອະນຸຍາດໃຫ້ຈັບຂີ້ກະເດືອນເທິງໜ້າດິນຂອງເດີ່ນຫຍ້າທີ່ແບ່ງອອກເປັນໂຊນນ້ອຍໆຂອງແຕ່ລະຄົນ ພາຍໃນໄລຍະເວລາ 30 ນາທີ ໃນການຫຼອກລໍ້ ແລະ ຈັບຂີ້ກະເດືອນຂຶ້ນມາດ້ານເທິງໃຫ້ໄດ້ຫຼາຍທີ່ສຸດ ຈຶ່ງຈະຊະນະ ແລະ ໄດ້ຮັບລາງວັນໄປຄອງ.

ຜູ້ເຂົ້າຮ່ວມແຂ່ງຂັນບໍ່ສາມາດໃຊ້ຢາ, ສານກະຕຸ້ນ ຫຼື ເທນໍ້າລົງໃນດິນ ເພື່ອໃຫ້ຂີ້ກະເດືອນຂຶ້ນມາເທິງໜ້າດິນໄດ້ ແຕ່ສາມາດໃຊ້ເຄື່ອງດົນຕີຊະນິດເປົ່າເຊັ່ນ: Didgeridoosໄປຈົນເຖິງແຊກໂຊໂຟນ, ສ້ອມ, ໝໍ້ ແລະ ກະທະ ຫຼື ໃຊ້ບົດເພງຂັບກ່ອມ.

ສ່ວນອີກວິທີໜຶ່ງທີ່ເຫັນວ່າປະສົບຄວາມສຳເລັດຄືການເຄາະສ້ອມເຮັດສວນທີ່ປັກລົງໄປໃນພື້ນຫຍ້າ ເລິກປະມານ 15 ຊັງຕີແມັດ ແຕ່ຈະບໍ່ໄດ້ຮັບອະນຸຍາດໃຫ້ຂຸດດິນຂຶ້ນມາເດັດຂາດ.ໂດຍຜູ້ຊະນະໄດ້ແກ່ ອະເລັກ ກອດຟຣີ ທີ່ສາມາດຫຼອກລໍ້ຂີ້ກະເດືອນຂຶ້ນມາເທິງໜ້າດິນໄດ້ 195 ໂຕ ດ້ວຍການໃຊ້ສ້ອມເຄາະໃຫ້ພື້ນດິນສັ່ນສະເທືອນ. ຂະນະທີ່ສະຖິຕິໂລກຍັງເປັນຂອງ ທອມ ຊັບເຟີລບໍແຮມ ຊຶ່ງເຄີຍຈັບຂີ້ກະເດືອນໄດ້ເຖິງ 511 ໂຕ ໃນການແຂ່ງຂັນເມື່ອປີ 1980.