ກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍອາຊະຍາກໍາຂ້າມຊາດ ຄັ້ງທີ 24 ໄດ້ເປີດຂຶ້ນໃນວັນທີ 26 ມິຖຸນາ ນີ້,ພາຍໃຕ້ການເປັນປະທານຂອງທ່ານ ພົຕ ສຸລິນະ ແກ້ວປະເສີດ ຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ(ປກສ)ຫົວໜ້າເຈົ້າໜ້າທີ່ອາວຸໂສ ສປປ ລາວ ຮັບຜິດຊອບວຽກງານຕ້ານອາຊະຍາກໍາຂ້າມຊາດ;ມີທ່ານ ພົທ ກົງທອງ ພົງວິຈິດ ຮອງລັດຖະມົນຕີກະຊວງປກສ, ມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຫົວໜ້າຄະນະຜູ້ແທນຕີມໍແລັດສະເຕ, ຮອງເລຂາທິການໃຫຍ່ອາຊຽນ ດ້ານການເມືອງ-ຄວາມໝັ້ນຄົງ ພ້ອມດ້ວຍຄະນະຜູ້ແທນອາຊຽນ ເຂົ້າຮ່ວມ.

ທ່ານ ພົຕ ສຸລິນະ ແກ້ວປະເສີດ ໄດ້ກ່າວວ່າ: ກອງປະຊຸມເຈົ້າໜ້າທີ່ອາວຸໂສ ວ່າດ້ວຍການຕ້ານອາຊະຍາກໍາຂ້າມຊາດເປັນກົນໄກໜຶ່ງທີ່ມີປະສິດທິພາບໃນການຮ່ວມມືສະ

ກັດກັ້ນ ແລະ ຕ້ານອາຊະຍາກໍາຂ້າມຊາດໃນພາກພື້ນ ຊຶ່ງໃນແຕ່ລະປີບັນດາປະເທດສະມາຊິກອາຊຽນຈະໄດ້ຜັດປ່ຽນກັນຈັດກອງປະຊຸມປຶກສາຫາລືແລກປ່ຽນທັດສະນະ, ບົດ

ຮຽນໃນການແກ້ໄຂບັນຫາດັ່ງກ່າວ. ພ້ອມກັນນັ້ນ, ກໍຈະໄດ້ສັງເກດຕີລາຄາຄືນການຈັດຕັ້ງປະຕິບັດແຜນວຽກ, ບັນດາໂຄງການຮ່ວມມື ທີ່ໄດ້ເປັນເອກະພາບກັນໃນປີຜ່ານມາ ແລະ ປຶກສາຫາລືການຮ່ວມມືໃນຕໍ່ໜ້າ. ໃນໄລຍະ 1 ປີຜ່ານມາສັງເກດເຫັນວ່າ ຫຼາຍກິດຈະກໍາໄດ້ຮັບການຈັດຕັ້ງປະຕິບັດສໍາເລັດຕາມລະດັບຄາດໝາຍ ເປັນຕົ້ນ ການຈັດກອງປະຊຸມສໍາມະນາຝຶກອົບຮົມຍົກລະດັບຄວາມຮູ້-ຄວາມສາມາດຂອງເຈົ້າໜ້າທີ່ປະຕິບັດກົດໝາຍ. ນອກນັ້ນ, ຕາງໜ້າເຈົ້າໜ້າທີ່ອາວຸໂສອາຊຽນ ຮັບຜິດຊອບວຽກງານຕ້ານອາຊະຍາກໍາຂ້າມຊາດ ຍັງໄດ້ເຂົ້າຮ່ວມກອງປະຊຸມ ແລະກິດຈະກໍາທີ່ກ່ຽວຂ້ອງຂະແໜງການຕ່າງໆຈັດຂຶ້ນ ຊຶ່ງເປັນການຮັດແໜ້ນສາຍພົວພັນຮ່ວມມື ລະຫວ່າງຂະແໜງການກ່ຽວຂ້ອງຂອງອາຊຽນ ໃນການສະກັດກັ້ນ ແລະ ແກ້ໄຂບັນຫາອາຊະຍາກໍາຂ້າມຊາດ.

ໂອກາດດັ່ງກ່າວ,ທ່ານ ພົທ ກົງທອງ ພົງວິຈິດ ໄດ້ຂຶ້ນກ່າວເປີດກອງປະຊຸມເຈົ້າ

ໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກາຂ້າມຊາດ ຄັ້ງທີ 24 ຢ່າງເປັນທາງການວ່າ: ໃນປີ 2024 ສປປ ລາວ ໄດ້ຮັບກຽດເປັນປະທານອາຊຽນ ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ໂດຍອີງໃສ່ຄໍາຂວັນດັ່ງກ່າວ ສປປ ລາວ ໄດ້ກໍານົດ 9 ບຸລິມະສິດ ໃນການເປັນປະທານອາຊຽນຂອງຕົນ ໃນນັ້ນ 4 ບຸລິມະສິດ ຕິດພັນກັບການເຊື່ອມຈອດ ແລະ 5 ບຸລິມະສິດ ຕິດພັນກັບຄວາມເຂັ້ມແຂງອາຊຽນ ແນໃສ່ຮັບປະກັນຄວາມພະຍາຍາມຮ່ວມກັນຂອງອາຊຽນ ໃນການສ້າງຄວາມເຂັ້ມແຂງປະຊາຄົມອາຊຽນ ເພື່ອນໍາໃຊ້ກາລະໂອກາດ ແລະ ແກ້ໄຂສິ່ງທ້າທາຍໃນປັດຈຸບັນ ແລະ ຕໍ່ໜ້າຢ່າງມີປະສິດທິພາບ. ສໍາລັບກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ເປັນກົນໄກໜຶ່ງທີ່ສໍາຄັນ, ມີພາລະບົດບາດຊ່ວຍກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ, ຈັດຕັ້ງປະຕິບັດ, ຕິດຕາມ ແລະ ປະສານສົມທົບການຕົກລົງ ຈາກກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ແລະ ປະຕິບັດຕາມໜ້າທີ່ອື່ນໆ ຕາມການມອບໝາຍ. ພ້ອມນັ້ນ, ກໍມີໜ້າທີ່ສ້າງນະໂຍບາຍ, ຍຸດທະສາດ ແລະ ແຜນການ, ແຜນງານ, ໂຄງການ ແລະ ປະສານງານສົມທົບຈັດຕັ້ງປະຕິບັດ ວຽກງານຕ້ານອາຊະຍາກໍາຂ້າມຊາດ ໃນພາກພື້ນອາຊຽນ.

ໃນປັດຈຸບັນ ສະພາບການກໍ່ອາຊະຍາກໍາປະເພດຕ່າງໆ ເປັນຕົ້ນ ແມ່ນການກໍ່ການຮ້າຍ, ການຄ້າຢາເສບຕິດ, ການຄ້າມະນຸດ, ການຄ້າອາວຸດເສິກ, ອາຊະຍາກໍາທາງຄອມພິວເຕີ ແລະ ອື່ນໆ ໃນພາກພື້ນ ແລະ ໃນໂລກ ຍັງມີທ່າອ່ຽງເພີ່ມຂຶ້ນ, ມີຜົນກະທົບຢ່າງໃຫຍ່ຫຼວງຕໍ່ການດໍາລົງຊີວິດຂອງປະຊາຊົນ ກໍຄື ການພັດທະນາເສດຖະກິດ-ສັງຄົມ ຂອງບັນດາປະເທດໃນໂລກ. ຕໍ່ກັບສະພາບການດັ່ງກ່າວ ມີຄວາມຈໍາເປັນທີ່ສຸດ ທີ່ກົນໄກກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກໍາຂ້າມຊາດທີ່ຈະຕ້ອງໄດ້ມີການປະຊຸມປຶກສາຫາລືຊອກຫາວິທີປ້ອງກັນສະກັດກັ້ນອາຊະຍາກໍາຂ້າມຊາດ ຢ່າງເປັນປົກກະຕິ ແລະ ຕໍ່ເນື່ອງ. ສະນັ້ນ, ໃນກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍອາຊະຍາກໍາຂ້າມຊາດ ຄັ້ງທີ 24 ແລະ ກອງປະຊຸມອື່ນໆທີ່ກ່ຽວຂ້ອງ ຊຶ່ງຈະໄດ້ຈັດຂຶ້ນໃນລະຫວ່າງວັນທີ 26-28 ມິຖຸນາ 2024 ໃນກອງປະຊຸມສະເໜີໃຫ້ຄະນະຜູ້ແທນພິຈາລະນາບາງບັນຫາ ເປັນຕົ້ນແມ່ນ: ປຶກສາຫາລືແລກປ່ຽນທັດສະນະ ແລະ ປະເມີນສະພາບການ, ທ່າອ່ຽງຂອງບັນຫາອາຊະຍາກໍາຂ້າມຊາດໃນພາກພື້ນ ກໍຄື ໃນໂລກຢ່າງກົງໄປ-ກົງມາ, ຖືກຕ້ອງຕາມຄວາມເປັນຈິງ ເພື່ອເປັນບ່ອນອີງໃຫ້ແກ່ການຄົ້ນຄວ້າກໍານົດມາດຕະການທີ່ເໝາະສົມ ເພື່ອແກ້ໄຂບັນຫາດັ່ງກ່າວ; ແລກປ່ຽນບົດຮຽນອັນດີຊຶ່ງກັນ ແລະ ກັນ ໃນການແກ້ໄຂບັນຫາອາຊະຍາກໍາຂ້າມຊາດ ຢູ່ໃນແຕ່ລະປະເທດສະມາຊິກອາຊຽນ ໃນໄລຍະຜ່ານມາ; ຄົ້ນຄວ້າປັບປຸງບັນດາກົນໄກ ແລະ ເຄື່ອງມືຕ່າງໆ ທີ່ຢູ່ໃນຄວາມຮັບຜິດຊອບຂອງກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍອາຊະຍາກໍາຂ້າມຊາດ ໃຫ້ແທດເໝາະກັບສະພາບຕົວຈິງໃນປັດຈຸບັນ; ຄົ້ນຄວ້າສ້າງຂໍ້ລິເລີ່ມໃໝ່ທີ່ຈໍາເປັນ ເພື່ອແກ້ໄຂບັນຫາອາຊະຍາກໍາຂ້າມຊາດທີ່ພົ້ນເດັ່ນໃນພາກພື້ນ ເປັນຕົ້ນ ບັນຫາຢາເສບຕິດ, ຄ້າມະນຸດ, ການກໍ່ການຮ້າຍ, ອາຊະຍາກໍາທາງຄອມພິວເຕີ, ການຄ້າອາວຸດ ແລະ ອື່ນໆ; ເພີ່ມທະວີການຮ່ວມມືແລກປ່ຽນຂໍ້ມູນຂ່າວສານ ທີ່ພົວພັນເຖິງອາຊະຍາກໍາຂ້າມຊາດ ລະຫວ່າງບັນດາປະເທດສະມາຊິກອາຊຽນ ໃຫ້ວ່ອງໄວທັນກັບສະພາບການ; ເພີ່ມທະວີພັດທະນາຂີດຄວາມສາມາດ ຂອງເຈົ້າໜ້າທີ່ປະຕິບັດກົດໝາຍທີ່ກ່ຽວຂ້ອງ ຂອງປະເທດສະມາຊິກອາຊຽນ ເພື່ອຕ້ານອາຊະຍາກໍາຂ້າມຊາດ; ຍົກລະດັບການພົວພັນຮ່ວມມື, ຍາດແຍ່ງການຊ່ວຍເຫຼືອທາງດ້ານເຕັກນິກວິຊາການ ແລະ ທຶນຮອນ ເພື່ອຍົກລະດັບຂີດຄວາມສາມາດຂອງອາຊຽນ ໃນການຕ້ານອາຊະຍາກໍາຂ້າມຊາດ ຈາກບັນດາປະເທດຄູ່ຮ່ວມເຈລະຈາ ແລະ ອົງການຈັດຕັ້ງສາກົນທີ່ກ່ຽວຂ້ອງ.

ຂ່າວ-ພາບ: ກົມສື່ມວນຊົນ ປກສ