ຂ່າວສານຫວຽດນາມລາຍງານວ່າ: ຂໍ້ມູນທີ່ເຜີຍແຜ່ຈາກພາກລັດ ແລະ ເອກະຊົນ ທີ່ເປີດເຜີຍໃນວັນທີ 26 ມິຖຸນາ ຜ່ານມາສະແດງໃຫ້ເຫັນວ່າ: ລາຄາເຂົ້າສານໃນຮ້ານສັບພະສິນຄ້າ ຢູ່ ຍີ່ປຸ່ນ ເພີ່ມຂຶ້ນຢ່າງຫຼວງຫຼາຍໃນຕົ້ນເດືອນມິຖຸນາ.
ຂ່າວລະບຸວ່າ: ບັນດາຜູ້ຊ່ຽວຊານກ່າວວ່າ, ສາເຫດແມ່ນຍ້ອນການສະໜອງທີ່ຈໍາກັດເນື່ອງຈາກອຸນຫະພູມທີ່ເພີ່ມສູງຂຶ້ນໃນລະດູຮ້ອນທີ່ຜ່ານມາ ແລະ ຄວາມຕ້ອງການເພີ່ມຂຶ້ນຍ້ອນການທ່ອງທ່ຽວໃນປະເທດພວມມີການຂະຫຍາຍຕົວ. ອີງຕາມຜູ້ໃຫ້ບໍລິການດ້ານຂໍ້ມູນ True Data Inc., ລາຄາເຂົ້າຖົງ 5 ກິໂລ ມີລາຄາ 1.978 ເຢນ (12 ໂດລາ) ໃນລະຫວ່າງວັນທີ 3 ຫາ 9 ມິຖຸນາ ຊຶ່ງເປັນລະດັບສູງສຸດໃນຮອບ 2 ປີຜ່ານມາ. ປີ 2023 ເປັນປີທີ່ລຳບາກສຳລັບຜູ້ຜະລິດເຂົ້າຂອງຍີ່ປຸ່ນ ຍ້ອນສະພາບອາກາດທີ່ຮ້ອນອົບເອົ້າໃນລະດູຮ້ອນ. ສະພາບອາກາດທີ່ຮ້າຍແຮງເຮັດໃຫ້ການເກັບກ່ຽວເຂົ້າເພື່ອສະໜອງຕາມຄວາມຕ້ອງການສະບຽງອາຫານໄດ້ຫຼຸດລົງ 91.000 ໂຕນ ເມື່ອທຽບໃສ່ປີຜ່ານມາຍັງເຫຼືອ 6,61 ລ້ານໂຕນ.
ບໍລິສັດຜູ້ຄ້າຂາຍເຂົ້າສານລາຍໃຫຍ່ແຫ່ງໜຶ່ງ ໃຫ້ຮູ້ວ່າ: ຕະຫຼາດເຂົ້າໄດ້ຂາດຄວາມດຸ່ນດ່ຽງລະຫວ່າງການສະໜອງ ແລະ ຄວາມຕ້ອງການຕັ້ງແຕ່ທ້າຍປີ 2023 ເປັນຕົ້ນມາ, ໂດຍສັງເກດໄດ້ວ່າມີກໍລະນີການຢຸດສະງັກໃນການສະໜອງເຂົ້າຫຼາຍຄັ້ງ.
ຕາມການຄາດຄະເນຂອງກະຊວງກະສິກຳ, ປ່າໄມ້ ແລະ ການປະມົງ ຍີ່ປຸ່ນ ໃຫ້ຮູ້ວ່າ: ການເກັບກ່ຽວເຂົ້າເພື່ອຕອບສະໜອງຄວາມຕ້ອງການສະບຽງອາຫານທີ່ຈຳເປັນໃນປີ 2024 ຈະບັນລຸປະມານ 6,69 ລ້ານໂຕນ. ຍີ່ປຸ່ນ ມີນັກທ່ອງທ່ຽວເພີ່ມຂຶ້ນຍ້ອນການຍົກເລີກຂໍ້ຈໍາກັດການເດີນທາງເນື່ອງຈາກພະຍາດ ໂຄວິດ-19 ແລະ ເງິນເຢນທີ່ອ່ອນຄ່າລົງ.
ຕາມບົດລາຍງານປີ 2023 ກ່ຽວກັບນັກທ່ອງທ່ຽວຕ່າງປະເທດ ຂອງອົງການທ່ອງທ່ຽວຍີ່ປຸ່ນ ໃຫ້ຮູ້ວ່າ: ການກິນອາຫານຍີ່ປຸ່ນ ແມ່ນລາຍການອັນດັບທໍາອິດທີ່ນັກທ່ອງທ່ຽວຕ່າງປະເທດໄດ້ຂຶ້ນແຜນໄວ້ໃນລາຍການທ່ອງທ່ຽວ ຢູ່ ຍີ່ປຸ່ນ.