ຂ່າວສານຊີອາໄອລາຍງານໃນວັນທີ 27 ມິຖຸນານາວ່າ: ວັນທີ 26 ມິຖຸນານີ້ເປັນວັນສາກົນຕ້ານຢາເສບຕິດ. ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ກ່າວຄຳປາໄສໃນວັນດັ່ງກ່າວ ໂດຍຮຽກຮ້ອງໃຫ້ປະຊາຄົມໂລກຈົ່ງເພີ່ມທະວີການນຳໃຊ້ມາດຕະການປ້ອງກັນ ເພື່ອລຶບລ້າງບັນຫາການນຳໃຊ້ຢາເສບຕິດທົ່ວທີບ ແລະ ລັກລອບຂົນສົ່ງຊື້-ຂາຍ.
ທ່ານກູເຕີເຣັສກ່າວວ່າ: ໃນແຕ່ລະປີ, ທົ່ວໂລກມີຫຼາຍແສນຄົນໄດ້ເສຍຊີວິດ ຍ້ອນເສບຢາເສບຕິດເກີນຂະໜາດ, ຢາເສບຕິດໄດ້ເສື່ອມກັດສຸຂະພາບ ແລະ ຄວາມສຸກຂອງຄົນທັງຫຼາຍ ແລະ ຍັງເປັນປັດໄຈທີ່ເຮັດໃຫ້ອາດຊະຍາກຳ ແລະ ການໃຊ້ຄວາມຮຸນແຮງໃນທົ່ວໂລກເພີ່ມຂຶ້ນອີກ.
ທ່ານກູເຕີເຣັສກ່າວຕື່ມວ່າ: ຫົວຂໍ້ຂອງວັນສາກົນຕ້ານຢາເສບຕິດໃນປີນີ້ແມ່ນ “ມີຫຼັກຖານໜັກແໜ້ນ: ລົງທຶນເຂົ້າໃນການປ້ອງກັນ”, ການທັບມ້າງການໝູນວຽນຂອງຄວາມທຸກທໍລະມານທີ່ເກີດຈາກຢາເສບຕິດ ຕ້ອງເລີ່ມຕົ້ນຈາກແຫຼ່ງທີ່ມາ, ກ່ອນທີ່ຢາເສບຕິດສ້າງຄວາມທໍລະມານຕໍ່ມະນຸດ ກໍຄວນລົງທຶນເຂົ້າໃນການປ້ອງກັນ. ຈາກຍຸດທະສາດການຟື້ນຟູສຸຂະພາບ ແລະກັບຄືນສູ່ສັງຄົມ ຮອດຂະບວນການສຶກສາສາທາລະນະສຸກ ແລະ ຕະຫຼອດຮອດການເພີ່ມການລົງທຶນເຂົ້າໃນການປ້ອງກັນ, ປິ່ນປົວ ແລະ ມາດຕະການຫຼຸດຜ່ອນຜົນຮ້າຍຈາກຢາເສບຕິດ, “ການປ້ອງກັນນັ້ນ ແມ່ນມີຜົນຕອບຮັບທີ່ດີ”.
ອົງການສະຫະປະຊາຊາດເພື່ອຕ້ານຢາເສບຕິດ ແລະ ອາດຊະຍາກຳ ຫຼື UNODC ໄດ້ເປີດເຜີຍບົດລາຍງານໃນວັນທີ 26 ມິຖຸນາ ຜ່ານມາ ໂດຍສະແດງໃຫ້ເຫັນວ່າ: ໃນປີ 2022, ຢູ່ທົ່ວໂລກມີປະມານ 292 ລ້ານຄົນນຳໃຊ້ຢາເສບຕິດ, ເພີ່ມຂຶ້ນ 20% ເມື່ອທຽບໃສ່ໄລຍະ 10 ປີກ່ອນ, ບັນຫາຢາເສບຕິດໃນທົ່ວໂລກພວມສືບຕໍ່ຮຸນແຮງຂຶ້ນ.