ໂດຍ: ໄມຕຣີ

ການດຳລົງຊີວິດຂອງປະຊາຊົນບາງຊົນເຜົ່າໃນເຂດເນີນພູ ທີ່ມີວັດທະນະທຳ ແລະ ເປັນເອກະລັກຂອງໃຜ ລາວ, ຮັກສາໄດ້ຮີດຄອງປະເພນີດັ່ງເດີມ ບໍ່ວ່າຈະເປັນການປາກເວົ້າ, ການຕ້ອນຮັບແຂກໃກ້ໄກ ແລະ ການນຸ່ງຖືແບບຊົນເຜົ່າ ຊຶ່ງເຫັນແລ້ວເຮັດໃຫ້ມີຄວາມປະທັບໃຈ ແລະ ໜ້າຊື່ນຊົມ ຄືດັ່ງບ້ານນາແຫຼ້.

ບ້ານແຫຼ້ ເປັນບ້ານໜຶ່ງທີ່ຂຶ້ນກັບເມືອງມ່ານ ກິ່ງແຂວງສິບສອງປັນນາ ມົນທົນຢູນນານ ສປ ຈີນ, ມີ 90 ກວ່າຫຼັງຄາເຮືອນ ເປັນບ້ານທີ່ມີເອກະລັກສະເພາະ ແລະ ມີວັດທະນະທຳທີ່ໂດດເດັ່ນ ຊຶ່ງສະແດງອອກທາງດ້ານການປາກເວົ້າ ແລະ ການນຸ່ງຖື, ເປັນບ້ານຊົນເຜົ່າໄຕລື້ ໃຊ້ພາສາລື້ ແລະ ພາສາຈີນ, ລາຍຮັບຫຼັກຂອງປະຊາຊົນແມ່ນມາຈາກການປູກຝັງ. ໂດຍສ່ວນຫຼາຍແມ່ນເຮັດສວນຢາງພາລາ ແລະ ເຮັດສວນເປັນອາຊີບສຳຮອງ ເຊັ່ນ: ສວນຖົ່ວ, ສວນໝາກແຕງ ແລະ ສວນຜັກ. ນອກຈາກນີ້, ຍັງມີລາຍຮັບສຳຮອງ ກໍຄືການຂາຍເຄື່ອງໃຫ້ນັກທ່ອງທ່ຽວທີ່ໄປທ່ຽວຊົມບ້ານດັ່ງກ່າວ ຊຶ່ງທາງຄະນະອຳນາດການປົກຄອງບ້ານຈະຈັດງານຕະຫຼາດນັດຂຶ້ນ 2 ຄັ້ງຕໍ່ອາທິດ ເພື່ອສ້າງລາຍຮັບໃຫ້ແກ່ປະຊາຊົນພາຍໃນບ້ານ ພາຍໃນງານຈະມີການສະແດງສີລະປະວັດທະນະທຳຂອງຊົນເຜົ່າລື້ ຊຶ່ງມີການຮ້ອງເພງເຜົ່າລື້, ເພງລາວ, ເພງຈີນ ປະປົນກັນໄປແຕ່ລະວາລະ ແລະ ຍັງມີການຟ້ອນແບບລາວປະສົມເຜົ່າລື້ ແລະ ຟ້ອນພື້ນເມືອງຈີນ ຊຶ່ງມີມວນຊົນຈາກພາຍໃນ ແລະ ຕ່າງແດນ ເຂົ້າຊົມຢ່າງຫຼວງຫຼາຍ.

ນອກຈາກນີ້, ພາຍໃນງານດັ່ງກ່າວຍັງມີການຂາຍເຄື່ອງຕາມເສັ້ນທາງທີ່ເຈົ້າໜ້າທີ່ຈັດສັນໃຫ້ ແລະ ແມ່ຄ້າທີ່ມາຂາຍເຄື່ອງໃນງານນີ້ແມ່ນປະຊາຊົນພາຍໃນບ້ານແຫຼ້. ນອກນັ້ນ, ຍັງມີແມ່ຄ້າຄົນລາວ ຊຶ່ງມາຈາກແຂວງຫຼວງນ້ຳທາເປັນສ່ວນໃຫຍ່ ເຄື່ອງທີ່ນຳເອົາໄປຂາຍນັ້ນກໍຄື: ຕຳໝາກຫຸ່ງ, ປີ້ງໄກ່, ປີ້ງຊີ້ນໝູ, ເຂົ້າໜົມ ແລະ ເຄື່ອງດອງ ຂອງສົ້ມ, ຢາພື້ນເມືອງ ແລະ ເຄື່ອງໃຊ້ຕ່າງໆ.

ຕາມຂອບເຂດເຮືອນຊານບ້ານຊ່ອງຂອງບ້ານນາແຫຼ້ ມີຄວາມສະອາດສວຍສົດງົດງາມ ແລະ ມີການຕົບແຕ່ງເອ້ຢ້ອງແບບຊົນເຜົ່າ, ລັກຊະນະຂອງເຮືອນ ແມ່ນມີກ້ອງລ່າງ ດ້ານເທິງໃຊ້ຢູ່ອາໄສ ສ່ວນດ້ານລຸ່ມເປັນຮ້ານອາຫານ ເພື່ອຮັບແຂກທີ່ມາຢ້ຽມຢາມ ແລະ ທ່ຽວຊົມງານຕະຫຼາດນັດດັ່ງກ່າວ, ສິ່ງທີ່ປະທັບໃຈທີ່ສຸດກໍຄືການຕ້ອນຮັບຂອງປະຊາຊົນພາຍໃນບ້ານດັ່ງກ່າວ ແລະ ຜູ້ເຖົ້າຈະມັດແຂນອວຍພອນວ່າ: “ໄປດີມາລອດ ໄປປອດມາໄສ ຢູ່ດີກິນຫວານເຄາະໄກຢ່າເຂົ້າມາໃກ້ ເຄາະໃກ້ຢ່າເຂົ້າມາໄຂ່ວ” ຊຶ່ງຄຳເວົ້ານີ້ເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງແດນຊື່ນຊົມ ແລະ ຖ້າມີໂອກາດຢາກຈະກັບໄປຢ້ຽມຢາມອີກຄັ້ງ.