ໃນວັນທີ 1 ກໍລະກົດ ນີ້, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ຈູລີ ບີດຊ໋ອບ (Julie Bishop)ຜູ້ຕາງໜ້າພິເສດກ່ຽວກັບມຽນມາ ຂອງເລຂາທິການໃຫຍ່ອົງການສະຫະປະຊາຊາດ ໃນໂອກາດທີ່ເດີນທາງມາຢ້ຽມຢາມເຮັດວຽກຢູ່ ສປປ ລາວ.
ໃນໂອກາດດັ່ງກ່າວ ທ່ານ ສະເຫຼີມໄຊກົມມະສິດ ໄດ້ສະແດງຄວາມຊົມເຊີຍຢ່າງຈິງໃຈ ຕໍ່ ທ່ານ ນາງ ຈູລີ ບີດຊ໋ອບ ທີ່ໄດ້ຮັບການແຕ່ງຕັ້ງເປັນຜູ້ຕາງໜ້າພິເສດກ່ຽວກັບມຽນມາຂອງເລຂາທິການໃຫຍ່ອົງການສະຫະປະຊາຊາດ ແລະ ຕີລາຄາສູງບົດບາດສຳຄັນດັ່ງກ່າວ.ທ່ານ ນາງ ຈູລີ ບີດຊ໋ອບ ໄດ້ສະແດງຄວາມຊົມເຊີຍຕໍ່ຄວາມພະຍາຍາມຂອງ ສປປ ລາວ ໃນນາມປະທານອາຊຽນປີ 2024 ໃນການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນຳອາຊຽນ. ທັງສອງຝ່າຍ ຈະປະສານງານກັນຢ່າງໃກ້ຊິດ. 

ນອກຈາກນີ້, ຜູ້ຕາງໜ້າພິເສດຂອງເລຂາທິການໃຫຍ່ອົງການສະຫະປະຊາຊາດກ່ຽວກັບມຽນມາ ຍັງໄດ້ພົບປະກັບທ່ານ ອາລຸນແກ້ວ ກິດຕິຄຸນຜູ້ຕາງໜ້າພິເສດກ່ຽວກັບມຽນມາຂອງປະທານອາຊຽນ ຂອງ ສປປ ລາວ ໃນປີ 2024 ເພື່ອປຶກສາຫາລື ແລະ ຮັດແໜ້ນການປະສານງານກັນ ໃນການຈັດຕັ້ງປະຕິບັດໜ້າທີ່ຂອງຕົນ.
ຂ່າວ: ກະຊວງການຕ່າງປະເທດ