ຂ່າວຕ່າງປະເທດລາຍງານ ໃນວັນທີ 2 ກໍລະກົດ ຜ່ານມາວ່າ: ສ ເກົາຫຼີ ວາງແຜນສ້າງຕັ້ງກະຊວງຂຶ້ນມາໃໝ່ຄື:ກະຊວງປະຊາກອນ ເພື່ອແກ້ບັນຫາປະຊາກອນທີ່ຫຼຸດລົງ ແລະ ສັງຄົມຜູ້ອາຍຸສູງ ໂດຍສະເພາະ.
ສ ເກົາຫຼີ ເປັນໜຶ່ງໃນປະເທດທີ່ກຳລັງປະເຊີນກັບວິກິດອັດຕາປະຊາກອນເກີດໃໝ່ຫຼຸດລົງ ແລະ ປະຊາກອນອາຍຸສູງເພີ່ມຂຶ້ນຢ່າງໄວວາ ຊຶ່ງເປັນຄວາມທ້າທາຍຮ້າຍແຮງທີ່ສຸດທີ່ ສ ເກົາຫຼີ ເຄີຍປະເຊີນ ແລະ ຜ່ານມາລັດຖະບານໄດ້ພະຍາຍາມຫາທາງແກ້ໄຂ ລວມເຖິງສະໜັບສະໜູນໃຫ້ຄົນມີລູກຫຼາຍຂຶ້ນ ແຕ່ກໍບໍ່ໄດ້ຜົນເທົ່າທີ່ຄວນ.
ໃນວັນທີ 1 ກໍລະກົດ ຜ່ານມາ, ລັດຖະບານ ສ ເກົາຫຼີ ໄດ້ປະກາດແຜນການໃໝ່ໃນການແກ້ໄຂບັນຫາດັ່ງກ່າວໂດຍການສ້າງຕັ້ງກະຊວງຂຶ້ນມາໃໝ່ ເພື່ອຮັບມື ແລະ ແກ້ໄຂວິກິດນີ້ແບບສະເພາະເຈາະຈົງ.
ລັດຖະບານ ສ ເກົາຫຼີ ເປີດເຜີຍແຜນການດັ່ງກ່າວ ຫຼັງການປະຊຸມລະດັບສູງກັບພັກລັດຖະບານ ໂດຍລະບຸວ່າ: ຈະມີການສະເໜີຮ່າງພະຣາຊບັນຍັດອົງກອນພາກລັດທີ່ແກ້ໄຂແລ້ວ ເພື່ອເປີດກະຊວງໃໝ່ພາຍໃນເດືອນກໍລະກົດ 2024 ນີ້.ເມື່ອຈັດຕັ້ງຂຶ້ນແລ້ວ ກະຊວງດັ່ງກ່າວຈະເນັ້ນກົນລະຍຸດ ແລະ ການວາງແຜນສຳລັບບັນຫາດ້ານປະຊາກອນ ເຊັ່ນ: ອັດຕາການເກີດຕໍ່າ, ອາຍຸຂອງປະຊາກອນໂດຍລວມ, ກຳລັງແຮງງານ ແລະ ການຍ້າຍຖິ່ນຖານ ໂດຍເຮັດໜ້າທີ່ເປັນຫໍຄວບຄຸມສຳລັບເລື່ອງເຫຼົ່ານີ້.
ນອກຈາກນີ້, ກະຊວງດັ່ງກ່າວຍັງຕ້ອງຮັບຜິດຊອບໃນການເຮັດນະໂຍບາຍປະຊາກອນ ແລະ ຍຸດທະສາດໄລຍະກາງ ເຖິງ ໄລຍະຍາວ ຊຶ່ງປັດຈຸບັນເບິ່ງແຍງໂດຍກະຊວງສາທາລະນະສຸກ ແລະ ກະຊວງການເງິນ.ກະຊວງດັ່ງກ່າວ ຈະເຮັດໜ້າທີ່ຈັດສັນ ແລະ ປະສານງານງົບປະມານ ເພື່ອຕໍ່ສູ້ກັບອັດຕາການເກີດທີ່ຕໍ່າ ກັບກະຊວງຕ່າງໆທີ່ກ່ຽວຂ້ອງດ້ວຍ, ຂະນະດຽວກັນ ລັດຖະມົນຕີກະຊວງສ້າງຕັ້ງຂຶ້ນໃໝ່ ຈະດຳລົງຕຳແໜ່ງຮອງນາຍົກລັດຖະມົນຕີຝ່າຍກິດຈະການສັງຄົມດ້ວຍ.
https://www.pptvhd36.com/news/%E0%B8%95%E0%B9%88%E0%B8%B2%E0%B8%87%E0%B8%9B%E0%B8%A3%E0%B8%B0%E0%B9%80%E0%B8%97%E0%B8%A8/227542