ວິທະຍຸກະຈາຍສຽງຫວຽດນາມລາຍງານວ່າ: ງານມະໂຫລານຮູບເງົາອາຊີ ດານັງ ຄັ້ງທີ 2 ປີ 2024 (DANAFF II) ເປີດຂຶ້ນໃນຕອນຄ່ຳວັນທີ 2 ກໍລະກົດ ຜ່ານມາ ຢູ່ນະຄອນດານັງ. ໂດຍມີຮູບເງົາ 63 ເລື່ອງຂອງບັນດາປະເທດເຂົ້າຮ່ວມງານມະໂຫລານຄັ້ງນີ້, ພ້ອມກັບຫຼາຍເຫດການ ແລະ ຮູບເງົາທີ່ດຶງດູດໃຈ,ໂດຍການເຂົ້າຮ່ວມຂອງບັນດາດາລານັກສະແດງ, ຜູ້ກຳກັບການສະແດງທີ່ມີຊື່ສຽງ.
ຂ່າວລະບຸວ່າ: ງານມະໂຫລານຮູບເງົາອາຊີ ດານັງ ຄັ້ງນີ້ໄດ້ເຕົ້າໂຮມບັນດາດາລານັກສະແດງ, ຜູ້ກຳກັບການສະແດງ, ນັກຊ່ຽວຊານດ້ານຮູບເງົາທີ່ມີຊື່ສຽງສາກົນ, ອາຊີ ແລະ ຫວຽດນາມ ເຂົ້າຮ່ວມ. ຄະນະກວດກາຈະຄັດເລືອກ ແລະ ຍ້ອງຍໍບັນດາຜົນງານຮູບເງົາດີເດັ່ນ. ທ່ານນາງໂງເຟືອງລານ ປະທານສະຫະສະມາຄົມສົ່ງເສີມການພັດທະນາຮູບເງົາ ຫວຽດນາມຫົວໜ້າຮັບຜິດຊອບງານມະໂຫລານຮູບເງົາອາຊີ ດານັງ ຄັ້ງທີ 2 ປີ 2024ໃຫ້ຮູ້ວ່າ: ເມື່ອຈັດງານມະໂຫລານອາຊີ ດານັງ, ພວກຂ້າພະເຈົ້າໄດ້ພະຍາຍາມປະຕິບັດຕາມມາດຕະຖານສາກົນ, ແຕ່ກໍຕ້ອງມີສີສັນຂອງ ຫວຽດນາມ. ຜ່ານງານມະໂຫລານແຕ່ລະຄັ້ງ, ພວກຂ້າພະເຈົ້າຫວັງວ່າ ສານທີ່ວ່າ “DANAFF - ຂົວຕໍ່ອາຊີ” ຈະສືບຕໍ່ແຜ່ຂະຫຍາຍ ແລະ ນັບມື້ນັບເລິກເຊິ່ງ, ຕິດພັນກັບເຄື່ອງໝາຍງານມະໂຫລານຮູບເງົາ ອາຊີ ດານັງ ຫຼາຍຂຶ້ນກວ່າເກົ່າອີກ.