ວິທະຍຸກະຈາຍສຽງຫວຽດນາມ ລາຍງານໃນທ້າຍອາທິດຜ່ານມາ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ລາຍງານວ່າ:ການສົ່ງອອກຜັກ, ໝາກໄມ້ໃນເດືອນມິຖຸນາຂອງຫວຽດນາມ ຄາດວ່າຈະບັນລຸເກືອບ 780 ລ້ານໂດລາ. ໃນ 6 ເດືອນຂອງປີ 2024, ການສົ່ງອອກຜັກ, ໝາກໄມ້ໄດ້ນຳໜ້າໃນຜະລິດຕະພັນກະເສດປະເພດຕ່າງໆ ດ້ວຍວົງເງິນສົ່ງອອກເກືອບ 3,5 ຕື້ໂດລາ, ເພີ່ມຂຶ້ນກວ່າ 28% ເມື່ອທຽບກັບໄລຍະດຽວກັນຂອງປີກາຍ. ຕະຫຼາດສົ່ງອອກຜັກ, ໝາກໄມ້ຂອງ ຫວຽດນາມ ແມ່ນ ຈີນ, ສເກົາຫຼີ, ຍີ່ປຸ່ນ, ໄທ.
ຂ່າວລະບຸວ່າ: ທ່ານ ຫງວຽນແທັງບິງ ປະທານສະຫະສະມາຄົມຜັກ, ໝາກໄມ້ ຫວຽດນາມ ໃຫ້ຮູ້ວ່າ:ປະລິມານການຜະລິດຜັກ, ໝາກໄມ້ໄດ້ເພີ່ມຂຶ້ນປະມານ 6%/ປີ. ການສະໜອງແມ່ນຫຼວງຫຼາຍ, ເປັນປົກກະຕິ ແລະ ຄວາມຕ້ອງການຂອງຕະຫຼາດໂລກກໍເພີ່ມຂຶ້ນ, ແຕ່ນີ້ຮອດທ້າຍປີ 2024, ຂະແໜງຜັກ, ໝາກໄມ້ ຫວຽດນາມ ຍັງມີເງື່ອນໄຂສະດວກເພື່ອພັດທະນາ.
   ດ້ວຍກຳລັງຊຸກຍູ້ ແລະ ທ່າເຕີບໂຕຄືໃນປະຈຸບັນ, ຂະແໜງຜັກ, ໝາກໄມ້ເຊື່ອວ່າ ຈະສາມາດບັນລຸວົງເງິນສົ່ງອອກດ້ວຍມູນຄ່າສະຖິຕິຄືແຕ່ 7-7,5 ຕື້ໂດລາໃນປີນີ້.