ສະຖາບັນວິຈິດສິນແຫ່ງຊາດ ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ)ໄດ້ຈັດງານວາງສະແດງຜະລິດຕະພັນວິຈິດສິນອາຊຽນຈາກສິ່ງເສດເຫຼືອພາຍໃຕ້ກິດຈະກໍາການເຜີຍແຜ່ມໍລະດົກວັດທະນະທໍາຕາມແລວທາງລົດໄຟ-ເສີມຂະຫຍາຍການເຊື່ອມຈອດໃນທ່າມກາງຄວາມຫຼາກຫຼາຍທາງດ້ານວັດທະນະທໍາ ໄດ້ຈັດຂຶ້ນໃນວັນທີ 14 ກໍລະກົດຜ່ານມາ ທີ່ສູນການຄ້າວຽງຈັນເຊັນເຕີ (Vientiane Centre) ໂດຍການເປັນກຽດເຂົ້າຮ່ວມຂອງທ່ານ ຄໍາພູ ເພຍສັງຄະ ຮອງຫົວໜ້າກົມແຜນການ ແລະການຮ່ວມມືສາກົນ ກະຊວງ ຖວທ, ມີຜູ້ຕາງໜ້າຈາກສະຖານທູດປະເທດສະມາຊິກອາຊຽນປະຈໍາ ສປປ ລາວ, ສະມາຄົມໂຮງແຮມ, ຮ້ານອາຫານ ພ້ອມດ້ວຍຕົວແທນນັກສຶກສາ-ຊາວໜຸ່ມຈາກບັນດາປະເທດສະມາຊິກອາຊຽນເຂົ້າຮ່ວມ.

ທ່ານຄໍາພູ ເພຍສັງຄະ ກ່າວວ່າ: ກິດຈະກໍາຄັ້ງນີ້, ໄດ້ເລີ່ມຈັດຢູ່ຫຼວງພະບາງນັບແຕ່ວັນທີ 10-14 ກໍລະກົດຜ່ານມາ ໂດຍການເປັນເຈົ້າພາບຮ່ວມຂອງ 3 ປະເທດຄື: ລາວ, ໄທ ແລະມາເລເຊຍ ຊຶ່ງເປັນໜຶ່ງໂຄງການ ໂດຍມີຈຸດປະສົງເພື່ອສ້າງຄວາມເຂັ້ມແຂງໃຫ້ແກ່ຊາວໜຸ່ມ, ນັກສຶກສາອາຊຽນ ໂດຍສະເພາະດ້ານສິລະປະ, ຜະລິດຕະພັນວິຈິດສິນຈາກສິ່ງເສດເຫຼືອຕ່າງໆ ແລະ ອາຫານພື້ນເມືອງ.ຈາກນັ້ນ, ໄດ້ຂີ່ລົດໄຟມາຈັດກິດຈະກຳຢູ່ເມືອງວັງວຽງ ແຂວງວຽງຈັນ. ສຳລັບມື້ນີ້ ຊຶ່ງເປັນມື້ສຸດທ້າຍທີ່ເຄື່ອນໄຫວກິດຈະກຳຢູ່ ສປປ ລາວໂດຍຜູ້ເຂົ້າຮ່ວມໂຄງການແມ່ນໄດ້ນຳເອົາຜົນຜະລິດຈາກການຈັດກິດຈະກຳຢູ່ແຂວງຫຼວງພະບາງ ແລະ ວັງວຽງ ມາວາງສະແດງຢູ່ສູນການຄ້າວຽງຈັນເຊັນເຕີ. ພ້ອມນີ້, ຍັງໄດ້ມອບລາງວັນຂອງທີ່ລະນຶກໃຫ້ຜູ້ແທນແຕ່ລະປະເທດອາຊຽນເຂົ້າຮ່ວມໂຄງການຕື່ມອີກ. ໃນມື້ດຽວກັນ, ກໍໄດ້ສືບຕໍ່ເດີນທາງໄປຈັດກິດຈະກຳຢູ່ນະຄອນຫຼວງບາງກອກ ປະເທດໄທ. ຈາກນັ້ນ, ຈະເດີນທາງໄປປິດກິດຈະກຳຂອງໂຄງການດັ່ງກ່າວນີ້ ຢູ່ນະຄອນຫຼວງກົວລາລຳເປີ ປະເທດມາເລເຊຍໃນວັນ 26 ກໍລະກົດ 2024.

(ຂ່າວ-ພາບ: ວັນເພັງ)