ໜ່ວຍຮາກຖານກໍາມະບານຫ້ອງການ ສູນກາງຊາວໜຸ່ມປະຊາຊົນປະຕິວັດລາວ(ສຊປລ) ໄດ້ເປີດກອງປະຊຸມໃຫຍ່ສະມາຊິກກໍາມະບານຮາກຖານຫ້ອງການ ສຊປລ ຄັ້ງທີ III ຂຶ້ນໃນວັນທີ 10 ກໍລະກົດ ຜ່ານມາ ທີ່ຫ້ອງປະຊຸມໃຫຍ່ ພາຍໃຕ້ການເປັນປະທານຂອງ ສະຫາຍ ນາງ ມະນີເພັດ ຈຸລະມະນີ ປະທານສະຫະພັນກໍາມະບານສູນກາງກໍາມະບານ ສຊປລ, ສະຫາຍ ນາງ ແກ້ວອຸດອນ ແສງມະນີວົງ ຫົວໜ້າຫ້ອງການ ສຊປລ ມີບັນດາສະຫາຍປະທານ, ຮອງປະທານໜ່ວຍຮາກຖານກໍາມະບານອ້ອມຂ້າງ ພ້ອມດ້ວຍສະມາຊິກກໍາມະບານເຂົ້າຮ່ວມ. ກອງປະຊຸມໄດ້ຮັບຟັງການຂຶ້ນຜ່ານບົດລາຍງານການເມືອງທັງສອງພາກ ແລະ ທິດທາງແຜນການໃນຕໍ່ໜ້າ ສະເໜີໂດຍ ສະຫາຍ ນາງ ວຽງສະໄໝ ບຸນມະນີວອນ ປະທານໜ່ວຍກໍາມະບານຮາກຖານຫ້ອງການ ສຊປລ ຊຶ່ງສະຫາຍໄດ້ຍົກໃຫ້ເຫັນຜົນງານທີ່ຍາດມາໄດ້ໃນໄລຍະທີ່ຜ່ານມາ ເປັນຕົ້ນວຽກງານດ້ານການເມືອງແນວຄິດ ໃນຖັນແຖວສະມາຊິກແມ່ນມີຄວາມອຸ່ນອ່ຽນທຸ່ນທ່ຽງ ເປັນເຈົ້າການປະຕິບັດລະບຽບວິໄນຢ່າງເຂັ້ມງວດ, ຍົກສູງຄວາມອາດສາມາດດ້ານວຽກງານວິຊາສະເພາະພາຍໃນໜ່ວຍໃຫ້ເຂັ້ມແຂງຮອບດ້ານ ເປັນຕົ້ນນໍາພາສະມາຊິກຫັນເອົາຂໍ້ແຂ່ງຂັນ 5 ເປັນເຈົ້າຂອງສູນກາງກໍາມະບານລາວເຂົ້າໃນວຽກງານວິຊາສະເພາະ ແລະ ຂະບວນການລວມຂອງຂັ້ນເທິງຢ່າງເປັນຂະບວນຟົດຟື້ນ.

ກອງປະຊຸມໄດ້ດໍາເນີນການປ່ອນບັດເລືອກຕັ້ງເອົາຄະນະຊຸດໃໝ່ ຊຶ່ງປະກອບມີຜູ້ລົງສະໝັກຈໍານວນ 7 ສະຫາຍ ເລືອກເອົາ 5 ສະຫາຍ ຜ່ານກອງປະຊຸມຄັ້ງປະຖົມມະລືກເຫັນດີເລືອກເອົາຄະນະໜ່ວຍຮາກຖານກໍາມະບານໜ່ວຍຫ້ອງການຄັ້ງທີ III ຄື:ສະຫາຍ ນາງ ສຸພາວັນ ພູທິໃຈ ເປັນປະທານໜ່ວຍ, ສະຫາຍ ວາ ລາວຊາງ ເປັນຮອງປະທານ ທັງເປັນປະທານກວດກາ ແລະ ສະຫາຍ ທັດສະພອນ ເລີດຖາວອນ ເປັນຄະນະ ທັງເປັນຮອງປະທານກວດກາ.

(ຂ່າວ:ສຊປລ)