ຂ່າວຕ່າງປະເທດລາຍງານ ໃນວັນທີ 14 ກໍລະກົດ ຜ່ານມາວ່າ: ອົງການສະພາບອາກາດຟີລິບປິນໄດ້ຍົກລະດັບການເຕືອນໄພຈາກປະກົດລານີຢາ (La Nina)ໂດຍລະບຸວ່າ: 70% ຂອງປະກົດການດັ່ງກ່າວຈະເລີ່ມຕົ້ນໃນເດືອນສິງຫາ ແລະ ມີທ່າອ່ຽງແກ່ຍາວຈົນເຖິງໄຕມາດທຳອິດ (ເດືອນມັງກອນ - ມີນາ) ຂອງປີ 2025.
ຜົນການເຝົ້າຕິດຕາມສະພາບອາກາດ,ພົບອຸນຫະພູມພື້ນຜີວນໍ້າທະເລໃນມະຫາສະໝຸດປາຊີຟິກຕອນກາງ ແລະ ຕາເວັນອອກແຖບເສັ້ນສູນສູດຫຼຸດລົງກວ່າເກົ່າ ເຮັດໃຫ້ຟີລິບປິນມີຄວາມສ່ຽງສູງທີ່ຈະປະເຊີນກັບສະພາບອາກາດແບບພາຄວາມຮ້ອນ ແລະ ພາຍຸໝຸນເຂດຮ້ອນເພີ່ມຂຶ້ນ ຊຶ່ງອາດເຮັດໃຫ້ມີຝົນຕົກໜັກກວ່າປົກກະຕິໃນບາງພື້ນທີ່ຂອງປະເທດ.
ອົງການສະພາບອາກາດຂອງຟີລິບເຕືອນເຖິງຜົນກະທົບດ້ານລົບທີ່ອາດເກີດຂຶ້ນຫຼາຍລະດັບໃນພື້ນທີ່ສ່ຽງໄພເຊັ່ນ: ນໍ້າຖ້ວມ ແລະ ດິນຖະຫຼົ່ມ ພ້ອມເນັ້ນຢໍ້າຄວາມສຳຄັນຂອງການເຝົ້າຕິດຕາມຢ່າງຕໍ່ເນື່ອງ ແລະ ດຳເນີນມາດຕະການເຝົ້າລະວັງຜົນກະທົບຂອງທຸກອົງການລັດຖະບານ ແລະ ສາທາລະນະ.
