ຂ່າວສານຫວຽດນາມລາຍງານວ່າ: ໃນວັນທີ 15 ກໍລະກົດ ຜ່ານມາກອງປະຊຸມວິທະຍາສາດຄັ້ງທີ 45 ຂອງຄະນະກຳມະການຄົ້ນຄວ້າອາວະກາດ (COSPAR) ໄດ້ຈັດຂຶ້ນຢູ່ນະຄອນບູຊານສ ເກົາຫຼີ ເພື່ອຊຸກຍູ້ການຄົ້ນຄວ້າວິທະຍາສາດສາກົນ.
ຂ່າວລະບຸວ່າ: ອົງການບໍລິຫານການບິນ ແລະ ອາວະກາດ ສ ເກົາຫຼີ (KASA) ໃຫ້ຮູ້ວ່າ: ມີນັກວິທະຍາສາດອະວະກາດ ແລະເຈົ້າໜ້າທີ່ອຸດສາຫະກຳອາວະກາດ ປະມານ 3.000 ຄົນ ຈາກ 60 ປະເທດ ໄດ້ເຂົ້າຮ່ວມກອງປະຊຸມວິທະຍາສາດຄັ້ງນີ້. ນີ້ແມ່ນຄັ້ງທຳອິດທີ່ ສ ເກົາຫຼີ ເປັນເຈົ້າພາບຈັດກອງປະຊຸມລະດັບໂລກ ຊຶ່ງຈັດຂຶ້ນທຸກໆ 2 ປີ.
ທ່ານ ຢຸນ ຢຸງ ບິນ ຫົວໜ້າອົງການ KASA ກ່າວຄຳເຫັນໃນພິທີເປີດວ່າ: ສ ເກົາຫຼີ ຈະສືບຕໍ່ລົງທຶນເຂົ້າໃນບັນດາໂຄງການຄົ້ນຄວ້າອາວະກາດຢ່າງມີຫົວຄິດປະດິດສ້າງ ເພື່ອພັດທະນາຄວາມສາມາດໃນການສຳຫຼວດອາວະກາດ ແລະ ປະກອບສ່ວນເຂົ້າໃນການຮ່ວມມືດ້ານອາວະກາດເພື່ອສັນຕິພາບລະຫວ່າງບັນດາປະເທດ.
ນອກກອງປະຊຸມ, KASA ໄດ້ພົບປະສອງຝ່າຍກັບບັນດາຄູ່ຮ່ວມມືອາເມຣິກາ, ຍີ່ປຸ່ນ, ສະຫະລັດອາຣັບເອມິເຣດ (UAE), ຈີນ ແລະ ບັນດາປະເທດ ເພື່ອຜັນຂະຫຍາຍເຄືອຂ່າຍທົ່ວໂລກໃນຂົງເຂດອາວະກາດ, ພ້ອມທັງຊຸກຍູ້ບັນດາໂຄງການຄົ້ນຄວ້າໃໝ່.
ສະພາວິທະຍາສາດສາກົນ (ICSU), ອົງການຈັດຕັ້ງສາກົນທີ່ບໍ່ຂຶ້ນກັບລັດຖະບານ ແລະ ບໍ່ຫວັງຜົນກໍາໄລທີ່ອຸທິດໃຫ້ການຮ່ວມມືສາກົນເພື່ອຄວາມກ້າວໜ້າຂອງວິທະຍາສາດ, ໄດ້ສ້າງຕັ້ງ COSPAR ໃນປີ 1958.
COSPAR ແມ່ນອົງການຈັດຕັ້ງສາກົນທີ່ສົ່ງເສີມກິດຈະກໍາການຄົ້ນຄວ້າ, ພ້ອມທັງສະໜັບສະໜູນການຮ່ວມມືສາກົນດ້ານວິທະຍາສາດອາວະກາດ.
