ເມື່ອບໍ່ດົນມານີ້, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຮ່ວມກັບມູນນິທິເອເຊຍ ໄດ້ຈັດກອງປະຊຸມແລກປ່ຽນຄໍາຄິດຄໍາເຫັນວຽກງານໂຄສະນາຕ້ານການຄ້າມະນຸດໃຫ້ຂະແໜງສື່ມວນຊົນ 4 ແຂວງພາກໃຕ້ຄື: ແຂວງຈໍາປາສັກ, ສະຫວັນນະເຂດ, ສາລະວັນ ແລະ ແຂວງເຊກອງ ຊຶ່ງຈັດຂຶ້ນຢູ່ແຂວງຈຳປາສັກ ແລະ 4 ແຂວງພາກເໜືອຈັດຂຶ້ນຢູ່ແຂວງຫຼວງນໍ້າທາ ປະກອບມີແຂວງຫຼວງພະບາງ, ອຸດົມໄຊ, ບໍ່ແກ້ວ ແລະ ແຂວງຫຼວງນໍ້າທາ ໂດຍການເປັນປະທານຮ່ວມຂອງທ່ານ ບຸນເພັງ ສຸພາບ ຮອງຫົວໜ້າຫ້ອງການກະຊວງ ຖວທ, ມີທ່ານນາງ ສຸລິວອນໄຊ ພຣົມມາລາ ຕາງໜ້າມູນນິທິເອເຊຍ, ມີຜູ້ຕາງໜ້າພະແນກ ຖວທ ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ບຸນເພັງ ສຸພາບ ໃຫ້ຮູ້ວ່າ: ເພື່ອເປັນການໂຄສະນາເຜີຍແຜ່ ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ຕໍ່ກັບການປ້ອງກັນ ແລະ ຕ້ານການຄ້າມະນຸດໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ ເຖິງພິດໄພ ແລະ ຜົນຮ້າຍຂອງການຄ້າມະນຸດ ໂດຍສະເພາະສື່ມວນຊົນໃຫ້ຮັບຮູ້ເຂົ້າໃຈຢ່າງເລິກເຊິ່ງ ບົນພື້ນຖານການປະສານສົມທົບແໜ້ນ ແລະ ຮ່ວມມືກັບຫຼາຍພາກສ່ວນທັງພາກລັດ, ເອກະຊົນ ແລະ ອົງການຈັດຕັ້ງສາກົນຂັ້ນຕ່າງໆ ເພື່ອນໍາເອົາແນວທາງນະໂຍບາຍຂອງພັກ-ກົດໝາຍຂອງລັດ ຕໍ່ກັບການສະກັດກັ້ນ ແລະ ຕ້ານການຄ້າມະນຸດຫັນລົງສູ່ຊຸມຊົນທ້ອງຖິ່ນກຸ່ມເປົ້າໝາຍໃຫ້ທົ່ວເຖິງ ເພື່ອເຮັດໃຫ້ປະຊາຊົນລາວບັນດາເຜົ່າມີສະຕິລະວັງຕົວຕໍ່ກັບເລ່ຫຼ່ຽມ, ກົນອຸ ບາຍຂອງພວກຄົນບໍ່ດີ ເປັນຕົ້ນຂະບວນການຄ້າມະນຸດຢູ່ພາຍໃນ ແລະ ຕ່າງປະເທດ.

ທ່ານ ບຸນເພັງ ສຸພາບ ກ່າວໃຫ້ຮູ້ອີກວ່າ: ຍາມໃດພັກ-ລັດຖະບານ ກໍໄດ້ເອົາໃຈໃສ່ຊີ້ນໍາໃຫ້ເຫັນໄດ້ເຖິງຜົນຮ້າຍຂອງການຄ້າມະນຸດ, ຊຶ່ງໄດ້ສົ່ງຜົນກະທົບຕໍ່ສັງຄົມ ແລະ ກົດໜ່ວງຖ່ວງດຶງການສ້າງສາພັດທະນາປະເທດຊາດ. ສະນັ້ນ, ພວກເຮົາຈົ່ງຊ່ວຍກັນເປັນຫູເປັນຕາ ເປັນກະບອກສຽງໃນການໂຄສະນາເຜີຍແຜ່ຂໍ້ມູນຂ່າວສານຕ່າງໆ ຜ່ານບັນດາສື່ມວນຊົນເຊັ່ນ: ໂທລະພາບ, ໜັງສືພິມ, ການຈັດລາຍການຂອງໂຄສົກວິທະຍຸ ໃຫ້ມີການສອດແຊກເອົາຂໍ້ມູນຂ່າວສານ ຫຼືບັນດາບົດເພງ, ຂັບ, ລໍາອື່ນໆ ທີ່ພົວພັນເຖິງວຽກງານຕ້ານການຄ້າມະນຸດເຂົ້ານໍາ ເພື່ອເປັນກະບອກສຽງ, ເປັນສື່ກາງໃຫ້ສັງຄົມໄດ້ຮັບຮູ້ເຂົ້າໃຈ ແລະ ມີສະຕິລະວັງຕົວ. ຂ່າວ: ຂປລ