ອົງການໄອຍະການປະຊາຊົນສູງສຸດ(ອອປສ) ໄດ້ຈັດພິທີປາຖະກະຖາ ຫວນຄືນມູນເຊື້ອ 3 ເອກະສານສຳຄັນຂອງພັກຂອງຊາດ ຄື: ວັນເກີດປະທານ ສຸພານຸວົງ ຄົບຮອບ 115 (13 ກໍລະກົດ 1909 -13 ກໍລະກົດ 2024), ວັນເຊັນສົນທິສັນຍາ ມິດຕະພາບ ການຮ່ວມມື ຄົບຮອບ 47 ປີ (18 ກໍລະກົດ 1977 -18 ກໍລະກົດ 2024) ແລະ ວັນສ້າງຕັ້ງສາຍພົວພັນການທູດ ລາວ -ຫວຽດນາມ ຄົບຮອບ 62 ປີ (5 ກັນຍາ 1962-5 ກັນຍາ 2024) ຂຶ້ນໃນວັນທີ 17 ກໍລະກົດ ນີ້ ທີ່ ອອປສ ໃຫ້ກຽດເຜີຍແຜ່ເອກກະສານໂດຍສະຫາຍ ໄຊຊະນະ ໂຄດພູທອນ ກຳມະການສູນກາງພັກ ເລຂາຄະນະບໍລິຫານງານພັກ ຫົວໜ້າ ອອປສ ມີບັນດາສະຫາຍຄະນະບໍລິຫານງານພັກ, ຄະນະໜ່ວຍພັກຫ້ອງການ, ບັນດາກົມ, ສະຖາບັນຄົ້ນຄວ້າ ແລະ ຝຶກອົບຮົມໄອຍະການ ແລະ ຄະນະພະແນກເຂົ້າຮ່ວມ.
ສະຫາຍ ໄຊຊະນະ ໂຄດພູທອນ ໄດ້ຍົກໃຫ້ເຫັນການຫວນຄືນເຖິງມູນເຊື້ອ ແລະ ປະຫວັດຄວາມເປັນມາຂອງປະທານ ສຸພານຸວົງ ຊຶ່ງທ່ານເປັນປັນຍາຊົນຜູ້ຍິ່ງໃຫຍ່, ເປັນເຊື້ອເຈົ້າຜູ້ໜຶ່ງ ທີ່ມີນ້ຳໃຈຮັກຊາດອັນດູດດື່ມ, ຈິດໃຈຕໍ່ສູ້ທີ່ອາດຫານກ້າແກ່ນ ແລະ ນ້ຳໃຈເສຍສະຫຼະອັນສູງສົ່ງ ເພື່ອຊາດເພື່ອປະຊາຊົນ,ເປັນໜຶ່ງໃນບັນດາຜູ້ນຳຂອງພັກ-ລັດເຮົາ ທີ່ໄດ້ສ້າງຜົນງານອັນລ້ຳຄ່າ, ມີຄຸນງາມຄວາມດີຢ່າງຫຼວງຫຼາຍ ປະກອບສ່ວນເຂົ້າໃນການນຳພາລວມໝູ່ຂອງພັກ, ແນວລາວຮັກຊາດ ເພື່ອໄຊຊະນະຂອງພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືພາລະກິດປົກປັກຮັກສາລະບອບໃໝ່ ເພື່ອຄວາມເປັນຢູ່ຂອງປະຊາຊົນລາວບັນດາເຜົ່າ; ພ້ອມກັນນີ້ ຍັງໄດ້ຮັບຟັງເອກະສານວັນເຊັນສົນທິສັນຍາມິດຕະພາບ - ການຮ່ວມມື ແລະ ວັນສ້າງຕັ້ງສາຍພົວພັນການທູດ ລາວ -ຫວຽດນາມ ທີ່ມີຄວາມສາມັກຄີແບບພິເສດລະຫວ່າງສອງປະເທດ, ສອງພັກ-ສອງລັດ ແລະ ປະຊາຊົນສອງຊາດ ລາວ - ຫວຽດ, ຫວຽດ - ລາວ ບົນພື້ນຖານຮັດແໜ້ນສາຍພົວພັນ ແລະ ຮ່ວມມືຮອບດ້ານ ປະກອບພາລະກິດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາປະເທດຊາດ ແນໃສ່ເຮັດໃຫ້ ສັງຄົມມີຄວາມສະຫງົບປອດໄພ, ເປັນລະບຽບຮຽບຮ້ອຍ ແລະ ເຂັ້ມແຂງເທື່ອລະກ້າວ.
ຂ່າວ-ພາບ: ສຸພາວະດີ