ໃນວັນທີ 16 ກໍລະກົດ ນີ້ ໄດ້ມີພິທີເປີດຝຶກອົບຮົມພະສໍາມະນະທູດລາວ ທີ່ວັດປ່າພິລາວົງບຸດກັດສະກາຣາມ ນະຄອນຫຼວງວຽງຈັນ,ໂດຍມີ ທ່ານ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ (ສນຊ), ພະອາຈານໃຫຍ່ ມະຫາເຫວດ ມະເສໄນ ຮອງປະທານສູນກາງ ອົງການພຸດທະສາສະໜາ ສຳພັນ ແຫ່ງ ສປປ ລາວ ອພສ, ພະອາຈານ ດໍາຣົງ ພິມມະຈັກ ຫົວໜ້າກໍາມາທິການຕ່າງປະເທດ ສູນກາງ ອພສ ເຈົ້າອະທິການວັດປ່າພິລາວົງບຸດກັດສະກາຣາມ, ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ, ຜູ້ຕາງໜ້າຈາກກະຊວງ-ອົງການ ກ່ຽວຂ້ອງ, ຄອບຄົວການນໍາ, ສໍາມະນາກອນ ແລະ ພີ່ນ້ອງເຊື້ອຊາດລາວຢູ່ປະເທດອາເມຣິກາ.

ພິທີເປີດຝຶກອົບຮົມພະສໍາມະນະທູດລາວ ໃນຄັ້ງນີ້; ເພື່ອຝຶກອົບຮົມ ໃຫ້ພະສະມະນະທູດລາວ ໃຫ້ມີຄວາມຮູ້, ຄວາມສາມາດ ແລະ ຄວາມໝັ້ນໃຈ ໃນການປະຕິບັດສາສະນະກິດ ຕາມວັດຖຸປະສົງ; ເພື່ອກຽມພ້ອມພະສະມະນະທູດລາວ ທີ່ມີຄຸນສົມບັດເໝາະສົມ ໃນການສະໜອງຂອງວັດຕ່າງໆ ພາຍໃຕ້ກຳມາທິການການຕ່າງປະເທດ ແລະ ໃນປະເທດອື່ນໆ; ເພື່ອສົ່ງເສີມສະໜັບສະໜູນພະສົງລາວ ທີ່ເຮັດໜ້າທີ່ເຜີຍແຜ່ພະພຸດທະສາສະໜາ ຢູ່ໃນປະເທດຕ່າງໆ; ເພື່ອສະໜອງນະໂຍບາຍຂອງພັກ-ລັດ ແລະ ອົງການພຸດທະສາສະໜາສຳພັນ ແຫ່ງ ສປປ ລາວ; ເວົ້າລວມ ເວົ້າສະເພາະຄືກຳມາທິການ ການຕ່າງປະເທດ ທາງດ້ານການພົວພັນວຽກງານຕ່າງປະເທດ ຂອງພະພຸດທະສາສະໜາ ແລະ ສາສະໜາອື່ນ;ໂຄງການພະສຳມະນະທູດລາວ ພາຍໃຕ້ການບໍລິຫານງານ ຂອງກຳມາທິການການຕ່າງປະເທດກໍຄືອົງການພຸດທະສາສະໜາສຳພັນ ແຫ່ງ ສປປ ລາວ ຊີ້ນຳ-ນຳພາ ເມື່ອມີພິທີເປີດຂຶ້ນຢ່າງເປັນທາງການແລ້ວ ກໍຈະໄດ້ເຄື່ອນໄຫວວຽກງານຈັດຕັ້ງປະຕິບັດ ຊຶ່ງຈະເກີດຜົນຮັບອັນດີເລີດຫຼາຍຢ່າງ ຄື: ເຮັດໃຫ້ພະສົງສາມະເນນລາວ, ພໍ່ຂາວ-ແມ່ຂາວ ມີຄວາມຮູ້, ມີຄວາມສາມາດ, ມີຄວາມໝັ້ນໃຈຕົນເອງ ໃນການທີ່ຈະໄປເຜີຍແຜ່ພະພຸດທະສາສະໜາ ທັງພາຍໃນປະເທດ ແລະ ຢູ່ຕ່າງປະເທດ; ເຮັດໃຫ້ໄດ້ນໍາເອົາ ພະພຸດທະສາສະໜາ ຕະຫຼອດເຖິງຮີດຄອງ, ປະເພນີ, ວັດທະນະທຳຂອງລາວ ແນວທາງນະໂຍບາຍຂອງພັກ-ລັດ ອອກໄປເຜີຍແຜ່ໃຫ້ປະເທດຕ່າງໆໃນໂລກ ຮັບຮູ້ຢ່າງກວ້າງຂວາງ; ເຮັດໃຫ້ເກີດການເຜີຍແຜ່ພະພຸດທະສາສະໜາ ຢ່າງມີຮູບການ ທີ່ເປັນເອກະລັກ ແລະ ເອກະພາບ ທັງພາຍໃນ ແລະ ຕ່າງປະເທດ; ທັງເປັນການຍົກສູງພາລະບົດບາດ ຂອງພະສົງລາວ ໃນພາກພື້ນ ແລະ ສາກົນ.

(ຂ່າວ:ສນຊ)