ກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ຫຼື ສສກ ໄດ້ຈັດກອງປະຊຸມປາຖະກະຖາຫວນຄືນມູນເຊື້ອເຫດການສຳຄັນທາງປະຫວັດສາດຂອງຊາດ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກິລາ - ກາຍະກຳແຫ່ງຊາດລາວ ຄົບຮອບ 58 ປີ (13 ກໍລະກົດ 1966-13 ກໍລະກົດ 2024) ແລະ ວັນເກີດຂອງປະທານ ສຸພານຸວົງ ຄົບຮອບ 115 ປີ ຂຶ້ນເມື່ອບໍ່ດົນມານີ້ ທີ່ຫ້ອງການປະສານງານຄະນະກຳມະການໂອແລັມປິກແຫ່ງຊາດລາວ ຫຼື ຄອລ ໃຫ້ກຽດ ປາຖະກະຖາໂດຍ ທ່ານ ພູທອງ ແສງອາຄົມ ອະດີດລັດຖະມົນຕີ ປະຈຳສຳນັກງານນາຍົກລັດຖະມົນຕີ ອະດີດປະທານຄະນະກຳມະການໂອແລັມປິກແຫ່ງຊາດລາວ ໂດຍມີ ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການໂອແລັມປິກແຫ່ງຊາດລາວ ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ສະຖາບັນ, ສູນ ແລະ ພະແນກ ຕະຫຼອດຮອດພະນັກງານທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ພູທອງ ແສງອາຄົມ ກໍໄດ້ເລົ່າຄືນມູນເຊື້ອ 2 ວັນສຳຄັນທາງປະຫວັດສາດຂອງຊາດ ກໍຄື ວັນສ້າງຕັ້ງກິລາ - ກາຍະກຳແຫ່ງຊາດລາວ ຄົບຮອບ 58 ປີ (13 ກໍລະກົດ 1966-13 ກໍລະກົດ 2024) ແລະ ວັນຄ້າຍວັນເກີດຂອງ ປະທານ ສຸພານຸວົງ ຄົບຮອບ 115 ປີ ໂດຍສະເພາະເຫດການສຳຄັນຕ່າງໆໃນອະດີດທີ່ຜູ້ນຳລາວໃຫ້ຄວາມສຳຄັນໃນການອອກກຳລັງກາຍໃຫ້ສຸຂະພາບແຂງແຮງ ຄຽງຄູ່ກັບການປົກປັກຮັກສາ ແລະ ສ້າງສາພັດທະນາປະເທດຊາດ ຈົນສາມາດປົດປ່ອຍປະເທດຊາດ ຫຼຸດພົ້ນອອກຈາກແອກການປົກຄອງຂອງພວກລ່າເມືອງຂຶ້ນ ເຮັດໃຫ້ບ້ານເມືອງມີຄວາມສະຫງົບ ແລະ ມີການພັດທະນາຢ່າງເຕີບໃຫຍ່ຂະຫຍາຍຕົວຈົນມາຮອດປັດຈຸບັນ.

ທ່ານ ພູທອງ ແສງອາຄົມ ກ່າວຕື່ມອີກວ່າ: ອີກເຫດການໜຶ່ງທີ່ສຳຄັນ ກ່ອນ ສປປ ລາວ ຈະໄດ້ຮັບກຽດເປັນເຈົ້າພາບ ຈັດງານກິລາຊີເກມ ຄັ້ງທີ 25 ປີ 2009 (ກິລາໃນຂົງເຂດອາຊຽນ) ມີຫຼາຍສິ່ງທີ່ທ້າທາຍ ໃນຄັ້ງນັ້ນ ພື້ນຖານໂຄງລ່າງ ສປປ ລາວ ກໍຍັງບໍ່ທັນມີຫຍັງເປັນຕົວເປັນຕົນ ເປັນບັນຫາຫຍຸ້ງຍາກ ຊຶ່ງຄະນະນຳຫຼາຍທ່ານກໍບໍ່ເຫັນດີໃຫ້ຈັດເທື່ອ ແຕ່ຂ້າພະເຈົ້າ ກໍພະຍາຍາມອະທິບາຍ ການເປັນເຈົ້າພາບຈັດແບບລຽບງ່າຍ ບໍ່ຈັດຍິ່ງໃຫຍ່ຄືກັບບັນດາປະເທດອື່ນ ທີ່ພັດທະນາກ່ອນເຮົາແລ້ວ ຊຶ່ງປະເທດໜຶ່ງສາມາດຈັດແຂ່ງຂັນໄດ້ 40 ກວ່າປະເພດກິລາ ແຕ່ພວກເຮົາມາເນັ້ນຈັດ 20 ຫຼື 30 ກວ່າປະເພດກິລາ ເພື່ອເປັນການປະຢັດງົບປະມານ ແລະ ເພິ່ນກໍເຫັນດີໃຫ້ຈັດ ຈຶ່ງໄດ້ມີການຂຶ້ນແຜນຊອກຫາແຫຼ່ງທຶນ ໂດຍປະສານພົວພົນບັນດາປະເທດເພື່ອນມິດຂໍການສະໜັບສະໜູນພື້ນຖານໂຄງລ່າງ ແລະ ປະເທດຍີ່ປຸ່ນກໍໃຫ້ການຊ່ວຍເຫຼືອສ້າງສູນກິລາໃນຮົ່ມ ບູໂດເຊັນເຕີ, ສະໂມສອນກິລາໃນຮົ່ມ ບູຢອງ ແລະ ສະໂມສອນກິລາໃນຮົ່ມໂອແລັມປາເຊຍ, ສ່ວນປະເທດບຣູໄນ ກໍຊ່ວຍສ້າງສະໂມສອນກິລາໃນຮົ່ມໂຮງຮຽນພອນສະຫວັນກິລາ-ກາຍະກຳ, ສສ ຫວຽດນາມ ຊ່ວຍສ້າງສູນຝຶກກິລາແຫ່ງຊາດ ທັງສອງຈຸດແມ່ນຢູ່ສີເກີດ, ຣາຊະອານາຈັກໄທ ກໍ່ສ້າງສູນກິລາໃນຮົ່ມບຶງຂະຫຍອງ ແລະ ສປ ຈີນ ກໍກໍ່ສ້າງສະໜາມກິລາແຫ່ງຊາດ ປະເພດກິລາຕ່າງໆ ຢູ່ຫຼັກ16 ຈຶ່ງເຮັດໃຫ້ ສປປ ລາວ ສາມາດສ້າງປະຫວັດສາດ ໜ້າໃໝ່ໃນວົງການກິລາອາຊຽນ ສາມາດຍາດໄດ້ 33 ຫຼຽນຄຳ, 25 ຫຼຽນເງິນ ແລະ 55 ຫຼຽນທອງ ຜົນງານທັງໝົດນີ້ ກໍຍ້ອນມາຈາກຄວາມເສຍສະຫຼະຂອງການນຳທຸກຂັ້ນ, ຄູຝຶກ ແລະ ນັກກິລາທຸກຄົນຊ່ວຍກັນເປັນນໍ້າໜຶ່ງໃຈດຽວທຸ່ມເທເຫື່ອແຮງ ແລະ ສະຕິປັນຍາເຂົ້າໃນການແຂ່ງຂັນໃນຄັ້ງນີ້.

ຫຼັງຈາກນັ້ນ, ທາງອະດີດການນຳກິລາລາວ ພ້ອມດ້ວຍຄະນະບໍລິຫານງານ ຄອລ ທັງອະດີດ ແລະ ປັດຈຸບັນ ຕະຫຼອດຮອດພະນັກງານ ແລະ ນັກສຶກສາ ກໍໄດ້ຮ່ວມກັນຖ່າຍຮູບທີ່ສະໜາມກິລາເຈົ້າອານຸວົງ ເພື່ອເປັນພາບທີ່ລະນຶກໄວ້ໃນຄວາມຊົງຈຳຕະຫຼອດໄປ ເພາະສະໜາມກິລາດັ່ງກ່າວ ຈະມີການປັບປຸງກໍ່ສ້າງໃໝ່ ຊຶ່ງຈະເລີ່ມລົງມືກໍ່ສ້າງໃນທ້າຍປີ 2024 ນີ້.

(ຂ່າວ ແລະ ພາບ: ສົງການ ພັນແພງດີ)