ທ່ານ ເສີມສີ ສຸລິຕະ ຫົວໜ້າພະແນກກະສິກຳ ແລະ ປ່າໄມ້ແຂວງເຊກອງ ແລະ ການນໍາເມືອງລະມາມ ກໍຄືຫ້ອງການກະສິກຳ ແລະ ປ່າໄມ້ເມືອງໄດ້ນຳເອົາລູກປານິນ, ປາປາກ, ປາເກັດແລບ ແລະ ປາໄນຈໍານວນ 6 ພັນກວ່າໂຕມອບໃຫ້ໂຮງຮຽນສາມັນກິນນອນຊົນເຜົ່າແຂວງ (ມສ ຊົນເຜົ່າແຂວງ) ໃນວັນທີ 17 ກໍລະກົດຜ່ານມາ ໂດຍການກ່າວຮັບຂອງທ່ານ ຄຳໄພ ສິມມາວັດ ຫົວໜ້າພະແນກສຶກສາທິການ ແລະ ກິລາແຂວງ, ມີຄະນະພັກ, ຄະນະອໍານວຍການໂຮງຮຽນ, ພະນັກງານ-ຄູອາຈານເຂົ້າຮ່ວມ. ທັງນີ້ເພື່ອໃຫ້ຄູ-ອາຈານນຳໄປລ້ຽງໃນໜອງປາຂອງໂຮງຮຽນ ເພື່ອໃຫ້ກາຍເປັນບ່ອນສຶກສາຮຽນຮູ້ກ່ຽວກັບວິຊາຂະແໜງລ້ຽງສັດ.

ໂອກາດນີ້, ທ່ານ ຄຳໄພ ສິມມາວັດ ໄດ້ສະແດງຄວາມຂອບໃຈມາຍັງພະແນກກະສິກຳ ແລະ ປ່າໄມແຂວງ ແລະ ການນໍາເມືອງລະມາມ ກໍຄືຫ້ອງການກະສິກໍາ ແລະ ປ່າໄມ້ເມືອງ ທີ່ໄດ້ໃຫ້ການອຸປະຖໍາຊ່ວຍເຫຼືອລູກປາໃນຄັ້ງນີ້, ຊຶ່ງເປັນການປະກອບສ່ວນເຂົ້າໃນການຮຽນ-ການສອນ, ການສຶກສາຮຽນຮູ້ຂອງນັກຮຽນພາຍໃນໂຮງຮຽນ ໂດຍສະເພາະ ວິຊາປູກຝັງ-ລ້ຽງສັດ ເພື່ອສົ່ງເສີມການປູກ-ການລ້ຽງໃນໂຮງຮຽນໃຫ້ມີການເຕີບໃຫຍ່ຂະຫຍາຍຕົວຍິ່ງໆຂຶ້ນໄປ ທັງເປັນການສ້າງລາຍຮັບເຂົ້າສູ່ໂຮງຮຽນໃຫ້ນັບມື້ນັບຫຼາຍຂຶ້ນ. ໂອກາດນີ້, ຜູ້ເຂົ້າຮ່ວມຍັງໄດ້ປ່ອຍປາລົງສູ່ໜອງຂອງໂຮງຮຽນ. ຂ່າວ: ອັດສະວິນ