ພິທີສະເຫຼີມສະຫຼອງວັນສ້າງຕັ້ງ ອົງການຈັດຕັ້ງສະຫະພັນແມ່ຍິງລາວ 20 ກໍລະກົດ ຄົບຮອບ 69 ປີ ໄດ້ຈັດຂຶ້ນໃນວັນທີ 18 ກໍລະກົດນີ້ ທີ່ສະໂມສອນເມືອງ ເມືອງວຽງພູຄາ ແຂວງຫຼວງນໍ້າທາ ໂດຍການເຂົ້າຮ່ວມຂອງທ່ານນາງ ຈັນຄໍາ ທອງມີໄຊ ປະທານແນວລາວສ້າງຊາດເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານນາງ ແສງທອງ ຊຽນປັນຢາ ປະທານສະຫະພັນແມ່ຍິງເມືອງ ໄດ້ຍົກໃຫ້ເຫັນມູນເຊື້ອການກໍາເນີດ ເຕີບໃຫຍ່ຂະຫຍາຍຕົວ, ຜົນງານການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງທີ່ໄດ້ອຸທິດຕົນເພື່ອພາລະ ກິດຕໍ່ສູ້ປົດປ່ອຍຊາດ ແລະ ປົກປັກຮັກສາສ້າງສາພັດທະນາປະເທດຊາດ ກໍຄືພາລະກິດການພັດທະນາແມ່ຍິງລາວໃນແຕ່ລະຂັ້ນ ຕະຫຼອດໄລຍະ 69 ປີທີ່ຜ່ານມາ ແມ່ຍິງໄດ້ຕັ້ງໜ້າເຂົ້າຮ່ວມໃນການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະ ແບບໃໜ່ດ້ວຍຫຼາຍຮູບການ, ການຈັດຕັ້ງແມ່ຍິງໄດ້ຮັບການສ້າງຕັ້ງຂຶ້ນພ້ອມກັບການປະຕິວັດ ແມ່ຍິງໄດ້ສະໝັກເຂົ້າເປັນກອງຫຼອນ, ເຂົ້າຮ່ວມລໍາລຽງຂົນສົ່ງສະບຽງອາຫານ, ຢາ, ເຄື່ອງນຸ່ງຫົ່ມ ແລະ ເຄື່ອງ ໃຊ້ທີ່ຈໍາເປັນອື່ນໆໃຫ້ກໍາລັງປະຕິວັດ, ແມ່ຍິງລາວທີ່ຢູ່ເຂດປົກຄອງຂອງພວກສັດຕູ ໄດ້ຕໍ່ສູ້ປະເຊີນໜ້າກັບພວກສັດຕູໃນແຕ່ລະວັນ, ເຖິງວ່າພວກສັດຕູຈະປາບປາມ, ຈັບກຸມຄຸມຂັງ ແຕ່ກໍບໍ່ສາມາດເອົາຊະນະນໍ້າໃຈຮັກຊາດ, ຄວາມອົງອາດກ້າຫານ, ນໍ້າໃຈເສຍສະຫຼະ ແລະ ຄວາມຈົງຮັກພັກດີຕໍ່ການປະຕິວັດຂອງແມ່ຍິງລາວໄດ້, ກົງກັນຂ້າມຍິ່ງຖືກປາບປາມເທົ່າໃດ ແປວໄຟແຫ່ງຄວາມຮັກຊາດ ແລະ ຄວາມຄຽດແຄ້ນສັດຕູກໍຍິ່ງເພີ່ມທະວີຂຶ້ນ; ພາຍໃຕ້ການນໍາພາຂອງພັກ ອົງການຈັດຕັ້ງແມ່ຍິງຢູ່ຂັ້ນຮາກຖານໄດ້ມີການເຄື່ອນໄຫວ ແລະ ເຕີບໃຫຍ່ຂະ ຫຍາຍຕົວນັບມື້ນັບກວ້າງຂວາງ ເປັນຕົ້ນການກໍາເນີດຂອງຄະນະຂົນຂວາຍສ້າງຕັ້ງສະມາຄົມແມ່ຍິງລາວຮັກຊາດ ຊຶ່ງໄດ້ປະກາດຢ່າງເປັນທາງການໃນວັນທີ 20 ກໍລະກົດ 1955 ຢູ່ເຂດທີ່ໝັ້ນຂອງການປະຕິວັດແຂວງຫົວພັນ ມາຮອດປັດຈຸບັນແມ່ຍິງໄດ້ປະກອບສ່ວນເຂົ້າໃນການສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງເປັນກ້າວໆ. ສໍາລັບແມ່ຍິງທີ່ເປັນນັກສຶກສາ ໄດ້ເອົາໃຈໃສ່ໃນການປະຕິບັດໜ້າທີ່ການເມືອງ ຕັ້ງໜ້າສຶກສາຄົ້ນຄວ້າຮ່ຳຮຽນ, ເປັນນັກຮຽນດີ-ຮຽນເກັ່ງມີວິໄນ, ສ່ວນສະຫະພັນແມ່ຍິງທີ່ສັງກັດຢູ່ຮາກຖານບ້ານ ກໍໄດ້ສ້າງເສດຖະກິດຄອບຄົວໄດ້ເຄື່ອນໄຫວນຳການຈັດຕັ້ງຢ່າງຈູບຈ້າວຫ້າວຫັນເຂົ້າໃນການສ້າງເສດຖະກິດຄອບຄົວ, ຊຸກຍູ້ສົ່ງເສີມໃຫ້ລູກ-ຜົວປະກອບສ່ວນປະຕິບັດໜ້າທີ່ການເມືອງໄລຍະໃໝ່ໄດ້ເປັນຢ່າງດີ. ຈາກນັ້ນ, ໄດ້ຮັບຟັງການຜ່ານມະຕິກອງປະຊຸມໃຫຍ່ຜູ້ແທນແມ່ຍິງເມືອງວຽງພູຄາຄັ້ງທີ IX, ຜ່ານມູນເຊື້ອວັດທະນະທໍາແມ່ຍິງລາວ ເພື່ອໃຫ້ແມ່ຍິງໄດ້ຮັບຮູ້ເຂົ້າໃຈຄວາມສໍາຄັນໃນການເຕີບໃຫຍ່ຂະຫຍາຍຕົວຂອງແມ່ຍິງລາວ, ກໍາໄດ້ເນື້ອໃນມະຕິກອງປະຊຸມໃຫຍ່ຜູ່ແທນແມ່ຍິງເມືອງຄັ້ງທີ IX, ຮູ້ຮັກສາຮີດຄອງປະເພນີອັນດີງາມຂອງຊາດຂອງເຜົ່າ ໂດຍສະເພາະມູນເຊື້ອວັດທະ ນະທໍາແມ່ຍິງລາວໄວ້ໃຫ້ໝັ້ນຄົງຕະຫຼອດໄປ. ຂ່າວ: ຄໍາປິງ