ສຳນັກຂ່າວສານຫວຽດນາມ ປະຈຳ ປາຣີ ໃຫ້ຮູ້ວ່າ: ນັບຕັ້ງແຕ່ວັນທີ 15 ກໍລະກົດ ຫາ ວັນທີ 13 ສິງຫາ 2024, ເສັ້ນທາງ 185 ກິໂລແມັດ ເທິງເສັ້ນທາງ Ile-de-France, ລວມທັງເສັ້ນທາງວົງແຫວນ ຈະຖືກສະຫງວນໄວ້ສໍາລັບການແຂ່ງຂັນກິລາໂອແລັມປິກ ແລະ ປິດບໍ່ໃຫ້ຍານພາຫະນະທີ່ບໍ່ກ່ຽວຂ້ອງນຳໃຊ້ເສັ້ນທາງດັ່ງກ່າວ.

ຂ່າວລາຍງານວ່າ: ເສັ້ນທາງນີ້ຖືກໝາຍດ້ວຍຄຳວ່າ "ປາຣີ 2024" ຢູ່ພື້ນຖະໜົນ ແລະ ປ້າຍທີ່ປະກາດຢູ່ແຄມທາງທີ່ມີຄຳສັບ ຫຼື ໂລໂກ້ໂອແລັມປິກ. ເສັ້ນທາງທີ່ຖືກສະຫງວນໄວ້ນີ້ແມ່ນເພື່ອແນໃສ່ອຳນວຍຄວາມສະດວກໃນການຂົນສົ່ງນັກກິລາໄປຍັງສະຖານທີ່ການແຂ່ງຂັນ. ມີພຽງແຕ່ພາຫະນະທີ່ຮັບໃຊ້ງານກິລາໂອແລັມປິກ (26 ກໍລະກົດ - 11 ສິງຫາ) ແລະ ພາຣາແລັມປິກ (28 ສິງຫາ - 8 ກັນຍາ) ທີ່ອະນຸຍາດໃຫ້ເດີນທາງໃນເສັ້ນທາງບຸລິມະສິດນີ້. ໂດຍສະເພາະແມ່ນລົດຂອງຄະນະຈັດຕັ້ງ, ລົດບັນທຸກນັກກິລາ, ເຈົ້າໜ້າທີ່ ແລະ ຜູ້ຕັດສິນ. ນອກຈາກນັ້ນ, ລົດແທັກຊີ ແລະ ລົດຂົນສົ່ງສາທາລະນະ ເຊັ່ນ: ຍານພາຫະນະສຸກເສີນ ແລະ ການຮັກສາຄວາມປອດໄພ ຍັງໄດ້ຮັບອະນຸຍາດໃຫ້ນຳໃຊ້ເສັ້ນທາງນີ້.

ນັກທ່ອງທ່ຽວແມ່ນແນະນໍາໃຫ້ໃຊ້ການຂົນສົ່ງສາທາລະນະເພື່ອໄປມາ. ປະຊາຊົນໃນປາຣີໄດ້ຮັບແຈ້ງການຕັ້ງແຕ່ຕົ້ນເດືອນເມສາ ເພື່ອຮັບເອົາບັດເດີນທາງໃນເຂດຈັດງານ. ສະຖານີລົດໄຟເປີດພຽງແຕ່ຖ້ຽວຂາອອກສໍາລັບຜູ້ຖືບັດ.

ໃນລະຫວ່າງການແຂ່ງຂັນກິລາໂອແລັມປິກ ແລະ ພາຣາແລັມປິກ ຊາວປາຣີ ແລະ ນັກທ່ອງທ່ຽວ ສາມາດໃຊ້ແອັບພິເຄຊັນ ການຂົນສົ່ງສາທາລະນະປາຣີ 2024 ເພື່ອເລືອກເສັ້ນທາງທີ່ເໝາະສົມສຳລັບຕົນເອງ.