ໃນວັນທີ 17 ກໍລະກົດຜ່ານມາ ກໍາມາທິການເຜີຍແຜ່ສິລະທໍາ ແລະ ປະຕິບັດກໍາມະຖານ ອົງການພຸດທະສາສະໜາສໍາພັນລາວ (ອພສ) ເມືອງເລົ່າງາມ ແຂວງສາລະວັນ ໄດ້ຈັດພິທີປິດໂຄງການບັນຊາສາມະເນນ ແລະ ອົບຮົມສິລະທໍາໃຫ້ແກ່ເຍົາວະຊົນ-ຊາວໜຸ່ມເມືອງ ຄັ້ງທີ 3 ປະຈໍາປີ 2024 ໄລຍະພັກພາກຮຽນທີ 2 ດ້ວຍຜົນສໍາເລັດ ພາຍຫຼັງດໍາເນີນມາແຕ່ວັນທີ 10 ກໍລະກົດ 2024 ທີ່ວັດອໍາພາວັນ ບ້ານປາກທໍ່ ເມືອງເລົ່າງາມ ໂດຍການເປັນປະທານຂອງພະອາຈານ ພອນສະຫວັນ ທອງມະນີນິນ ຮອງປະທານ ອພສ ເມືອງ, ມີທ່ານ ຄໍາຫວັນ ສີສະໝຸດ ຮອງເຈົ້າເມືອງໆເລົ່າງາມ ຜູ້ຊີ້ນໍາວຽກງານວັດທະນະທໍາ-ສັງຄົມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ພະອາຈານ ຄໍາແສນ ວິໄລສັກ ຫົວໜ້າກໍາມາທິການເຜີຍແຜ່ສິລະທໍາ ແລະ ປະຕິບັດກໍາມະຖານ ອພສ ເມືອງກ່າວ ວ່າ: ການຈັດກິດຈະກຳຄັ້ງນີ້ມີເຍົາວະຊົນ-ຊາວໜຸ່ມ, ນັກຮຽນເຂົ້າຮ່ວມບັນພະຊາ ແລະ ອົບຮົມທັງໝົດ 102 ອົງ, ຊຶ່ງມີວິຊາພຸດທະປະຫວັດ, ທໍາມະປະຍຸກ, ວິໄນພື້ນຖານ, ວິປັດສະນາກໍາມະຖານພື້ນຖານ, ໄຫວ້ພະຮັບສິນ, ວັດທະນະທໍາພື້ນຖານຮີດ 12 ຄອງ 14, ຄວາມຮູ້ພື້ນຖານກ່ຽວກັບສິດທິເດັກ ແລະ ບົດບາດຍິງ-ຊາຍ, ການປ້ອງກັນໄຂ້ຍຸງລາຍ ແລະ ພະຍາດເອດ, ຜົນຮ້າຍຂອງຢາເສບຕິດ, ກົດໝາຍຈາລະຈອນ, ໄຫວ້ພະເຊົ້າແລງ, ນັ່ງສະມາທິ-ຍ່າງຈົມກົມ, ອອກບິນທະບາດຕາມບ້ານຕ່າງໆທຸກເຊົ້າ ແລະ ຄວາມຮູ້ດ້ານອື່ນໆ.

ຜົນການຝຶກອົບຮົມເຮັດໃຫ້ເຍົາວະຊົນ-ຊາວໜຸ່ມ ມີຄວາມເຂົ້າໃຈໃນຫຼັກທໍາຄໍາສັ່ງສອນໃນທາງພຸດທະສາສະໜາເພີ່ມຂຶ້ນ, ຮູ້ສໍາມາຄາລະວະ, ມີມາລະຍາດຕໍ່ໝູ່ເພື່ອນ ແລະ ຜູ້ໃຫຍ່, ຮູ້ຈັກຂາບໄຫວ້ຢ່າງຖືກຕ້ອງ ແລະ ປະເພນີວັດ ທະນະທໍາລາວ, ຮູ້ຫຼັກຂອງສິນຫ້າ ແລະ ສາມາດທ່ອງຈໍາໄດ້, ທ່ອງຈໍາຄໍາໄຫວ້ພະໂດຍຫຍໍ້, ມີຄວາມຮັກ-ຄວາມກະຕັນຍູຕໍ່ຜູ້ໃຫຍ່ ແລະ ຜູ້ມີພະຄຸນ, ເຫັນໄດ້ໂທດໄພຂອງອະບາຍຍະມຸກ ແລະ ສິ່ງເສບຕິດຕ່າງໆ, ມີສຸຂະພາບຈິດທີ່ເຂັ້ມແຂງ, ມີຄວາມຄິດສ້າງສັນ ແລະ ເຫັນປະໂຫຍດຂອງຄວາມສາມັກຄີ-ຄວາມອົດທົນຫຼາຍຂຶ້ນ, ມີຄວາມສໍານຶກ

ໃນບຸນຄຸນພໍ່ແມ່ຫຼາຍຂຶ້ນເຫັນໄດ້ຈາກການຟັງທໍາ. ຈາກນີ້, ການບັນພະຊາ ແລະ ຝຶກອົບຮົມຍັງເປັນແບບຢ່າງໃຫ້ແກ່ຊຸມຊົນອ້ອມຂ້າງທີ່ຈະນໍາໄປຜັນຂະຫຍາຍບົດຮຽນໃນຄັ້ງຕໍ່ໄປ. ໃນພິທີພະອາຈານ ພອນສະຫວັນ ທອງມະນີນິນ ໄດ້ໃຫ້ກຽດມອບໃບຢັ້ງຢືນໃຫ້ສາມະເນນຜູ້ເຂົ້າບວດ. ຂ່າວ: ຈິດຕະສາດ ພະບໍລິບູນ, ພາບ: ອພສ ເມືອງ