ໂດຍ: ພູວັນ
ເພື່ອເປັນການສຶກສາອົບຮົມ, ຄົ້ນຄວ້າ,ຮໍ່າຮຽນເອົາແນວຄິດ,ທັດສະນະຊີ້ນໍາ,ບົດຮຽນການນໍາພາ,ຄຸນສົມບັດສິນທໍາປະຕິວັດອັນຜ່ອງໃສ,ນໍ້າໃຈເສຍສະຫຼະອັນສູງສົ່ງຂອງພັກ, ຂອງຜູ້ນໍາໃນເມື່ອກ່ອນເພື່ອໃຫ້ຄົນຮຸ້ນຫຼັງໄດ້ຮຽນຮູ້ເວົ້າລວມ, ເວົ້າສະພາະສະຫະພັນແມ່ຍິງກໍຄືສະມາຊິກສະຫະພັນແມ່ຍິງແລະແມ່ຍິງລາວບັນດາເຜົ່າໄດ້ຮັບຮູ້, ເຂົ້າໃຈ, ກໍາແໜ້ນແລະນຳມາໝູນໃຊ້ໃຫ້ແທດເໝາະກັບສະພາບຕົວຈິງໃນໄລຍະໃໝ່.
ພັກເຮົາຍາມໃດກໍຖືແມ່ຍິງເປັນກຳລັງແຮງອັນສຳຄັນແລະໃຫຍ່ຫຼວງໃນທຸກຂົງເຂດວຽກງານເນື່ອງຈາກ
ແມ່ຍິງກວມຈຳນວນກວ່າເຄິ່ງໜຶ່ງຂອງພົນລະເມືອງ, ມີບົດບາດສູງໃນດ້ານການຜະລິດແລະເປັນກໍາລັງແຮງພິເສດທີ່ຜະລິດຊັບພະຍາກອນມະນຸດທາງດ້ານປະລິມານແລະຄຸນນະພາບ. ປະທານໄກສອນພົມວິຫານຜູ້ນໍາທີ່ແສນເຄົາລົບຮັກເພິ່ນເຫັນໄດ້ບົດບາດຄວາມສຳຄັນຂອງແມ່ຍິງລາວບັນດາເຜົ່າ, ພ້ອມທັງໄດ້ມີທິດຊີ້ນຳຕໍ່ວຽກງານແມ່ຍິງຢ່າງລະອຽດເພື່ອປຸກລະດົມຂົນຂວາຍເອື້ອຍນ້ອງແມ່ຍິງປະກອບສ່ວນເຂົ້າໃນທຸກຂົງເຂດວຽກງານ.ທ່ານໄດ້ຊີ້ບອກວ່າ:“ກ່ອນອື່ນຕ້ອງເຂົ້າໃຈແຈ້ງວ່າ: ວຽກງານຂົນຂວາຍແມ່ຍິງເປັນໜ້າທີ່ປະຕິວັດຍາວນານອັນໜຶ່ງ, ມັນບໍ່ພຽງແຕ່ກ່ຽວພັນເຖິງເພດຍິງທີ່ກວມເຄິ່ງໜຶ່ງຂອງປະຊາກອນເທົ່ານັ້ນ, ແຕ່ຍັງກ່ຽວຂ້ອງເຖິງທັງໝົດສັງຄົມເວົ້າລວມແຕ່ລະຄອບຄົວເວົ້າສະເພາະ, ທັງຕິດພັນຢ່າງສະໜິດແໜ້ນເຖິງການປົກປັກຮັກສາແລະການຂະຫຍາຍເຊື້ອພັນຂອງຊາດອີກດ້ວຍ.ດັ່ງນັ້ນ, ການຂົນຂວາຍແມ່ຍິງຈຶ່ງກວມເອົາທຸກຂົງເຂດເຊັ່ນ: ການເມືອງ, ເສດຖະກິດ, ສັງຄົມ, ວັດທະນະທຳແລະເຜົ່າຊົນ;ຄົ້ນຄວ້າຜັນຂະຫຍາຍມະຕິຂອງພັກ,ແຜນພັດທະນາເສດຖະກິດ-ສັງຄົມຂອງລັດ,ມະຕິກອງປະຊຸມໃຫຍ່ຂອງແມ່ຍິງລາວທົ່ວປະເທດ,ແຜນພັດທະນາແມ່ຍິງລາວຕິດພັນກັບການຈັດຕັ້ງປະຕິບັດພາລະບົດບາດ, ໜ້າທີ່,ຄວາມຮັບຜິດຊອບຂັ້ນຕົນທີ່ກໍານົດໄວ້ໃນກົດໝາຍ,ກົດລະບຽບຂອງສະຫະພັນແມ່ຍິງລາວໃຫ້ມີປະສິດທິພາບປະສິດທິຜົນດີຂຶ້ນກວ່າເກົ່າ;ເອົາໃຈໃສ່ປັບປຸງການຈັດຕັ້ງ, ປັບປຸງແບບແຜນວິທີນຳພາ, ວິທີເຮັດວຽກຂອງສະຫະພັນແມ່ຍິງແຕ່ລະຂັ້ນໃຫ້ມີຄວາມໜັກແໜ້ນ,ເຂັ້ມແຂງຕິດແທດກັບຮາກຖານການເຮັດວຽກໃຫ້ມີແຜນການ, ແຜນງານ, ມີໂຄງການລະອຽດ,ມີການຊຸກຍູ້,ຕິດຕາມ,ກວດກາ, ປະເມີນຜົນ, ຕີລາຄາສະຫຼຸບຖອນຖອນບົດຮຽນໃນແຕ່ລະໄລຍະຢ່າງພາວະວິໄສ;ປັບປຸງໂຮມບັນດາກົງຈັກທີ່ມີພາລະບົດບາດ,ໜ້າວຽກທີ່ຄ້າຍຄືກັນເຂົ້າກັນເຮັດໃຫ້ກົງຈັກກະທັດຮັດ,ສັບຊ້ອນພະນັກງານໃຫ້ຖືກກັບຄວາມຮູ້,ຄວາມສາມາດ,ພອນສະຫວັນແລະແທດເໝາະກັບຄວາມຮຽກຮ້ອງຕົວຈິງຂອງວຽກງານໃນໄລຍະໃໝ່;ຂະຫຍາຍການຈັດຕັ້ງ,ຂະຫຍາຍສະມາຊິກສະຫະພັນແມ່ຍິງໃຫ້ກວມເອົາແມ່ຍິງຢູ່ຕົວເມືອງ, ເຂດຊົນນະບົດ,ສະຖາບັນການສຶກສາ,ໂຮງຈັກ,ໂຮງງານ,ວິສະຫະກິດ, ຫົວໜ່ວຍທຸລະກິດຂອງລັດແລະເອກະຊົນເພື່ອໃຫ້ແມ່ຍິງໃນທຸກສາຂາອາຊີບໄດ້ເຂົ້າເປັນສະມາຊິກແລະເຂົ້າໃນການຈັດຕັ້ງສະຫະພັນແມ່ຍິງຫຼາຍເທົ່າໃດຍິ່ງດີ;ສືບຕໍ່ຫັນລົງສູ່ຮາກຖານຢ່າງແຂງແຮງ,ປຸກລະດົມຊຸກຍູ້, ຕິດຕາມຂະບວນການ, ກໍາແໜ້ນຮາກຖານ, ປະຕິບັດຂໍ້ກໍານົດ,ກົດລະບຽບ, ຫຼັກການຈັດຕັ້ງແລະການເຄື່ອນໄຫວຂອງສະຫະພັນແມ່ຍິງແຕ່ລະຂັ້ນໃຫ້ເປັນເອກະພາບແຕ່ສູນກາງລົງຮອດທ້ອງຖິ່ນ; ສ້າງເງື່ອນໄຂອໍານວຍຄວາມສະດວກໃຫ້ພະນັກງານເພດຍິງ,ສະມາຊິກສະຫະພັນແມ່ຍິງມີໂອກາດບຳລຸງຍົກລະດັບທິດສະດີການເມືອງ-ການປົກຄອງ, ວິຊາສະເພາະ, ວິຊາຊີບ, ພາສາຕ່າງປະເທດ, ຝຶກອົບຮົມໄລຍະສັ້ນ-ໄລຍະຍາວຢູ່ພາຍໃນແລະຕ່າງປະເທດເພື່ອສ້າງພະນັກງານເພດຍິງທີ່ມີຄວາມຮູ້,ຄວາມສາມາດໃນທຸກຂົງເຂດວຽກງານ;ສ້າງແມ່ຍິງໃຫ້ມີຊີວະທັດແລະໂລກະທັດທີ່ກ້າວໜ້າ, ຮູ້ຮັບເອົາສິ່ງໃໝ່ຢ່າງມີການເລືອກເຟັ້ນ;ສົ່ງເສີມຫົວຄິດປະດິດສ້າງແລະທັດສະນະກ້າຄິດ,ກ້າເຮັດ,ກ້າຮັບຜິດຊອບ;ຕັ້ງໜ້າແກ້ໄຂປະກົດການຫຍໍ້ທໍ້ໃນຖັນແຖວເອື້ອຍນ້ອງແມ່ຍິງເປັນຕົ້ນແນວຄິດຄອງເດີມ, ໃຈນ້ອຍຄັບແຄບ, ອະຄະຕິ,ບໍ່ສົ່ງເສີມຊຶ່ງກັນແລະກັນ, ບໍ່ກ້າປະເຊີນໜ້າກັບສິ່ງທ້າທ້າຍ,ບໍ່ເປັນເຈົ້າການໃນການພັດທະນາຕົນເອງຕ້ອງ
ເດັດດ່ຽວປັບປຸງ,ແກ້ໄຂໃຫ້ໝົດໄປເທື່ອລະກ້າວ;ເກັບກໍາຜົນງານທີ່ພົ້ນເດັ່ນຂອງອົງການຈັດຕັ້ງ,ສະມາຊິກສະຫະພັນແມ່ຍິງ,ແມ່ຍິງລາວບັນດາເຜົ່າເພື່ອຍ້ອງຍໍສັນລະເສີນໃນຂັ້ນຕ່າງໆເພື່ອປຸກລະດົມຂົນຂວາຍຂະບວນການຂອງແມ່ຍິງເຂົ້າໃນການປະຕິບັດພາລະກິດປ່ຽນແປງໃໝ່ຢ່າງມີຫຼັກການຂອງພັກໃຫ້ບັນລຸຄາດໝາຍທີ່ວາງໄວ້.ເສີມຂະຫຍາຍຜົນງານແລະທ່າແຮງບົ່ມຊ້ອນຂອງການນໍາເພດຍິງຮຸ່ນກ່ອນໆ, ແມ່ຍິງລາວບັນດາເຜົ່າໃນໃນການຈັດຕັ້ງປະຕິບັດແນວທາງຂອງພັກ, ລັດຖະທຳມະນູນ, ກົດໝາຍ, ນະໂຍບາຍ, ແຜນພັດທະນາເສດຖະກິດ-ສັງຄົມແຫ່ງຊາດ, ສ້າງວິຖີຊີວິດໃໝ່ເພື່ອພັດທະນາຕົນເອງແລະຄອບຄົວໃຫ້ຫຼຸດພົ້ນຈາກຄວາມທຸກຍາກຫຼ້າຫຼັງ.
ພັກເຮົາຍາມໃດກໍຢຶດໝັ້ນວ່າ“ວຽກງານການເມືອງ-ແນວຄິດເປັນໜ້າທີ່ສໍາຄັນພື້ນຖານ, ເປັນວຽກກົກ,ເປັນວຽກງານທີ່ຕ້ອງເຮັດກ່ອນ, ເຮັດເປັນປະຈຳແລະສອດຫ້ອຍໄປທຸກຂົງເຂດວຽກງານຂອງພັກ-ລັດ,ຂອງອົງການຈັດຕັ້ງມະຫາຊົນແລະອົງການຈັດຕັ້ງທາງສັງຄົມ, ເປັນປັດໄຈຮັບປະກັນທຸກໄຊຊະນະຂອງການປະຕິວັດ”ວຽກງານການເມືອງ-ແນວຄິດຖືໄດ້ວ່າເປັນສະໜາມຮົບແຖວໜ້າອັນໜຶ່ງໃນວຽກງານຂອງພັກເຮົາໃນໄລຍະໃໝ່, ແນວຮົບນີ້ມັນຕ້ອງສອດຫ້ອຍເຂົ້າໄປໝົດທຸກການເຄື່ອນໄຫວຂອງພັກ,ຂອງລັດ, ຂອງອົງການຈັດຕັ້ງມະຫາຊົນ,ຂອງທຸກຊັ້ນຄົນໃນສັງຄົມເໝືອນດັ່ງສາຍເລືອດທີ່ຫຼໍ່ລ້ຽງຮ່າງກາຍຂອງຄົນເຮົາ; ຢາກເຮັດວຽກງານການເມືອງ-ແນວຄິດໄດ້ດີສາມາດເອົາຊະນະໃນສະໜາມຮົບນີ້ໄດ້ຢ່າງເປັນຮູບປະທໍາ,ກ່ອນອື່ນການເຄື່ອນໄຫວຂອງພະນັກງານ,ສະມາຊິກພັກເຮົາແຕ່ເທິງລົງລຸ່ມຕ້ອງປະຕິບັດຄໍາຂວັນທີ່ວ່າ: “ເວົ້າຕ້ອງໄປຄຽງຄູ່ກັບການປະຕິບັດ” ຫຼືເວົ້າງ່າຍໆວ່າ: “ເວົ້າແລ້ວຕ້ອງເຮັດຄືກັບເວົ້າ”,ເຮັດຕ້ອງເຮັດໃຫ້ຖືກ, ເຮັດໃຫ້ເປັນຮູບປະທໍາ, ເຮັດໃຫ້ເກີດດອກອອກຜົນແທ້.
ອົງການຈັດຕັ້ງສະຫະພັນແມ່ຍິງລາວໃນຖານະເປັນອົງການມະຫາຊົນຂອງພັກຍາມໃດກໍໄດ້ຖືສໍາຄັນແລະເອົາໃຈໃສ່ຕໍ່ວຽກງານສຶກສາອົບຮົມການເມືອງ-ນໍາພາແນວຄິດໃຫ້ຖັນແຖວສະມາຊິກແມ່ຍິງ, ແມ່ຍິງລາວບັນດາເຜົ່າໃຫ້ມີຄວາມເຊື່ອໝັ້ນຕໍ່ການນໍາພາຂອງພັກ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີສະຕິຕື່ນຕົວປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມີຄວາມຮັບຜິດຊອບໃນການປະຕິບັດພັນທະ, ໜ້າທີ່ຂອງພົນລະເມືອງເວົ້າລວມ, ເວົ້າສະເພາະແມ່ນການປຸກລະດົມສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າເຂົ້າຮ່ວມເຊື່ອມຊຶມເອກະສານຕ່າງໆ,ນໍາພາທາງດ້ານແນວຄິດດ້ວຍຫຼາຍຮູບແບບເໝາະສົມແຕ່ລະກຸ່ມເປົ້າໝາຍເພື່ອຮັບປະກັນໃຫ້ການສ້າງສະມາຊິກແມ່ຍິງແລະແມ່ຍິງລາວບັນດາເຜົ່າເປັນພົນລະເມືອງດີ,ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ.
