ຂ່າວສານຫວຽດນາມລາຍງານວ່າ: ເມື່ອບໍ່ດົນມານີ້, ສະພາບໍລິຫານຂອງສະຫະພາບອາຟຣິກາ (AU) ໄດ້ອະນຸມັດຍຸດທະສາດປັນຍາປະດິດ (AI) ທີ່ເປັນຈຸດເດັ່ນ ແລະ ຍຸດທະສາດເຕັກໂນໂລຊີດີຈີຕອນ ຂອງ ອາຟຣິກາ ເພື່ອເລັ່ງການຫັນປ່ຽນທາງດີຈີຕອນຂອງທະວີບໂດຍການນຳໃຊ້ທ່າແຮງຂອງເຕັກໂນໂລຊີດີຈີຕອນໃໝ່.

ຂ່າວລະບຸວ່າ: ກ່າວຄຳເຫັນຕໍ່ນັກຂ່າວຢູ່ນອກກອງປະຊຸມສະໄໝສາມັນ ເທື່ອທີ 45 ຂອງສະພາບໍລິຫານ AU ຢູ່ນະຄອນ ອາກຣາຂອງການາ, ທ່ານນາງ ອາມານິ ອາບູ ເຊດ ຫົວໜ້າຄະນະກຳມະການພື້ນຖານໂຄງລ່າງ, ພະລັງງານ ແລະ ດີຈີຕອນ ຂອງ AU ໃຫ້ຮູ້ວ່າ: ສະພາໄດ້ຮັບຮອງເອົາຍຸດທະສາດຂອງ AU ກ່ຽວກັບ AI ແລະ ການນໍາໃຊ້ຍຸດທະສາດເຕັກໂນໂລຊີດີຈີຕອນເພື່ອການພັດທະນາ ອາຟຣິກາ.

ທ່ານນາງ ອາມານິ ອາບູ ເຊດ ກ່າວວ່າ: ຍຸດທະສາດເຫຼົ່ານີ້ຈະໃຫ້ທິດທາງໃນການນຳໃຊ້ເຕັກໂນໂລຊີເພື່ອຊອກຫາມາດຕະການແກ້ໄຂບັນດາສິ່ງທ້າທາຍຂອງອາຟຣິກາ, ຊ່ວຍເລັ່ງລັດຫຼາຍໂຄງການ ພ້ອມທັງວິທີການປ້ອງກັນທີ່ຈຳເປັນເພື່ອສະກັດກັ້ນການນຳໃຊ້ເຕັກໂນໂລຊີທີ່ບໍ່ຖືກຕ້ອງ.

ອີງຕາມຄະນະກໍາມະການ AU, ຍຸດທະສາດເຫຼົ່ານີ້ຈະສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການພັດທະນາ ແລະ ການນໍາໃຊ້ເຕັກໂນໂລຊີດີຈີຕອນ. ນະໂຍບາຍຂອງ AU ຈະຊີ້ນໍາລັດຖະບານຂອງບັນດາສະມາຊິກໃນການພັດທະນານະໂຍບາຍ ແລະ ລະບຽບການທີ່ຈໍາເປັນສໍາລັບຂະແໜງການນີ້.