ກອງບັນຊາການປ້ອງກັນຄວາມສະຫງົບ (ປກສ) ເມືອງອຸທຸມພອນ ແຂວງສະຫວັນນະເຂດ ໄດ້ສຶກສາອົບຮົມກ່າວເຕືອນຮ້ານທີ່ຈໍາໜ່າຍນໍ້າກະທ້ອມ ແລະ ກຸ່ມມົ້ວສຸມສິ່ງເສບຕິດຂຶ້ນໃນວັນທີ 19 ກໍລະກົດຜ່ານມາ ທີ່ກອງບັນຊາການ ປກສ ເມືອງ ໂດຍການເປັນປະທານຂອງທ່ານ ພັນໂທ ສວນ ໄຊຍະລິນ ຮອງຫົວໜ້າກອງບັນຊາການ ປກສ ເມືອງ. ຊຶ່ງໄດ້ສຶກສາອົບຮົມຮ້ານຈໍາໜ່າຍນໍ້າກະທ້ອມ ແລະ ກຸ່ມມົ້ວສຸມສິ່ງເສບຕິດຈໍານວນ 20 ຄົນ, ຍິງ 2 ຄົນ.

ທ່ານ ພັນຕີ ທອງມີ ເກດບຸດສາ ຮອງຫົວໜ້າພະແນກສະກັດກັ້ນ-ຕ້ານຢາເສບຕິດ ກອງບັນຊາການ ປກສ ເມືອງໃຫ້ຮູ້ວ່າ: ສະເພາະຮ້ານຈໍາໜ່າຍນໍ້າກະທ້ອມທາງເຈົ້າໜ້າທີ່ໄດ້ລົງໄປຢຶດຢູ່ພາຍໃນເມືອງມີ 2 ຈຸດ, ມີທັງໝົດ 5 ຮ້ານ, ໃນນີ້ຈຸດທີໜຶ່ງຢຶດໃບກະທ້ອມໄດ້ 10 ກິໂລເຄິ່ງ, ນໍ້າກະທ້ອມ ( ປຸງແຕ່ງສໍາເລັດແລ້ວ ) 29 ຕຸກ, ຢາປະສົມ 17 ກວດ, ກ່ອງຢາກວດເປົ່າ 93 ກວດ, ໝໍ້ຕົ້ມ 1 ໝໍ້, ຈຸດທີສອງນໍ້າກະທ້ອມ ( ປຸງສໍາເລັດແລ້ວ ) 44 ຕຸກ, ນໍ້າຢາປະສົມ 3 ກວດ ແລະ ໃບກະທ້ອມສົດ 4 ຖົງນ້ອຍ.

ໂອກາດນີ້, ທ່ານ ພັນໂທ ສວນ ໄຊຍະລິນ ໄດ້ເນັ້ນໃຫ້ຜູ້ຈໍາໜ່າຍ ແລະ ກຸ່ມມົ້ວສຸມສິ່ງເສບຕິດເອົາໃຈ ໃສ່ປ່ຽນແປງ ບໍ່ເຮັດໃນສິ່ງທີ່ຜິດຕໍ່ລະບຽບກົດໝາຍບ້ານເມືອງ ພ້ອມທັງເຮັດບົດບັນທຶກກັບຜູ້ກ່ຽວ ກໍຄືຜູ້ປົກຄອງ, ຖ້າຫາກມີຄັ້ງທີສອງອີກຈະໄດ້ດໍາເນີນຄະດີຕາມລະບຽບກົດໝາຍບ້ານເມືອງຢ່າງເຂັ້ມງວດ. ບັນຫາທີ່ພົ້ນເດັ່ນໃນສັງຄົມປັດຈຸບັນ ແມ່ນບັນຫາຢາເສບຕິດ ບໍ່ວ່າຈະເປັນນໍ້າກະທ້ອມ, ຢາສູບໄຟຟ້າ, ໝາກປຸ້ມເປົ້າ, ຄໍລາເຈນ ສ້າງຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມເຊັ່ນ: ຂັບຂີ່ລົດໄວ, ໃຊ້ສຽງດັງ, ປຸ້ນຈີ້, ຊີງຊັບ. ສະນັ້ນ, ຈຶ່ງຢາກໃຫ້ຜູ້ທີ່ໄດ້ຮັບການສຶກສາອົບຮົມກ່າວເຕື່ອນຄັ້ງນີ້ ຈົ່ງຢຸດເຊົາຕໍ່ກັບສິ່ງດັ່ງກ່າວ ມັນບໍ່ມີຜົນດີຫຍັງຕໍ່ກັບເຮົາ ກໍຄືສັງຄົມ. ຂ່າວ: ບຸນຊູ ພົມມະເທບ