ໃນວັນທີ 19 ກໍລະກົດຜ່ານມາ ທີ່ສູນການຄ້າສະຫວັນ-ໄອເຕັກ ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 69 ປີ ( 20 ກໍລະກົດ 1955-20 ກໍລະກົດ 2024 ) ພາຍໃຕ້ຄຳຂວັນ: "ພັດ ທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ" ໃຫ້ກຽດເຂົ້າຮ່ວມເປັນປະທານຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ມີທ່ານນາງ ຫຼິງທອງ ແສງຕາວັນ ຮອງເຈົ້າແຂວງ, ທ່ານນາງ ວຽງສະໝອນ ພະທິທັກ ວ່າການປະທານສະຫະພັນແມ່ຍິງແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ບຸນໂຈມ ອຸບົນປະເສີດ ໄດ້ຫວນຄືນການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ນັບແຕ່ມື້ສ້າງຕັ້ງເປັນຕົ້ນມາ, ອົງການຈັດຕັ້ງແມ່ຍິງກໍໄດ້ເຄື່ອນໄຫວຕາມພາລະບົດບາດທີ່ໄດ້ກຳນົດໄວ້ໃນກົດລະບຽບ, ໂຄງການດຳເນີນງານຂອງຕົນ ແລະ ໄດ້ປັບປຸງໃຫ້ສອດຄ່ອງກັບຄວາມຮຽກຮ້ອງຕ້ອງການໜ້າທີ່ການເມືອງຂອງພັກໃນແຕ່ລະໄລຍະ. ມາຮອດວັນທີ 6 ມັງກອນ 1956 ກອງປະຊຸມໃຫຍ່ແນວລາວອິດສະຫຼະທົ່ວປະເທດໄດ້ໄຂຂຶ້ນ ແລະ ໄດ້ຕົກລົງປ່ຽນຊື່ຈາກແນວລາວອິດສະຫຼະມາເປັນແນວລາວຮັກຊາດ. ໃນເວລານັ້ນ, ກຳມະການສູນກາງແນວລາວຮັກຊາດທັງຍິງ ແລະ ຊາຍ ຕ່າງກໍສະໜັບສະໜູນໃຫ້ແມ່ຍິງລາວບັນ ດາເຜົ່າໄດ້ມີອົງການຈັດຕັ້ງສະເພາະຂອງຕົນ ແລະ ໄດ້ປຸກລະດົມຊຸກຍູ້ໃຫ້ແມ່ຍິງເຂົ້າການຈັດຕັ້ງສະເພາະຂອງເພດຍິງ, ເພາະວ່າການຈັດຕັ້ງແມ່ຍິງຜ່ານມາ ແມ່ນຂຶ້ນກັບອົງການແນວໂຮມ, ແຕ່ອົງການແນວໂຮມພັດປະກອບດ້ວຍຫຼາຍຊັ້ນຄົນ, ມີອາຍຸກະສຽນແຕກຕ່າງກັນ ສ່ວນຫຼາຍແມ່ນຜູ້ຊົງຄຸນວຸດທິຜູ້ມີອາຍຸສູງ ແລະ ມີຖານະບົດບາດໃນສັງຄົມ. ດັ່ງນັ້ນ, ໃນເດືອນມັງກອນປີ 1956 ສະມາຄົມແມ່ຍິງລາວຮັກຊາດ ກໍໄດ້ຮັບການສ້າງຕັ້ງຂຶ້ນ. ສະມາ ຄົມແມ່ຍິງລາວຮັກຊາດ ແມ່ນສືບທອດມາຈາກໜ່ວຍຄົ້ນຄວ້າວຽກງານແມ່ຍິງ, ອະດີດຄະນະນໍາໜ່ວຍຄົ້ນຄວ້າວຽກງານແມ່ຍິງ ກໍໄດ້ຖືກແຕ່ງຕັ້ງໃຫ້ສືບຕໍ່ນໍາພາສະມາຄົມແມ່ຍິງລາວຮັກຊາດ ແຕ່ໃນຖານະບົດບາດສູງກວ່າ, ຄະນະປະກອບມີ 3 ທ່ານຄື: ທ່ານນາງ ຄຳຫຼ້າ ວົງສັກ ເປັນຫົວໜ້າ, ທ່ານນາງ ຄຳສຸກ ວົງວິຈິດ ແລະ ທ່ານນາງ ຄຳແພງ ບຸບຜາ ເປັນຮອງ, ຈາກນັ້ນກໍໄດ້ຂະຫຍາຍສະມາຄົມແມ່ຍິງລາວຮັກຊາດ ລົງສູ່ຮາກຖານເພື່ອປ່ຽນແທນໜ່ວຍຍຸວັນນາລີ, ໜ່ວຍເອື້ອຍນັກຮົບ ແລະ ໜ່ວຍແມ່ນັກຮົບທີ່ໄດ້ຮັບການຈັດຕັ້ງ ແລະ ໄດ້ເຄື່ອນໄຫວປະຕິວັດມາແຕ່ກ່ອນນັ້ນ.

ໃນພິທີໄດ້ມີການເດີນແບບອາພອນເຜົ່າ, ມີການປະກວດອາຫານພື້ນບ້ານທີ່ເປັນເອກະລັກຂອງທ້ອງຖິ່ນ ໃຫ້ກຽດມອບລາງວັນ ແລະ ໃບຍ້ອງຍໍໂດຍທ່ານເຈົ້າແຂວງສະຫວັນນະເຂດ, ໂອກາດນີ້, ທ່ານຍັງໄດ້ມອບເງິນ ສົດຈໍານວນ 10 ລ້ານກີບໃຫ້ສະຫະພັນແມ່ຍິງແຂວງ ເພື່ອຊຸກຍູ້ສົ່ງເສີມກຸ່ມເອື້ອຍ-ນ້ອງໜ່ວຍສະຫະພັນແມ່ຍິງທີ່ປະກວດອາຫານ ເພື່ອນໍາໄປຈັດຕັ້ງປະຕິບັດວຽກງານສ້າງຄວາມເຂັ້ມແຂງໃຫ້ອົງການຈັດຕັ້ງແມ່ຍິງ. ຂ່າວ: ສະຫວັນນະເຂດ