ຄ້າຍມວຍສໍມະນີ ບ້ານໂນນສູງ ເມືອງເລົ່າງາມ ແຂວງສາລະວັນ ໄດ້ຈັດພີທີເປີດງານກິລາຊົກມວຍປະຈໍາປີ 2024 ຕິດພັນກັບການສະເຫຼີມສະຫຼອງວັນກິລາກາຍະກໍາແຫ່ງຊາດ (13/7/1966-13/7/2024) ຄົບຮອບ 58 ປີຂຶ້ນໃນວັນທີ 19 ກໍລະກົດຜ່ານມາ ໂດຍການເຂົ້າຮ່ວມເປັນປະທານຂອງທ່ານ ພິດສະໄໝ ແກ້ວວົງສັກ ຮອງເລຂາພັກເມືອງ ຜູ້ຊີ້ນໍາວຽກງານການເມືອງ-ແນວຄິດ, ມີທ່ານ ສົມຄິດ ວົງຊາລີ ຮອງຫົວໝ້າພະແນກໂຍທາທິການ ແລະ ຂົນສົ່ງ (ຍທຂ) ແຂວງ ຮອງປະທານສະຫະພັນກິລາຊົກມວຍແຂວງ ພ້ອມດ້ວຍພາກສ່ວນກ່ຽວຂ້ອງ ແລະ ມວນຊົນເຂົ້າຮ່ວມຊົມ ຮ່ວມເຊຍຢ່າງເປັນຂະບວນການຟົດຟື້ນ.

ທ່ານ ສົມຄິດ ວົງຊາລີ ກ່າວວ່າ: ການຈັດງານຄັ້ງນີ້ ເພື່ອເປີດລະດູການແຂ່ງຂັນກິລາຊົກມວຍປະຈໍາປີ 2024 ຂອງແຂວງ ທັງເປັນການສະເຫຼີມສະຫຼອງວັນກິລາກາຍະກໍາແຫ່ງຊາດ ຄົບຮອບ 58 ປີ, ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນຂອງແຂວງ, ຂອງເມືອງໃຫ້ເປັນຂະບວນຟົດຟື້ນ ເພື່ອຄັດເລືອກເອົານັກກິລາທີ່ດີເດັ່ນມີສີມືສຸຂະພາບແຂງແຮງ ເປັນຕົວແທນຂອງແຂວງເພື່ອກະກຽມເຂົ້າຮ່ວມງານມະຫາກໍາກິລາແຫ່ງຊາດຄັ້ງທີ 12 ໃນປີ 2025 ທີ່ນະຄອນຫຼວງວຽງຈັນ. ການແຂ່ງຂັນຄັ້ງນີ້ມີນັກກິລາເຂົ້າຮ່ວມຈາກສະຫະພັນມວຍ 3 ແຂວງພາກໃຕ້ຄື: ແຂວງສາລະວັນ, ຈໍາປາສັກ ແລະ ແຂວງເຊກອງ, ໃນເກນອາຍຸ 5-35 ປີມີທັງໝົດ 16 ຄູ່ເພື່ອຊຸກຍູ້ສົ່ງເສີມປູກຈິດສໍານຶກໃຫ້ລູກຫຼານຊາວໝຸ່ມ-ເຍົາວະຊົນທຸກຄົນ ຫັນມາອອກກໍາລັງກາຍເພື່ອຫ່າງໄກສິ່ງເສບຕິດ ແລະ ປະກົດການຫຍໍ້ທໍ້ຕ່າງໆ ແລກປ່ຽນບົດຮຽນຊຶ່ງກັນ ແລະ ກັນດ້ານຍຸດທະວີທີ-ດ້ານເຕັກນິກ, ສີມືການຊົກມວຍເພື່ອພັດທະນາຍົກລະດັບໃຫ້ນັກກິລາ ມີຄວາມກ້າວໝ້າທາງດ້ານປະລິມານ-ຄຸນນະພາບ ເພື່ອກ້າວເຂົ້າຮ່ວມການແຂ່ງຂັນໃນລະດັບຊາດຕໍ່ໄປ. ຮຽກຮ້ອງມາຍັງນັກກິລາທຸກໆຄົນ ຈົ່ງປະຕິບັດກົດລະບຽບຕ່າງໆຂອງການແຂ່ງຂັນຢ່າງເຂັ້ມງວດ, ມີຄວາມບຸກບືນຫ້າວຫັນອົດທົນ ມີນໍ້າໃຈນັກກິລາຢ່າງແທ້ຈິງ. ເນັ້ນໝັກໃຫ້ຄະນະກໍາມະການຈັດງານແຂ່ງຂັນ ຈົ່ງເອົາໃຈ ໃສ່ຄຸ້ມຄອງການແຂ່ງຂັນກິລາໃຫ້ມີຄວາມຖືກຕ້ອງສອດຄ່ອງກັບກົດລະບຽບກິລາວາງອອກ ມີຄວາມຍຸຕິທໍາ, ປອດໃສ ມີຄວາມສະຫງົບ ເປັນລະບຽບ ປອດໄຟ. ຂ່າວ-ພາບ: ພອນໄຊ ແກ້ວມະນີ