ຂ່າວສານຫວຽດນາມລາຍງານວ່າ: ໜຶ່ງອາທິດກ່ອນການເປີດງານກິລາ ໂອແລັມປິກ ປາຣີ ປີ 2024, ຝຣັ່ງ ໄດ້ຈັດກຳລັງຮັກສາຄວາມປອດໄພຢູ່ປາຣີ ເພື່ອຮັບປະກັນຄວາມປອດໄພໃຫ້ແກ່ພິທີເປີດງານ.

ຂ່າວລະບຸວ່າ: ນັບແຕ່ວັນທີ 19 ກໍລະກົດເປັນຕົ້ນໄປ, ຖະໜົນຫົນທາງລຽບຕາມແມ່ນ້ຳເຊນ (Seine) ໄດ້ຖືກຕຳຫຼວດປາຣີ ຕິດຕັ້ງຮົ້ວກີດຂວາງພາຫະນະ, ບຸກຄົນ, ແຂກທ່ອງທ່ຽວ ບໍ່ໃຫ້ສາມາດເຂົ້າເຖິງເຂດຮັກສາຄວາມປອດໄພໃກ້ແມ່ນ້ຳ Seine, ເຂດອ້ອມຂ້າງທີ່ຈະຈັດພິທີເປີດງານກິລາໂອແລັມປິກ ປາຣີ 2024. ສະເພາະຜູ້ທີ່ໄດ້ລົງທະບຽນດ້ວຍລະຫັດ QR ເທົ່ານັ້ນທີ່ຈະສາມາດເຂົ້າ ແລະ ອອກ ເຂດເຫຼົ່ານີ້ໄດ້.

ປາຣີ ມີຊື່ສຽງກ່ຽວກັບແມ່ນ້ໍາເຊນ ທີ່ໄຫຼຜ່ານໃຈກາງເມືອງ. ສອງຝັ່ງແມ່ນ້ຳມີສະຖາປັດຕະຍະກຳທີ່ມີຊື່ສຽງ ແລະ ເກົ່າແກ່. ການລ່ອງເຮືອຢູ່ແມ່ນ້ໍາເຊນ ເພື່ອຊົມທິວທັດທີ່ສວຍງາມຂອງປາຣີ ແມ່ນຈຸດເດັ່ນທີ່ນິຍົມຂອງນັກທ່ອງທ່ຽວພາຍໃນ ແລະ ຕ່າງປະເທດຈໍານວນຫຼາຍ. ດ້ວຍຈຸດທີ່ດຶງດູດໃຈນີ້, ຄະນະຈັດຕັ້ງງານກິລາໂອແລັມປິກ ປາຣີ 2024 ໄດ້ຕັດສິນໃຈເລືອກເອົາແມ່ນ້ຳເຊນ ເປັນສະຖານທີ່ຈັດງານກິລາໂອແລັມປິກ. ຕາມການຄາດຄະເນພິທີໃນຕອນຄ່ຳວັນທີ 26 ກໍລະກົດ ນີ້, ນັກກິລານັບພັນຄົນຂຶ້ນເຮືອລ່ອງຕາມລຳແມ່ນ້ຳເຊນ ໄລຍະທາງ 6 ກິໂລແມັດ ໄປສູ່ຫໍໄອເຟລ (Eiffel) ແລະ ມີຜູ້ເຂົ້າຮ່ວມປະມານ 320.000 ຄົນ. ນີ້ຖືວ່າເປັນຄວາມທ້າທາຍສຳລັບໜ່ວຍງານດ້ານຄວາມປອດໄພໃນການຮັບຮອງຄວາມປອດໄພຂອງນັກກິລາ ແລະ ຜູ້ຊົມ.

ໃນໄລຍະງານກິລາໂອແລັມປິກ ຈະມີຕຳຫຼວດປະມານ 35.000 ຄົນ ແລະ ທະຫານເຄື່ອນທີ່ 18.000 ຄົນ ເພື່ອຮັບປະກັນຄວາມປອດໄພໃຫ້ແກ່ງານກິລາທີ່ໃຫຍ່ທີ່ສຸດໃນໂລກ. ບັນດາກອງກຳລັງພິເສດຍັງໄດ້ນຳໃຊ້ເຕັກໂນໂລຊີສູງ ເຊັ່ນ: ໂດຣນແລະ ເຄື່ອງໂຊນາໂດຍປະສານສົມທົບກັບບັນດານັກດຳນ້ຳ, ກຸ່ມລາດຕະເວນຢູ່ລຽບຕາມແມ່ນ້ຳເຊນ ແລະ ໝາດົມກິ່ນ. ກອງທັບ ພ້ອມທີ່ຈະຕອບໂຕ້ໄພຂົ່ມຂູ່ທີ່ອາດເກີດຂຶ້ນຢູ່ໃຕ້ນ້ຳ, ເທິງນ້ຳ, ເທິງບົກ ຫຼື ເທິງອາກາດອ້ອມເຂດແມ່ນ້ຳເຊນ. ມີການຕິດຕັ້ງກ້ອງວົງຈອນປິດໃໝ່ ປະມານ 400 ເຄື່ອງ ຢູ່ໃນນະຄອນຫຼວງ ແລະ ອີກປະມານ 500 ເຄື່ອງຢູ່ເຂດຕົວເມືອງອ້ອມຂ້າງ.