ໃນຕອນເຊົ້າຂອງວັນທີ 24 ກໍລະກົດນີ້, ໄດ້ເກີດໄພນໍ້າຖ້ວມຢູ່ບໍລິເວນບ້ານເມືອງໝ້ວຍ, ບ້ານຫ້ວຍໂກນ ແລະ ບ້ານໃກ້ຄຽງ ຢູ່ກຸ່ມເມືອງໝ້ວຍ ເມືອງວຽງຄໍາ ແຂວງຫຼວງພະບາງ ເນື່ອງຈາກມີຝົນຕົກໜັກຕິດຕໍ່ກັນຫຼາຍມື້ ເຮັດໃຫ້ປະລິມານ ນໍ້າເຊືອງ, ນໍ້າຫ້ວຍໂກນ, ຫ້ວຍມ້າ ແລະ ຫ້ວຍນໍ້າຕ່າງໆເພີ່ມຂຶ້ນຫຼາຍ ຊຶ່ງໄດ້ສົ່ງຜົນກະທົບຕໍ່ ປະຊາຊົນທີ່ດຳລົງຊີວິດ ຢູ່ບໍລິເວນດັ່ງກ່າວ.

ປັດຈຸບັນ, ອົງການປົກຄອງເມືອງ ໄດ້ລະດົມກຳລັງເພື່ອເຂົ້າຊ່ວຍເຫຼືອບັນເທົາທຸກ ໃນເບື້ອງຕົ້ນ ພ້ອມທັງໄດ້ແຈ້ງໃຫ້ປະຊາຊົນທີ່ດຳລົງຊີວິດຢູ່ຕາມແຄມນໍ້າເຊືອງ ຈົ່ງມີສະຕິ ແລະ ມ້ຽນເຄື່ອງຂອງທີ່ມີຄ່າ ໄວ້ບ່ອນປອດໄພ, ສ່ວນຂໍ້ມູນຜົນເສຍຫາຍຕົວຈິງຈະລາຍງານໃຫ້ຮູ້ພາຍຫຼັງສຳເລັດການເກັບກຳຂໍ້ມູນ.

ດັ່ງນັ້ນ, ຜູ້ປະສານງານກາແດງ ເມືອງວຽງຄໍາ ໃນນາມຜູ້ຮັບຜິດຊອບວຽກງານມະນຸດສະທໍາ ແລະ ຊ່ວຍເຫຼືອບັນເທົາທຸກເບື້ອງຕົ້ນ ຈຶ່ງຂໍແຈ້ງມາຍັງປະຊາຊົນທົ່ວເມືອງວຽງຄໍາ ແລະ ພາກສ່ວນອື່ນໆທີ່ມີຈິດໃຈ ຢາກໃຫ້ການຊ່ວຍເຫຼືອປະຊາຊົນ ໃນຂອບເຂດບ້ານດັ່ງກ່າວ ໂດຍສະເພາະ ວັດຖຸປັດໃຈ ຫຼື ຈະເປັນເຂົ້າສານ, ອາຫານແຫ້ງ, ນໍ້າດື່ມ ແລະ ອື່ນໆ ທີ່ຈໍາເປັນນໍາໃຊ້ເຂົ້າໃນຊີວິດປະຈໍາວັນ ເພື່ອໄປຊ່ວຍເຫຼືອ ປະຊາຊົນ ບ້ານເມືອງໝ້ວຍ ໂດຍຜ່ານຜູ້ປະສານງານກາເເດງ ເມືອງວຽງຄໍາ ແຂວງຫຼວງພະບາງ.

ຈຸດຮັບການຊ່ວຍເຫຼືອ ຫ້ອງວ່າການເມືອງວຽງຄໍາ ແຂວງຫຼວງພະບາງ ເບີໂທ: 020 9755 5684 ຜູ້ໃດຢາກຊ່ວຍເຫຼືອ ແມ່ນມາມອບໃຫ້ຢູ່ຫ້ອງວ່າການ ເພື່ອບັນທຶກລາຍລະອຽດ ຂອງການຊ່ວຍເຫຼືອດັ່ງກ່າວ.

(ຂ່າວ: ຫຼວງພະບາງ)