ໃນເວລາ16:30ຂອງ26ກໍລະກົດຜ່ານມາ, ທ່ານອາລຸນໄຊເຈົ້າແຂວງຈໍາປາສັກພ້ອມຄະນະມີເຈົ້ານະຄອນປາກເຊ, ພະແນກໂຍທາທິການແລະຂົນສົ່ງ, ສົມທົບກັບການປົກຄອງບ້ານຫ້ວຍຍາງຄຳໄດ້ລົງເຄື່ອນໄຫວກວດກາສຳຫຼວດແລະພ້ອມທັງສັງລວມສະພາບບັນຫາແລະສະເໜີມາດຕະການແກ້ໄຂນໍ້າຖ້ວມຂັງເສັ້ນທາງຂ້າງກອງບັນຊາການທະຫານແຂວງຢ່າງຮີບດ່ວນ, ຊຶ່ງເຈົ້າແຂວງຈໍາປາສັກກໍໄດ້ມີທິດຊີ້ນໍາຕໍ່ການແກ້ໄຂຈຸດດັ່ງກ່າວ:1.ໃຫ້ນະຄອນປາກເຊລຸລ່ວງສົມທົບການຮ່ວມມືກັບການປົກຄອງບ້ານ, ເພື່ອນໍາພາປະຊາຊົນພາຍໃນບ້ານຮ່ວມກັນປະຕິບັດການເຈາະຄອງລະບາຍນໍ້າແກ້ໄຂພື້ນທີ່ທີ່ມີນ້ຳຖ້ວມຂັງ; 2.ໃຫ້ປະຕິບັດຢ່າງຮີບດ່ວນໃນວັນທີ27ກໍລະກົດ2024, ໂດຍໃຫ້ພະແນກໂຍທາທິການແລະຂົນສົ່ງສົມທົບກັບພາກສ່ວນກ່ຽວຂ້ອງເພື່ອກວດກາດ້ານເຕັກນິກໃນການສຳຫຼວດເຈາະຄອງ, ຈົກຮ່ອງລະບາຍນໍ້າແລະເຮັດສັນຍາລັກໝາຍເພື່ອຮັບປະກັນຄວາມປອດໄພການສັນຈອນ.

3. ⁠ສ່ວນຕິດພັນກັບກຳແພງໂຮງຮຽນກິນນອນຊົນເຜົ່າໃຫ້ນະຄອນປະສານພົວພັນເພື່ອລຸລ່ວງໃຫ້ຮັບຊາບໃນການລວງຄອງເບື້ອງໃນຮົ້ວຂອງໂຮງຮຽນ.(ຂ່າວ: ຈຳປາສັກ)