ພິທີເຊັນບົດບັນທືກຄວາມເຂົ້າໃຈ MOU ວ່າດ້ວຍການສໍາຫຼວດ, ເກັບກໍາຂໍ້ມູນເບື້ອງຕົ້ນ ແລະ ສືກສາຄວາມເປັນໄປໄດ້ທາງດ້ານເສດຖະກິດ-ເຕັກນິກໂຄງການສົ່ງເສີມປູກໄມ້ວິກ, ສ້າງຕັ້ງໂຮງງານແປຮູບໄມ້ວິກເປັນສີນຄ້າ ແລະ ສ້າງຕັ້ງໂຮງງານປຸຍຊິວະພາບຢູ່ແຂວງຫຼວງນ້ຳທາ ລະຫວ່າງ ພະແນກແຜນການ ແລະ ການລົງທືນແຂວງ ກັບ ບໍລິສັດພັດທະນາສາມລ່ຽມເສດຖະກິດຄົບວົງຈອນ ຈໍາກັດຜູ້ດຽວ, ໄດ້ຈັດຂື້ນໃນວັນທີ 26 ກໍລະກົດ 2024 ທີ່ແຂວງຫຼວງນໍ້າທາ, ໂດຍການເຂົ້າຮ່ວມຂອງ ທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີທ່ານ ວົງມະນີ ເພື່ອປະຊາ ຫົວໜ້າພະແນກແຜນການ ແລະ ການລົງທຶນແຂວງ,ທ່ານ ພູທອນ ສິດສຸວົງ ປະທານບໍລິສັດ ພັດທະນາສາມຫຼ່ຽມເສດຖະກິດຄົບວົງຈອນ ຈຳກັດຜູ້ດຽວ, ມີພາກສ່ວນກ່ຽວຂ້ອງເຂົ້າຮ່ວມ.

ໂຄງການດັ່ງກ່າວມີຈຸດປະສົງເພື່ອສົ່ງເສີມການປູກໄມ້ວິກ, ສ້າງຕັ້ງໂຮງງານແປຮູບໄມ້ວິກເປັນສິນຄ້າ ແລະ ສ້າງຕັ້ງໂຮງງານປຸຍຊີວະພາບ ຢູ່ບ້ານປາກຄານ ເມືອງວຽງພູຄາ ແຂວງຫຼວງນໍ້າທາ ໃນຂອບເຂດເນື້ອທີ່ 255 ເຮັກຕາ, ໂດຍຈະໃຊ້ເວລາສຶກສາຄວາມເປັນໄປໄດ້ 18 ເດືອນ, ສາມາດຕໍ່ໄດ້ 1 ຄັ້ງ ການຕໍ່ອາຍຸບໍ່ເກີນ 6 ເດືອນ ແມ່ນລວມທັງເວລາຂຽນບົດວິພາກເສດຖະກິດ - ເຕັກນິກ ບົດການປະເມີນຜົນກະທົບຕໍ່ສິ່ງແວດລ້ອມ, ບໍລິສັດຕ້ອງວາງເງິນຄໍ້າປະກັນຈຳນວນເງິນ 50 ພັນໂດລາແລະ ສາມາດຖອນເງິນຄໍ້າປະກັນໄດ້ກໍຕໍ່ເມື່ອ "ຝ່າຍ ຂ"ປະຕິບັດໜ້າວຽກຕ່າງໆທີ່ກຳນົດໄວ້ໃນ MOU ສະບັບນີ້; ນອກຈາກ "ຝ່າຍ ຂ" ໄດ້ປະຕິບັດພັນທະຕ່າງໆປະກອບສ່ວນຊ່ວຍພັດທະນາທ້ອງຖິ່ນເປັນຕົ້ນຊ່ວຍພັດທະນາບ້ານ (ບ້ານທີ່ໂຄງການຕັ້ງຢູ່), ຊ່ວຍພັດທະນາເມືອງ, ຊ່ວຍພັດທະນາແຂວງ, ງົບປະມານຊ່ວຍຕິດຕາມ, ຊຸກຍູ້ການຂອງພະແນກກະສິກໍາ ແລະ ປ່າໄມ້, ຫ້ອງການກະສິກຳ ແລະ ປ່າໄມ້ເມືອງວຽງພູຄາ, ງົບປະມານຊ່ວຍຕິດຕາມຊຸກຍູ້, ຄຸ້ມຄອງຂອງພະແນກແຜນການແລະການລົງທຶນແຂວງ,ຫ້ອງການແຜນການ ແລະ ການລົງທຶນ ເມືອງວຽງພູຄາ, ການປະຕິບັດງານຂອງຝ່າຍ ຂ, ຕ້ອງມີຕາຕະລາງແຜນດຳເນີນງານ ແລະ ຈັດຕັ້ງປະຕິບັດຕາມແຜນທີ່ວາງໄວ້ຢ່າງເຂັ້ມງວດ ໂດຍການເຂົ້າຮ່ວມຂອງພາກລັດໃນການສຶກສາຄວາມເປັນໄປໄດ້, ການສຶກສາດັ່ງກ່າວຕ້ອງໄດ້ຕາມມາດຖານເຕັກນິກ, ຮັກສາບູລະນະຊັບພະຍາກອນ (ຕົ້ນໄມ້) ທີ່ພະແນກກະສິກຳ ແລະ ປ່າໄມ້ແຂວງ ແລະ ພາກສ່ວນກ່ຽວຂ້ອງ ກຳນົດອອກ.

ຂ່າວ: ສົມພອນ ຂຸນດາວົງ