ໃນໄລຍະ 6 ເດືອນຕົ້ນປີ 2024 ແຂວງຊຽງຂວາງ ໄດ້ເອົາໃຈໃສ່ຊຸກຍູ້, ສົ່ງເສີມການບໍລິການດ້ານໄປສະ ນີ, ໂທລະຄົມ ແລະ ການສື່ສານ ຊຶ່ງເປັນກຳລັງຊຸກດັນໃນການຕອບສະໜອງຂໍ້ມູນຂ່າວສານ ປະກອບສ່ວນເຂົ້າໃນພັດທະນາເສດຖະກິດ-ສັງຄົມ, ປ້ອງກັນຊາດ, ປ້ອງກັນຄວາມສະຫງົບ ສ້າງຄວາມສະດວກສະບາຍໃນການຕິດຕໍ່ພົວພັນໃຫ້ແກ່ການຈັດຕັ້ງພັກ-ລັດຕະຫຼອດຮອດປະຊາຊົນບັນດາເຜົ່າ ສາມາດເຊື່ອມໂຍງເຂົ້າທຸກເຄືອຂ່າຍຂໍ້ມູນຂ່າວສານໃນພາກພື້ນທົ່ວໂລກໄດ້ຢ່າງສະດວກ, ວ່ອງໄວ ແລະ ປອດໄພ.

ໃນໄລຍະ 6 ເດືອນຕົ້ນປີ 2024 ນີ້, ແຂວງຊຽງຂວາງສາມາດຂະຫຍາຍຈໍານວນໂທລະສັບຕັ້ງໂຕະແບບບໍ່ມີສາຍເພີ່ມຂຶ້ນຈາກປີຜ່ານມາ 2.631 ເລກໝາຍ, ປະຕິບັດລື່ນແຜນການປີ 5 ເທົ່າຕົວ, ໂທລະສັບມືຖືເພີ່ມຂຶ້ນ 2.151 ເລກໝາຍ, ເທົ່າກັບ 63,38% ຂອງແຜນການປີ, ໂທລະສັບມືຖືທີ່ໃຊ້ລະບົບ 3G, 4G ແລະ 5G ເພີ່ມຂຶ້ນ 2.855 ເລກໝາຍ, ເທົ່າກັບ 11,36% ຂອງແຜນການປີ, ສະຖານີຮັບ-ສົ່ງສັນຍານໂທລະສັບມືຖືມີທັງໝົດ 21 ສະຖານີ, ອິນເຕີເນັດເພີ່ມຂຶ້ນ 685 ເລກໝາຍ, ເທົ່າກັບ 72,18%, ໃນປັດຈຸບັນສະຖານີສັນຍານໂທລະສັບປົກຄຸມ 445 ບ້ານ, ກວມ 93,49% ຂອງຈຳນວນບ້ານໃນທົ່ວແຂວງ.

ໃນໄລຍະ 6 ເດືອນທ້າຍປີ 2024 ນີ້, ແຂວງຈະສືບຕໍ່ຕິດຕາມກວດກາການບໍລິການ, ຄຸ້ມຄອງການຂຶ້ນທະບຽນໂທລະສັບ ແລະ ເກັບກຳສະຖິຕິດ້ານໂທລະຄົມສາຂາຊຽງຂວາງ ເພື່ອສະຫຼຸບລາຍງານຂັ້ນເທິງໃຫ້ທັນເວລາ, ເອົາໃຈໃສ່ປັບປຸງວຽກງານໄປສະນີ, ໂທລະຄົມ ແລະ ການສື່ສານ ໃຫ້ມີຄວາມສະດວກ, ວ່ອງໄວ ແລະ ທັນສະ ໄໝ ຮັບປະກັນທາງດ້ານປະລິມານ ແລະ ຄຸນນະພາບໃຫ້ມີການຂະຫຍາຍຕົວຢ່າງຕໍ່ເນື່ອງ ເຮັດໃຫ້ອັດຕາປົກຄຸມສັນຍານໂທລະສັບກວມ 98,48% ຂອງຈໍານວນບ້ານທົ່ວແຂວງ. ສືບຕໍ່ຂະຫຍາຍສາຍໄຍແກ້ວໃຫ້ໄດ້ທັງໝົດ 145 ກມ, ຈໍານວນໂທລະສັບມືຖືໃຫ້ເພີ່ມຂຶ້ນ 1.243 ເລກໝາຍ, ໂທລະສັບມືຖືທີ່ໃຊ້ລະບົບ 3G, 4G ແລະ 5G ໃຫ້ເພີ່ມຂຶ້ນ 22.270 ເລກໝາຍ, ຂະຫຍາຍສະຖານີຮັບ-ສົ່ງສັນຍານມືຖືໃຫ້ເພີ່ມຂຶ້ນ 2 ສະຖານີ, ອິນເຕີເນັດໃຫ້ເພີ່ມຂຶ້ນ 264 ເລກໝາຍ.

ແຂວງຊຽງຂວາງ ມີບໍລິສັດບໍລິການດ້ານໂທລະຄົມ 3 ສາຂາບໍລິສັດຄື: ບໍລິສັດລາວໂທລະຄົມ ຈຳກັດ, ບໍລິສັດ ອີທີແອລ ຈຳກັດ ແລະ ບໍລິສັດສະຕຣາໂທລະຄົມ, ທັງ 3 ສາຂາບໍລິສັດລ້ວນແລ້ວແຕ່ອໍານວຍຄວາມສະດວກໃຫ້ທຸກຂະແໜງການຕະຫຼອດຮອດປະຊາຊົນບັນດາເຜົ່າ.

ຂ່າວ: ວັນໄຊ ຕະວິນຍານ