ທ່ານຕ໋ອງພູມມີພັນຄະນະພັກກະຊວງ, ຮອງປະທານຄະນະກວດກາພັກກະຊວງ, ຫົວໜ້າກົມກວດກາກະຊວງພາຍໃນໄດ້ເຂົ້າພົບປະແລະຢ້ຽມຢາມການນຳແຂວງໄຊສົມບູນໃນຕອນເຊົ້າຂອງວັນທີ29ກໍລະກົດນີ້, ທີ່ຫ້ອງຮັບຮອງຫ້ອງວ່າການແຂວງໄຊສົມບູນໂດຍການຕ້ອນຮັບຂອງທ່ານພອຍຄຳຮຸ່ງບຸນຍ່ວງເຈົ້າແຂວງໄຊສົມບູນພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດດັ່ງກ່າວທ່ານຕ໋ອງພູມມີພັນໄດ້ແຈ້ງຈຸດປະສົງຂອງການມາເຄື່ອນໄຫວເຮັດວຽກຢູ່ແຂວງໄຊສົມບູນໃນຄັ້ງນີ້ກໍເພື່ອຈັດຝຶກອົບຮົມການຈັດຕັ້ງປະຕິບັດວຽກງານກວດກາຂອງຂະແໜງການພາຍໃນໃຫ້ແກ່ພະນັກງານ-ລັດຖະກອນຜູ້ທີ່ຮັບຜິດຊອບວຽກງານກວດກາພາຍໃນແຂວງແລະເມືອງທົ່ວແຂວງໄຊສົມບູນເພື່ອເຮັດໃຫ້ພະນັກງານ-ລັດຖະກອນໄດ້ຮັບຮູ້ແລະເຂົ້າໃຈຢ່າງເລິກເຊິ່ງກ່ຽວກັບວຽກງານກວດກາທັງເປັນການເຮັດໃຫ້ກົງຈັກມີຄວາມສອດຄ່ອງຖືກຕ້ອງກັບເງື່ອນໄຂຕົວຈິງແນໃສ່ເຮັດໃຫ້ການຈັດຕັ້ງມີຄວາມເຂັ້ມແຂງ, ມີຄຸນນະພາບ, ການບໍລິຫານລັດມີຄວາມວ່ອງໄວແລະໂປ່ງໃສ. ພ້ອມດຽວກັນນີ້ທ່ານພອຍຄຳຮຸ່ງບຸນຍວງໄດ້ກ່າວຕ້ອນຮັບແລະລາຍງານສະພາບລວມໂດຍຫຍໍ້ໃນການຈັດຕັ້ງປະຕິບັດວຽກງານກວດກາຂອງແຂວງໄຊສົມບູນໃຫ້ທ່ານຫົວໜ້າກົມກວດກາກະຊວງພາຍໃນພ້ອມດ້ວຍຄະນະໄດ້ຮັບຊາບຕື່ມອີກ. (ບກ: ຄຳສາວເລືອງຄຳທິບ)