ຂ່າວຕ່າງປະເທດລາຍງານ ໃນທ້າຍອາທິດຜ່ານມາ, ລັດຖະມົນຕີກະຊວງການເງິນ ແລະ ປະທານທະນາຄານກາງຂອງກຸ່ມ ຈີ20 (G20) ສະຫຼຸບການປະຊຸມຄັ້ງທີ 3 ໃນນະຄອນຣີໂອ ເດຈາເນໂຣ ປະເທດເບຣຊິນ ໄດ້ອອກຖະແຫງການຮ່ວມ ຮຽກຮ້ອງໃຫ້ສ້າງລະບົບພາສີລະຫວ່າງປະເທດທີ່ເປັນທຳ, ມີສະຖຽນລະພາບ ແລະ ມີປະສິດທິພາບຫຼາຍຍິ່ງຂຶ້ນ.

ຖະແຫຼງການລະບຸວ່າ: ໃນກອງປະຊຸມໄດ້ຄຳນຶງເຖິງຄວາມຮີບດ່ວນ ແລະ ຄວາມສຳຄັນຂອງການປັບໂຄງສ້າງໃໝ່ຂອງສ່ວນແບ່ງໂກຕ້າ (quota shares)ເພື່ອສະທ້ອນເຖິງຄວາມສຳພັນຂອງສະມາຊິກໃນເສດຖະກິດໂລກໄດ້ດີຍິ່ງຂຶ້ນ ລວມເຖິງປົກປ້ອງໂຄຕ້າຂອງສະມາຊິກທີ່ທຸກຍາກທີ່ສຸດ ພ້ອມທັງຕອບສະໜອງຕໍ່ຄວາມຕ້ອງການ ແລະ ໃຫ້ຄວາມສຳຄັນກັບການພັດທະນາຂອງກຸ່ມປະເທດທີ່ມີລາຍໄດ້ຕໍ່າ ແລະ ປານກາງ.

ນອກຈາກນັ້ນ, ໃນກອງປະຊຸມຍັງຮຽກຮ້ອງໃຫ້ມີການປະຕິຮູບກອງທຶນການເງິນລະຫວ່າງປະເທດ (IMF) ແລະ ເສີມສ້າງທະນາຄານເພື່ອການພັດທະນາພະຫຸພາຄີ (MDBs) ທັງຍັງໄດ້ປະກາດຖະແຫຼງການລັດຖະມົນຕີວ່າດ້ວຍການຮ່ວມມືດ້ານພາສີລະຫວ່າງປະເທດ ພ້ອມທັງຮຽກຮ້ອງໃຫ້ເພີ່ມຄວາມໂປ່ງໃສດ້ານພາສີ, ປ້ອງກັນ​ການ​ຫຼີກ​ລ່ຽງ​ພາສີ​ດ້ວຍ​ການ​ທຳລາຍ​ຖານ​ພາສີ ແລະ ເຄື່ອນຍ້າຍກຳໄລ ລວມເຖິງໃຊ້ການເກັບອັດຕາພາສີແບບກ້າວໜ້າກັບຜູ້ລົງທຶນລາຍໃຫຍ່ພິເສດ. 

ທ່ານ ເຟີນັນໂດ ແຮດແດດ ລັດຖະມົນຕີກະຊວງການເງິນ ຂອງເບຣຊິນ ຊຶ່ງເຮັດໜ້າທີ່ເປັນຜູ້ປະສານງານໃນການປະຊຸມ ກ່າວວ່າ: ການເຜີຍແຜ່ຖະແຫຼງການຮ່ວມສະບັບນີ້ ເປັນໄຊຊະນະຂອງປະຊາຄົມລະຫ່າງປະເທດ ຫຼັງຜ່ານມາດົນນານຫຼາຍປີ ແລະ ກຸ່ມຈີ 20 ຈຳເປັນຕ້ອງໃຊ້ປະໂຫຍດຈາກລະບົບຕິດຕາມສະຖານະທາງການເງິນ ເພື່ອເສີມສ້າງກົນໄກຄວາມຮ່ວມມືຕ່າງໆ.

ທັງນີ້, ເບຣຊິນ ໄດ້ສັບປ່ຽນຕຳແໜ່ງປະທານຂອງກຸ່ມຈີ 20 ຕັ້ງແຕ່ເດືອນທັນວາ ປີຜ່ານມາ, ຂະນະທີ່ໃນໄລຍະໜຶ່ງປີນີ້ ລັດຖະບານເບຣຊິນມຸ່ງເນັ້ນ 3 ປະເດັນສຳຄັນໄດ້ແກ່ ການຈັດການພາວະຄວາມອຶດຢາກ, ຄວາມຍາກຈົນ ແລະ ຄວາມບໍ່ເທົ່າທຽມ ລວມເຖິງການພັດທະນາທີຍືນຍົງ ແລະ ການປະຕິຮູບການປົກຄອງລະດັບໂລກ.