ໃນລະຫວ່າງວັນທີ 26-27 ກໍລະກົດ 2024 ຜ່ານມານີ້, ຄະນະກໍາມະການຄວບຄຸມໄພພິບັດຂັ້ນເມືອງເມິງ ແຂວງບໍ່ແກ້ວ ຮ່ວມກັບ ບໍລິສັດ ຢຸຍເຊີນ ກໍ່ສ້າງຂົວທາງ ແລະ ເຄຫາສະຖານ ຈໍາກັດ ລົງສໍາຫຼວດເສັ້ນທາງທີ່ເປ່ເພ ໃນໄລຍະລະດູຝົນ ແຕ່ເທສະບານເມືອງເມິງຫາຂົວນໍ້າຟ້າ-ສາມແຍກເຂົ້າບ້ານນໍ້າຄາລື້ ແລະ ສາມແຍກເຂົ້າບ້ານປຸ່ງຈອມແສງ ຫາສາມແຍກບ້ານຜາດໍາ ເມືອງເມິງ ແຂວງບໍ່ແກ້ວ.
ການສໍາຫຼວດເສັ້ນທາງທີ່ເປ່ເພ ໃນຄັ້ງນີ້ ເພື່ອແກ້ໄຂສຸກເສີນ ເສັ້ນທາງທີ່ເປ່ເພໃນບາງຈຸດທີ່ບໍສາມາດທຽວໄດ້ ໃນໄລຍະລະດູຝົນນີ້ ຊຶ່ງໄດ້ສ້າງຄວາມຍຸ້ງຍາກ ໃນການສັນຈອນໄປ-ມາ ກໍຄືການຂົນສົ່ງສິນຄ້າ ເປັນຕົ້ນ ດິນເຊາະເຈື່ອນຖົມເສັ້ນທາງ, ຂຸດຮອງລະບາຍນໍ້າ, ຖົມເສັ້ນທາງທີ່ເປັນບວກເປັນຂຸມ ແລະ ອະນາໄມທໍ່ລະບາຍນໍ້າ ໂດຍແມ່ນບໍລິສັດ ຢຸຍເຊີນ ກໍ່ສ້າງຂົວທາງ ແລະ ເຄຫາສະຖານຈໍາກັດ ເປັນຜູ້ຮັບຜິດຊອບ.
ຜ່ານການສໍາຫຼວດເຫັນວ່າ ເສັ້ນທາງແຕ່ເທສະບານເມືອງເມິງ ແຂວງບໍ່ແກ້ວ ຫາ ຂົວນໍ້າຟ້າ ຊາຍແດນເມືອງລອງ ແຂວງຫຼວງນໍ້າທາ ຊຶ່ງມີຄວາມຍາວ 34 ກິໂລແມັດ, ແຕ່ເທສະບານເມືອງເມິງ ຫາສາມແຍກເຂົ້າບ້ານນໍ້າຄາລື້ ມີຄວາມຍາວ 34 ກິໂລແມັດ ແລະ ແຕ່ສາມແຍກເຂົ້າບ້ານປຸງຈອມແສງ ຫາສາມແຍກບ້ານຜາດໍາ ມີຄວາມຍາວ 25,42 ກິໂລແມັດ, ຊຶ່ງທາງບໍລິສັດ ຈະໄດ້ນໍາເອົາກົນຈັກເຂົ້າມາປັບປຸງສ້ອມແປງ ແລະ ແກ້ໄຂສຸກເສີນ ໃຫ້ທ່ວງທັນກັບສະພາບການ ເພື່ອຄວາມສະດວກສະບາຍໃນການເດີນທາງໄປ-ມາ ກໍຄືການຂົນສົ່ງສິນຄ້າຕ່າງໆ ລະຫວ່າງເມືອງເມິງ ຫາເມືອງລອງ ແຂວງຫວງນໍ້າທາ, ເທສະບານເມືອງເມິງ ຫາ ເມືອງຫ້ວຍຊາຍ ແລະ ບ້ານ ຫາບ້ານພາຍໃນເມືອງ ໃຫ້ມີຄວາມສະດວກສະບາຍ ແລະ ວອງໄວຂຶ້ນກວ່າເກົ່າ. (ຂ່າວ: ອຸ່ນຄໍາ ຂັນວາລິດ)