ກະຊວງແຜນການ ແລະ ການລົງທຶນ (ຜທ) ໄດ້ຈັດພິທີປາຖະກະຖາ ວັນສໍາຄັນຂອງພັກ-ຊາດ ຄື: ລະນຶກວັນເກີດປະທານ ສຸພານຸວົງ ຄົບຮອບ 115 ປີ (13 ກໍລະກົດ 1909 - 13 ກໍລະກົດ 2024), ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 47 ປີ (18 ກໍລະກົດ 1977-18 ກໍລະກົດ 2024) ແລະ ການສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 62 ປີ (5 ກັນຍາ 1962-5 ກັນຍາ 2024) ໃນວັນທີ 26 ກໍລະກົດ ຜ່ານມານີ້ ທີ່ສະໂມສອນຂອງກະຊວງດັ່ງກ່າວ.

ຈຸດປະສົງ ຂອງການປາຖະກະຖາ ເພື່ອໃຫ້ສະມາຊິກພັກ, ພະນັກງານຫຼັກແຫຼ່ງ ຂອງ ກະ​ຊວງ ຜ​ທ ຮັບຮູ້, ເຂົ້າໃຈ ແລະ ກໍາແໜ້ນຂະບວນການຕໍ່ສູ້ຕ້ານກັບຈັກກະພັດຜູ້ຮຸກຮານ ແລະ ໃຫ້ຮູ້ເຖິງ ສາຍພົວພັນອັນເປັນມູນເຊື້ອແຫ່ງຄວາມສາມັກຄີພິເສດ ລະຫວ່າງ ສອງປະເທດ ລາວ-ຫວຽດນາມ, ຫວຽດນາມ-ລາວ ທີ່ໄດ້ຮ່ວມສໍາພັນສູ້ຮົບ, ຮ່ວມຂຸມຄອງດຽວກັນ, ໄດ້ຊ່ວຍເຫຼືອຊຶ່ງກັນ ແລະ ກັນໃນໄລຍະຕໍ່ສູ້ກູ້ຊາດ ຈົນເຖິງປັດຈຸບັນ.

ໃຫ້ກຽດປາຖະກະຖາໂດຍ ສະຫາຍ ນາງ ພອນວັນ ອຸທະວົງ ຮອງເລຂາຄະນະບໍລິຫານງານພັກ ປະທານກວດກາພັກ ຮອງລັດຖະມົນຕີກະຊວງແຜນການ ແລະ ການລົງທຶນ, ມີບັນດາສະມາຊິກພັກ, ພະນັກງາຫຼັກແຫຼ່ງ, ພະນັກງານ-ລັດຖະກອນເຂົ້າ​ຮ່ວມ​ຮັບ​ຟັງ.

ສະຫາຍ ນາງ ພອນວັນ ອຸທະວົງ ກ່າວບາງຕອນທີ່ສໍາຄັນວ່າ: ປະທານ ສຸພານຸວົງ ເກີດວັນທີ 13 ກໍລະກົດ 1909 ທີ່ຫຼວງພະບາງ ໃນຄອບຄົວເຊື້ອເຈົ້າ, ເປັນໂອຣົດ ຂອງເຈົ້າມະຫາອຸປະຣາດບຸນຄົງ ແລະ ໝ່ອມຄໍາອ້ວນ ມີເອື້ອຍ 2 ຄົນ ຄື: ເຈົ້າຍິງທະວີວັນ ແລະ ເຈົ້າຍິງຈິນດາ ຣັດສະໝີ, ມີ ອ້າຍຕ່າງມານດາ 2 ຄົນ ຄື: ເຈົ້າເພັດຊະຣາດ ແລະ ເຈົ້າສຸວັນນະພູມມາ.

ປະທານ ສຸພານຸວົງ ແມ່ນການ​ນຳ​ຂັ້ນ​ສູງ ຂອງພັກ ແລະ ລັດ ຄົນໜຶ່ງທີ່ຕິດພັນກັບຂະບວນການປະຕິວັດ, ເພິ່ນໄດ້ຮ່ວມກັບຜູ້ນໍາຄົນອື່ນໆ ນໍາພາຂະບວນການຕໍ່ສູ້ປົດປ່ອຍຊາດ ກໍຄື ການປົກປັກຮັກສາ ແລະ ສ້າງສາພັດທະນາ ປະເທດຊາດ, ປະທານ ສຸພານຸວົງ ເປັນເຈົ້າຊາຍແດງ, ເປັນສັນຍາລັກ ຂອງຄວາມສາມັກຄີ, ເປັນວິສາວະກອນເອກ ຂອງປະເທດລາວ ແລະ ເປັນນັກການເມືອງທີ່ມີຈິດໃຈສາກົນອັນຜ່ອງໃສ, ເພິ່ນເປັນຜູ້ນຳທີ່ມີຈິດໃຈຮັກຊາດອັນສູງສົ່ງ, ຍອມເສຍສະຫຼະທຸກສິ່ງທຸກຢ່າງ ເພື່ອປະເທດຊາດ, ເພື່ອປະຊາຊົນ. ຄຸນລັກສະນະທີ່ພົ້ນເດັ່ນ ຂອງປະທານ ສຸພານຸວົງ ແມ່ນເປັນຜູ້ນຳທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດກໍໄດ້ຍົກສູງສະຕິ ມີລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ເອື້ອເຟື້ອຮັກແພງມິດສະຫາຍຢ່າງຈິງໃຈ, ດໍາລົງຊີວິດຢ່າງສັດຊື່ສຸຈະລິດ ແລະ ງ່າຍດາຍ. ປະທານ ສຸພານຸວົງ ໄດ້ເລີ່ມຈາກນັກຮັກຊາດທີ່ແທ້ຈິງກາຍເປັນນັກປະຕິວັດທີ່ກ້າແກ່ນ, ເປັນໜຶ່ງໃນບັນດາຜູ້ນໍາທີ່ດີເດັ່ນ ແລະ ເຄົາລົບຮັກ ຂອງປະຊາຊົນລາວເຜົ່າ.

ໃນພິທີ, ສະຫາຍ ວຽງສະຫວັນ ວິໄລພອນ ກໍາມະການຄະນະບໍລິຫານງານພັກ ຮອງປະທານຄະນະກໍາມະການຮ່ວມມືລາວ-ຫວຽດນາມ ໄດ້ປາ​ຖະ​ກະ​ຖາ ວັນເຊັນສົນທິສັນຍາມິດຕະພາບ-ການຮ່ວມມື ຄົບຮອບ 47 ປີ (18 ກໍລະກົດ 1977-18 ກໍລະກົດ 2024) ແລະ ການສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 62 ປີ (5 ກັນຍາ 1962 – 5 ກັນຍາ 2024) ຊຶ່ງໄດ້ຍົກໃຫ້ຮູ້ວ່າ: ພາຍຫຼັງປະເທດຊາດໄດ້ຮັບການປົດປ່ອຍ, ທັງສອງປະເທດ ລາວ ແລະ ຫວຽດນາມ ລ້ວນແຕ່ຕົກຢູ່ໃນສະພາບທີ່ຫຍຸ້ງຍາກສັບສົນທີ່ສຸດ ບໍ່ວ່າທາງດ້ານການເມືອງ, ເສດຖະກິດ-ສັງຄົມ, ວັດທະນະທຳ, ການທະຫານ, ການຕ່າງປະເທດ ແລະ ອື່ນໆ ແຕ່ລາວ-ຫວຽດນາມ ກໍໄດ້ສືບຕໍ່ພົວພັນກັນຢ່າງສະໜິດແໜ້ນ, ໃຫ້ການສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ແລະ ຮ່ວມມືກັນໃນດ້ານຕ່າງໆຢ່າງໃກ້ຊິດ ສະແດງອອກ ຄື: ວັນທີ 18 ກໍລະກົດ 1977 ລາວ-ຫວຽດນາມ ໄດ້ເຊັນສົນທິສັນຍາມິດຕະພາບ ແລະ ການຮ່ວມມືນໍາກັນໂດຍ ແມ່ນ ປະທານ ໄກສອນ ພົມວິຫານ ປະທານສະພາລັດຖະມົນຕີ ແລະ ທ່ານ ຟ້າມ ວັນດົງ ນາຍົກລັດຖະມົນຕີ ຂອງຫວຽດນາມເປັນຜູ້ລົງນາມ. ເຫດການດັ່ງກ່າວໄດ້ເປັນຂີດໝາຍໜຶ່ງທີ່ສໍາຄັນ ປະກອບສ່ວນເຂົ້າໃນການປັບປຸງ ແລະ ເສີມຂະຫຍາຍມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງລາວ-ຫວຽດນາມ, ຕັ້ງແຕ່ນັ້ນມາ ການຮ່ວມມືຮອບດ້ານລະຫວ່າງ ລາວ-ຫວຽດນາມ, ຫວຽດນາມ-ລາວ ໄດ້ເລີ່ມຕົ້ນສັກກະລາດໃໝ່ໃນເງື່ອນໄຂໃໝ່. ເຫດການປະຫວັດສາດອັນໜຶ່ງທີ່ມີຄວາມໝາຍສໍາຄັນໃນວັນທີ 5 ກັນຍາ 1962 ຫວຽດນາມ ແລະ ລາວ ກໍໄດ້ສ້າງຕັ້ງສາຍພົວພັນການທູດນໍາກັນຢ່າງເປັນທາງການ. ເຫດການດັ່ງກ່າວນີ້ ມີຄວາມໝາຍສໍາຄັນທາງປະຫວັດສາດ ຂອງສອງຊາດລາວ-ຫວຽດນາມ.

ຂ່າວ-ພາບ: ນາງ​ແສງ​ຈັນ