ໃນວາລະດຳເນີນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງບໍລິຄໍາໄຊ ຊຸດທີ II ທີ່ໄດ້ເປີດຂຶ້ນໃນຕອນເຊົ້າຂອງວັນທີ 30 ກໍລະກົດນີ້, ທີ່ສະພາປະຊາຊົນແຂວງບໍລິຄໍາໄຊ, ທ່ານ ສອນທະນູ ທໍາມະວົງ ເຈົ້າແຂວງບໍລິຄໍາໄຊ ໄດ້ລາຍງານກຽ່ວກັບການຈັດຕັ້ງປະຕິບັດວຽກງານທີ່ພົ້ນເດັ່ນ, ເປັນຈຸດສຸມບູລິມະສິດຂອງແຂວງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ເຫັນວ່າເສດຖະກິດຂອງແຂວງ ຍັງມີການຂະຫຍາຍຕົວຢູ່ໃນລະດັບ 4,12%, ລວມຍອດຜະລິດຕະພັນພາຍໃນ (GPP) ປະຕິບັດໄດ້ 8.137,50 ຕື້ກີບ (ແຜນ 8.131,53 ຕື້ກີບ) ລາຍໄດ້ສະເລ່ຍຕໍ່ຄົນບັນລຸໄດ້ 24 ລ້ານກວ່າກີບ ຫຼື ປະມານ 1.155 ໂດລາ, ສຸມໃສ່ຍົກລະດັບພື້ນຖານໂຄງລ່າງຕ່າງໆໃຫ້ດີຂຶ້ນ, ສົ່ງເສີມການຜະລິດສໍາລັບການສົ່ງອອກ ແລະ ທົດແທນການນໍາເຂົ້າສິນຄ້າ, ເອົາໃຈໃສ່ຊຸກຍູ້ບັນດາໂຄງການຈຸດສຸມສໍາຄັນໃຫ້ສາມາດດໍາເນີນການໄວ ເປັນຕົ້ນແມ່ນໂຄງການກໍ່ສ້າງຂົວມິດຕະພາບລາວ-ໄທ ແຫ່ງທີ 5 (ບໍລິຄໍາໄຊ-ບຶງການ) ຊຶ່ງໄດ້ສໍາເລັດ ສັນຍາ 1 ບັນດາຕົວອາຄານ, ສ່ວນສັນຍາ 2 ຂົວຂ້າມ ແມ່ນປະຕິບັດໄດ້ 88,07%, ໄດ້ເອົາໃຈໃສ່ຕິດຕາມ ທາງດ່ວນປາກຊັນ-ວຽງຈັນ ແລະ ທາງດ່ວນປາກຊັນ-ໄຊຈໍາພອນ ອອກສູ່ຊາຍແດນ ສສ ຫວຽດນາມ.
ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ສາມາດແກ້ໄຂຄອບຄົວທີ່ບັນລຸມາດຖານທຸກຍາກ ກວມເອົາ 96,58%, ບ້ານທີ່ບັນລຸມາດຕະຖານພົ້ນທຸກ ກວມເອົາ 93,31% ແລະ ບ້ານທີ່ບັນລຸມາດຕະຖານພັດທະນາ ກວມເອົາ 79,22% ຂອງຈໍານວນບ້ານໃນທົ່ວແຂວງ, ສຸມໃສ່ການສ້າງຄອບຄົວວັດທະນະທໍາ ໃນໄລຍະ 6 ເດືອນ ປະຕິບັດໄດ້ 16 ຄອບຄົວ ແລະ ສ້າງບ້ານວັດທະນະທໍາໄດ້ 1 ບ້ານ, ເທົ່າກັບ 100% ຂອງແຜນປີ. ສໍາເລັດການສະເໜີຍົກລະດັບວັດພະບາດໂພນສັນ ເປັນມໍລະດົກແຫ່ງຊາດ ແລະ ໄດ້ປະກາດຮັບຮອງຢ່າງເປັນທາງການ ແລະ ວຽກງານອື່ນກໍໄດ້ຮັບຄວາມເອົາໃຈໃສ່, ໄດ້ຮັບການຈັດຕັ້ງປະຕິບັດ ແລະ ມີຜົນສຳເລັດເປັນຢ່າງດີ. (ຂ່າບ-ພາບ: ຄຳຟອງ)